作者：黃偉嘉
教育部「以本土語言標注臺灣地名計畫（第2階段）」已經tī 2023年4--月公佈--ah！Tsit回新增加「聚落」（庄頭）、「街道」（街仔路）、「自然地理實體」（就是山kap河）、「公共設施」（有水庫、廟宇等等），lóng總7,207筆ê地號名。Tsit期就來看台大團隊tī「街道」拄--著ê一个趣味ê問題。
Lán台灣ê街仔路有幾千條，所以團隊是按照全國ê門牌數量，選出khah tsia̍p用ê 2,500條街仔路名。其中各縣市、鄉鎮lóng有kài濟重覆ê街仔路名，所以已經包括全國大約七成左右ê門牌仔。
Án-ne一下排--落-來，排第195名--ê是「西門路」，全國lóng總6,396塊門牌頂kuân用著tsit个路名，有四个縣市揣ē著tsit个路名，其中上濟--ê是台南市；排tī 1,529名--ê，是「西門街」，全國lóng總1,162塊門牌頂kuân用著tsit个街名，有三个縣市揣ē著tsit个路名，其中上濟--ê是新竹市。
Tī有限ê計畫時程kap資源內底，無可能全台灣lóng調查一擺。所以阮標注「西門路」ê時tsūn，就kan-na調查上kài濟ê台南市ê發音。「西門街」mā是仝款，kan-na調查上kài濟ê新竹市ê發音。結果阮就發現講：台南市西門路，在地是讀做「Se-mn̂g-lōo」。新竹市西門街，在地suah讀做「Sai-mn̂g-kue」。
Tsit个結果ē用得講是tsiânn趣味。團隊koh進一步研究，發現對台北、台南ê人來講，「西門」讀「Se-mn̂g」khah慣勢，因為「西門町」、「捷運西門站」kap「西門路」lóng是án-ne講。但是對新竹、彰化、高雄鳳山ê人來講，in「西門」是讀「Sai-mn̂g」，tī「西門街」kap縣城ê「西門」就是án-ne講。
是按怎ē án-ne--leh？照講，原底所有ê「西門」lóng是讀做「Sai-mn̂g」，但是後--來受著各種影響，一部份ê「西門」就轉做文讀音。阮到tann iáu ē用得揣著證據：比如講台南市西門路尾，是古早「小西門」tshāi ê所在，當地人稱做「小西跤（Sió-sai-kha）」。
Lín故鄉ê「西門」是按怎發音--ê--leh？
（作者是「地圖與多媒體研究室」研究員）
編按：漢羅用字有調整，原文是全漢。全漢版ē囥tī雜誌網站，hōo讀者做參考、對照。
專欄簡介：有人講「台語無字」。事實上台語一直lóng有字，自以早就用漢字來寫lán ê地號名。但是因為借字、借音、走音、腔口差、連音等等各種ê變化，一寡地號名suah hām漢字鬥bē起--來。若到一个生份ê所在，tiānn-tiānn是一開喙讀地號名，就hông隨知影是外地人。台大地理系「地圖與多媒體研究室」一直以來，投入地圖製作、地理教育、地名研究。Tuì 2019年開始，執行教育部「以本土語言標注臺灣地名計畫」，成果已經用tī改善台鐵、捷運ê放送。Tuì tsit月日開始，「地圖與多媒體研究室」逐個月ē tuì台語ê角度，tī雜誌介紹一个地號名，後擺若是坐車、駛車經過，拄好tn̄g--著，一定ē koh-khah疼惜lán tsit塊土地ê大細項代誌！
以本土語言標注臺灣地名計畫 https://reurl.cc/XjozaR
---------------------
全漢版
教育部「以本土語言標注臺灣地名計畫（第2階段）」已經佇2023年4月公佈矣！這回新增加「聚落」（庄頭）、「街道」（街仔路）、「自然地理實體」（就是山佮河）、「公共設施」（有水庫、廟宇等等），攏總7,207筆的地號名。這期就來看臺大團隊佇「街道」拄著的一个趣味的問題。
咱臺灣的街仔路有幾千條，所以團隊是按照全國的門牌數量，選出較捷用的2,500條街仔路名。其中各縣市、鄉鎮攏有蓋濟重覆的街仔路名，所以已經包括全國大約七成左右的門牌仔。
按呢一下排落來，排第195名的是「西門路」，全國攏總6,396塊門牌頂懸用著這个路名，有四个縣市揣會著這个路名，其中上濟的是臺南市；排佇1,529名的，是「西門街」。全國攏總1,162塊門牌頂懸用著這个街名，有三个縣市揣會著這个路名，其中上濟的是新竹市。
佇有限的計畫時程佮資源內底，無可能全臺灣攏調查一擺。所以阮標注「西門路」的時陣，就干焦調查上蓋濟的臺南市的發音。「西門街」嘛是仝款，干焦調查上蓋濟的新竹市的發音。結果阮就發現講：臺南市西門路，在地是讀做「Se-mn̂g-lōo」。新竹市西門街，在地煞讀做「Sai-mn̂g-kue」。
這个結果會用得講是誠趣味。團隊閣進一步研究，發現對臺北、臺南的人來講，「西門」讀「Se-mn̂g」較慣勢，因為「西門町」、「捷運西門站」佮「西門路」攏是按呢講。但是對新竹、彰化、高雄鳳山的人來講，in「西門」是讀「Sai-mn̂g」，佇「西門街」佮縣城的「西門」就是按呢講。
是按怎會按呢咧？照講，原底所有的「西門」攏是讀做「Sai-mn̂g」，但是後來受著各種影響，一部份的「西門」就轉做文讀音。阮到今猶會用得揣著證據：比如講臺南市西門路尾，是古早「小西門」tshāi的所在，當地人稱做「小西跤（Sió-sai-kha）」。
恁故鄉的「西門」是按怎發音的咧？
---------------------
