作者：石牧民 （作者是台灣師範大學、靜宜大學台文系兼任助理教授）
Lán tsit个「文學káng台」專欄tī雜誌第329期講著賴和ê台語作品〈富戶人ê歷史〉。Tng當時，台灣ê文學創作leh sio諍「用台灣ê語言，寫作台灣ê作品」tsit層代。Tsit个背景致使賴和先（sian）來寫〈富戶人ê歷史〉tsit篇作品。Lán結論講，口語beh tsiânn做文學作品，「中ng隔一个賴和先--lah。」
Lán án-ne講，目的是leh分拆一个拍算逐个人lóng有ê文學理念。Hit个理念，在台灣是「喙講台灣話，手寫台語文」，在中國是「我手寫我口」。論真，無影「ngóo手寫ngóo khió」。Tse就是lán 329期ê結論。上無mā tio̍h-ài有賴和先鋪排kap口語tsiok接近ê文字，提in來講一層代、一个故事，tsiah有號做「文學」。Tsit个結論，mā是leh講現代文學，用賴和先ê話是「新文學」，hit个運動kap革命ê核心，m̄是kan-na「用口語來寫文學」。講落到tè，he m̄是一个口語iah是話ê革命，是一場「文」ê革命。革命ê對象是古典ê文學，中國化ê古典文學。
Ma̋-koh hit場革命發生ê所在，大面是tī「書面」；文學者khah按怎吵，mā是寫文章sio罵。總--是，lán需要進一步講：hit場革命m̄-nā發生tī台灣tsit搭位ê書面neh；「我手寫我口」hōo lán知明，革命mā發生tī中國hit搭ê書面上。兩爿ê革命koh有sio交tshap。蔣渭水創辦ê《台灣民報》，1925年正--月特刊內底，中國ê魯迅mā有來寫文章。Koh m̄-nā án-ne niā-niā。Hit場「文」ê革命，koh-khah古早就已經發生tī日本ê書面上。日本人按怎講in ê革命？In講「言文一致」，ゲンブンイッチ，用 lán ê話，就是「giân bûn it-tì」。
日本ê「言文一致」革命，khah早台灣kap中國。Mā是發生tī書面上。而且，革命ê內容，用書面上ê例來講就有夠額。貴君若kā 19世紀尾期ê日本新聞紙sa來看，看ē著兩種風格ê文章。寫tī頭版，講論國家大事、世界局勢ê報導，用中國化ê古典文體寫；bē輸lán所知ê「文言文」，he號做「大新聞」。有「大新聞」，準定有「小新聞」。無錯，hit-tsūn日本新聞紙落尾hit幾張，報啥人欠錢走路、啥人ê某tuè人走，tsit款社會新聞，號做「小新聞」，用接近口語ê文體來寫。Hit-tang-tsūn ê日本「文學作品」，免想mā知，tio̍h-ài用中國化古典文體ê「大新聞」hit款風格來寫。日本新聞學大將，夏目漱石（ナツメソウセキ）、森鷗外（モリオウガイ）tsia-ê作家，就是用真接近日語口語ê「小新聞」文體對中國化ê古典文體發動革命。In向大眾開破，中國化ê古典書面文字，kap生活化、日常ê日本口語完全無對同；規定文學tio̍h-ài用中國化ê文體來寫，bē輸kā有主體性ê日本口語關落監。「Lán tio̍h-ài tuì中國化ê監獄內底tháu放--出-來--lah」，拄好是日本「言文一致」革命ê核心。
實際上，tuì 19世紀尾期，日本、台灣、Khoo-lí-ah（韓國），koh來，東南亞國家，lóng總發生仝款ê革命，tī書面上hìnn-sak中國化古典文體ê革命。中國mā有。1910年代，「現代」ê中國人對「古早」ê中國發動革命，tuì án-ne來完成現代化。Tī日本、台灣、Khoo-lí-ah、東南亞tsia-ê所在，hìnn-sak tuì舊ê中國來ê影響（尤其是古典漢文ê影響），來達成現代化，有iáu一層意義：就是家己ê主體性--lah！
東亞國家ê現代化過程，lóng tio̍h-ài tuì舊中國ê束縛內底tháu放--出-來，tsiânn做家己、tsiânn做有主體性ê新ê家己。自án-ne，lán知影，新文學、新國家，自本kat sio倚。Lán台灣新生、出頭天tsit條路，hōo日本kap中國國民黨殖民統治拖kah tsiok長。Lán tsit-má來壯膽行hōo通透。
#文學káng「台」 專欄，本文使用教育部推薦漢字kap臺灣閩南語羅馬字拼音方案。
#台文通訊BONG報 332期，2021年11月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
