作者：易俊宏
 |
| 圖片出處： 環境資訊中心 https://e-info.org.tw/node/77491 |
豬年已經來--ah，tsit个專欄mā已經寫年外--ah。頂個月lán有介紹著豬仔ê親tsiânn（山羊仔）；tsit個月就繼續來講另外一个豬仔ê親tsiânn——四目鹿仔。講是親tsiânn，是因為豬仔kap鹿仔lóng是「雙蹄目」ê動物，台灣在種ê鹿仔有三種：水鹿、花鹿kap羌仔。Tsit三種鹿仔內底，上細隻--ê是羌仔，進前mā tī「保育類」動物名單內底，一直到舊年（2018年）tsiah轉做「一般」動物。花鹿tī lán政府beh開始保育工作ê時tsūn，就hōo人刣到差不多--ah！Tsit-má政府有想辦法復育，tī動物園kap國家公園內底有成功ê人工生湠。目前上需要保護--ê，是水鹿。
水鹿，mā ē-sái叫 in 「四目鹿」，是tsit三種內底，體型上大隻--ê、蹛ê所在mā是上kuân--ê（海拔1,000尺以上ê樹林內底），tsit-má是上需要保護ê鹿科動物，mā是台灣tsiah有ê特殊亞種。花鹿是已經復育到無滅絕ê危險--ah，所以tsit個月，lán就來詳細講「四目鹿」。
其實四目鹿仔kap lán仝款，只有兩蕊目睭。Tse「四目」ê稱呼，是因為 in 目睭下跤有腺體，當 in leh受氣iah是歡喜ê時tsūn，tse腺體就ē展開，特殊ê氣味就ē掖--出-來；若是beh kā人heh驚，in koh ē發出聲音。有時tsūn，目睭下跤ê腺體ē堅pa，in 就ē kā鑢tī樹仔頂kuân，留氣味來區分地盤。四目鹿 in 是一群一群做伙生活--ê，但是公鹿有時tsūn ē家己行動，tī透早天光kap日頭beh落山ê時tsūn，是 in 活動ê主要時間。四目鹿m̄-nā是台灣上大隻ê鹿科動物，in mā是台灣野生上大隻ê食菜動物；in主要是食葉仔kap草仔，民間mā有人飼乖--ê，只是mā無濟。
四目鹿ê毛色，為著ē-tàng走藏，ē隨時季無仝來變色：熱天ê時tsūn，毛色是khah淺ê黃塗色，冬天ê時tsūn，毛色是khah深ê咖啡色。公ê四目鹿tsiah有角，tse角是每冬lóng ē lak--去。一歲了後，開始ē生角，冬天時（12--月到隔tńg年2--月）角ē lak--去，koh再生新--ê；生--出-來、iáu未變tīng--ê，就是「茸」（jiông）。鹿茸是春天生--出-來、熱天（6、7--月）開始硬化，tsit時tsūn mā是四目鹿ê生湠期，母--ê差不多就開始leh痟--ah。到冬天，公--ê ê角lak--去，母--ê mā ài時間來生鹿仔囝；母--ê大腹肚ài八、九個月ê時間，鹿仔囝生--出-來ê時，差不多mā是公--ê leh lak角生茸ê時。母--ê每一胎生一隻niā-niā，鹿仔囝兩歲開始ē-tàng生囝生角，三歲以前，公鹿角只有一支niā-niā，四歲ê時開始有分叉，五歲以後就兩叉三枝án-ne一直到老。
四目鹿ê保育議題，kap規个生態系有tsiânn複雜ê關係。Tī美國ê黃石國家公園，就有一支記錄片，leh講狼beh按怎改變一條河（註）；原因就是狼ē掠鹿來食，hōo鹿仔bē siunn濟，án-ne就bē kā草埔地lóng食了了，細欉樹仔mā ē-tàng puh芽大漢。樹仔mā ē大、ē老、ē倒，一个健康完整ê樹林，需要種種無仝階段ê樹仔，tsiah ē-tàng滿足動物ê需求，規个生態tsiah ē有法度達成動態ê平衡。Tī台灣，食鹿仔ê貓豹早就因為lán人類ê開發kap討掠拍獵，全部lóng消失--去--ah；四目鹿 in ē khè食樹皮，án-ne就ē hōo樹仔死--去，所以若是鹿仔siunn濟，mā m̄是一件好代誌。Tsit个問題，目前對四目鹿來講，iáu無發生，但是對花鹿ê保育來講，已經是愈來愈大ê問題--ah。對lán人類來講，m̄-nā是單純保育四目鹿niā-niā，beh按怎保育一款動物kap平衡環境生態，實在需要koh-khah濟ê研究。
台灣動物記事專欄，本文使用教育部推薦漢字kap臺灣閩南語羅馬字拼音方案。
台文通訊BONG報300期，2019年3月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
