主講／黃隆正
記錄／吳宛霖
本活動由台灣蠻野心足生態協會主辦，李江却台語文教基金會協助記錄。
今仔日tshuā lán做伙來青田街行讀ê是黃隆正老師，黃老師tī台南出世、成長，到kah 1977年14歲ê時，tsiah tuè序大人千里迢迢搬徙來到台北青田街拍拚，算算--leh tī tsia也生活40幾冬，進前黃老師擔任青田社區發展協會ê理事長，tiānn-tiānn為著青田街古蹟ê再利用、社區生活環境、樹木ê維護，hām在地ê里長、鄉親做伙拍拚出聲，今仔日lán ē-tàng跟tuè黃老師ê跤步來行踏，實在有影是tsiok期待--lah！
活動一開始，黃老師先介紹集合地附近ê台北清真寺、天主教聖家堂，其中講著一段奇妙ê恩典，就是有18塊tī 1878年由法國藝術家Charles Lévêque（『李維克』）替比利時耶穌會聖心堂製作ê彩畫玻璃，tī 1998年教堂改建ê時被拆--落-來了後，教會leh替tsit 18塊彩畫玻璃揣新厝。佳哉，感謝新竹清泉天主堂ê丁松青神父用心去爭取，感謝上主ê安排、恩賜，tsit 18幅140幾年前ê歐洲藝術品自án-ne渡海到台灣，妝thānn tī天主教聖家堂內面。Suà--來，老師就tshuā逐家uat入去邊--a ê巷仔內，lòng-lòng叫ê車聲隨時消音，變做恬靜ê社區。清幽ê環境hōo逐家m̄敢koh tshi-tshi-tshu̍h-tshu̍h來kā攪吵，mā m̄甘行siunn緊，beh勻勻仔行來體驗、遙想、思考老師所講青田街所經歷無仝年代ê過去、歷史，伊ê故事是beh按佗位來講起？Tsia thài ē hām別个所在hiah-nī無仝款？鬧熱ê台北市區哪ē有tsiah-nī濟日本厝？現今社會是凡事錢做主、土地koh-khah免講是億來億去ê金庫，是按怎tsia ê人hiah-nī奢華，窗仔拍--開就ē-tàng看著一欉一欉青翠ê樹木？
1928年（昭和3年）台北帝國大學（tann台灣大學ê前身）創校，tī創校前幾年ê籌備期間就一直tuì日本本土聘請學者、教授，in來到台灣，頭一件ài處理ê代誌就是揣厝。後--來，台北帝大開始踮溫州街起「大學官舍」，hit寡日本教授mā sio招成立「大學住宅信用組合」，按算beh集體開發起造家己ê厝，in m̄-nā家己khîng資金、揣貸款、買地，連厝mā是各人照各人ê需要來設計。1930年（昭和5年）年開始動工，hōo原本ê田園變做sù-sī ê住宅區，kap南爿ê大學官舍tsiânn做一phiàn文教區。Tsit tah m̄-nā建築物ê型式風格各有千秋、每一戶兩百外坪ê空間安排kap外觀mā lóng有精差，sio-siāng--ê是每一戶lóng有種台灣本土hām南洋ê熱帶植物，mā有溫帶植物，生態資源真豐富。
二次大戰戰後，日本人被遣送回國，日本厝宅換人蹛，新住戶多數是中國來ê研究者、學者，mā有一寡仔是日本教授ê台灣人朋友1。因為台灣大學並無好好仔管理hit寡無人使用ê厝宅，致使四箍圍發草、厝宅àu--去、mā有人tàn pùn-sò，自án-ne漸漸hng廢--去。一直到kah 2002年國有財產局想beh kā舊àu ê日本厝宅收tńg去重翻。Hit年青田街開始發生火燒厝2事件，hiàng時怪手mā tī社區內挖來挖去，suà--來koh有厝宅3（第二間）tī三更半暝to̍h火。
黃老師hām一陣社區朋友開始警覺著青田街ê變化，是按怎平靜ê青田街ē出現怪手？哪ē無代無誌厝ē tio̍h火燒？若是台大beh翻厝，哪ē無先hām在地ê鄉親討論？樹仔kám ē koh原在？ In kám有做環境評估？2003年青田街ê厝邊頭尾將giâu疑化做行動，逐家合做伙發起舊厝老樹保存運動，beh來維護青田街ê環境，頭先是發起「愛青田、救老樹」聯名簽署活動，m̄-koh台大有產權，beh按怎叫in bē-sái拆厝、bē-sái tshò樹？尾手黃老師想著撇步，走去文化局提出古蹟kap歷史建物審查案。另外in koh走揣過去第一代居民ê歷史資料、相片、文物，要求列入「名人故居」、ài「全區保存」。落尾，台北市政府指定四間市定古蹟4、七間歷史建築5。雖bóng，tsia kan-ta是所有日本厝宅ê少數，m̄-koh已經是古蹟審查案例中，上無簡單ê成就。
跤步ná tín動，眾人ê心hōo黃老師引tshuā到hit个大變動ê年代。台灣割hōo日本了後，平靜ê傳統庄社田園漸漸起變化，日本人tī tsia起發電所、配電所、輕便路、鐵枝路，koh來設學校、起大學官舍、日本教授家己起厝宅、社區內日本教授ê研究真濟lóng是hām台灣人ê生活有關6。戰後，換另外一批mā是學術界有名聲ê學者教授搬--入-來，社區內ê生活語言一時變kah鬧熱滾滾，有台語、客語、華語、日語；若是無所謂ê「國語政策」，台灣可能早就是多語國家。
戰後ê年代，新生南路中ng iáu是光景美麗、長長ê瑠公圳。熱--人，大人囡仔tī圳溝內洗浴、thit-thô，ǹg南行就是台灣大學，koh過--去，汀州路是以早ê台北鐵道新店線7。農業時代，田園中ng火車tu-tu叫，日--時逐口灶lóng mā門戶開開，m̄-nā是囡仔按厝前走到厝後、tsit間跳過hit間、ko̍k-ko̍k雞ē跳tsiūnn飯桌頂tok菜，連牛仔有時mā ē走去人家厝內底。青田街ê故事，講bē煞、sueh不盡，tī tsit tah成長ê日本人第二代，因為懷念故鄉，成立昭和町會，看著新聞報導舊厝老樹保存運動，in mā sio招tńg來故鄉……，只要是對土地、環境、社會ê疼心無變，tsit个故事ē繼續生湠--落-去，一代koh一代。
- 日本教授tī beh離開進前，用買賣ê方式移轉產權hōo伊ê朋友。
- 文史界有一个講法，就是beh拆厝改建，上kài簡單ê方式就是放火燒。
- Tsit間日本厝宅就是後--來「台灣大學椰風專案學人宿舍」其中ê一塊建築基地。
- 市定古蹟青田街7巷2號、6號、9巷5號、12巷5號。
- 歷史建築包括青田街7巷8號、8巷10號、9巷4號、6號、8號kap和平東路一段187號、183巷7弄6號。
- 培育蓬萊米、建立醫療教育、消滅鳥鼠症、出版《臺日大辭典》kap《原語臺灣高砂族傳說集》、原住民族遷移史研究、tī荷蘭整理台灣史料目錄、原住民族影像紀錄、甘蔗塗肉微生物研究、白糖製造改良等等。
- 1921年通車，由台北鐵道株式會社私營；戰後換臺灣鐵路管理局經營，1965年停止營運。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
