主講／蕭文杰
記錄／吳玉祥
淡水舊底是一个討海為生ê庄社，哪ē知到kah 17世紀，國際勢力爭鬥，外國人ê跤跡沓沓仔踏--入-來，致使舊庄社十八變，tsiânn做現此時鬧熱ê街市。Tsit个轉變是按1628年西班牙人侵門踏戶起造「聖多明哥城」到放火燒城離開來起鼓，到1644年荷蘭人tī原位重起「安東尼堡」。Koh來是1858年淡水港開設了後，五大洋行開市做生理，馬偕設教會、醫館、學堂，hōo淡水開始轉變，m̄-nā tsiânn做北台灣上大ê港市hām物產交易中心，西洋文化mā按tsia傳入台灣。
到kah日本治理台灣hiàng時，淡水港ê港路塗沙積tái，koh拄著1899年ê基隆建港計畫，致使淡水港漸漸衰微。佳哉，1901年淡水線鐵路開通，1919年淡水球埔、1924年海水浴場sio-suà開幕、等到1927年入選「新台灣八景」ê時，伊已經tńg骨化身，tsiânn做有現代ê遊樂地mā有先民跤跡、人文歷史kap天然景觀ê市鎮。遊客掠外，濟濟畫家lóng sannh著伊ê風姿，走來tsia取景。時代變化，風貌無siâng，按畫家ê作品就ē-tàng看分明，觀音山kap海口是永遠ê配角，主角按帆船、油輪到洋樓、禮拜堂換來換去。美國電影《聖保羅砲艇》mā聞名來tsia借景，港口百船來去，街市後山清雅，意外替lán留落來戰後初期ê淡水景緻。
淡水ê洋風建築除了殼牌倉庫tī無仝向掠外，賰--ê大概lóng是tī紅毛城kap福佑宮之間ê街巷內。路草清楚好行，若準是孤一个人來行踏，mā免驚ē行m̄知路--去。今仔日按紅毛城、英國領事館官邸起行，昔日ê紅毛城要塞已經是不見兵丁，英雄無用武之地。Tsiah踏出紅毛城，眼前一間大禮拜堂thîng-thîng徛tī路口，kā lán講tsia是馬偕博士推動教育ê起頭。按創辦台灣第一間新式學校「理學堂大書院」開始，到tsit-má ê真理大學、淡江高中ê真理街，區域內親像理學堂大書院、八角塔、大教堂、女學堂、馬偕故居等，現此時lóng iáu有leh使用。
Suà接順路繼續參訪「前清淡水關稅務司官邸」（小白宮）、多田榮吉厝宅了後，落崎來到中正路ê『道格拉斯』洋行檢查場、倉庫hām日商中野ê徛家厝，hōo人暗想以早淡水港tng tshia-iānn ê黃金年代。人聲喊huah、水螺喉叫、萬國客商來去、船載起落，he是生做啥mih款ê光景啊？中正路直行倒uat就是馬偕街基督長老教會kap偕醫館，tsia mā是馬偕傳教、行醫ê開基地。教會前廣場對面，原本ê德記洋行、日本厝、荷蘭厝，已經變做現代ê咖啡店、電信局、郵局。
馬偕街直thàng到三角公園馬偕雕像後壁面，三民街口木下靜涯紀念公園起--去，就是畫家木下一家伙tī tsia度口過日20外年ê徛家「世外莊」。Koh行進前就是典雅大pān hām英國領事館外款sio仝ê紅樓，來tsia看景配茶lim咖啡真sù-sī，崎跤厝宅街市、海風水影，對岸山嶺翠嵐，hōo lán心涼脾土開。Suà接行到福佑宮後ê重建街，聽講日本時代tī tsit條街巷徛起--ê m̄是頭人就是gâu人。來到tsia lán ē-tàng勻勻仔行、khuann-khuann仔看，看古早厝、看營業百年ê許順記、看一兼兩顧，ē-tàng安眠mā ē-tàng監看崎跤福佑宮民眾動靜ê日本警官宿舍。
Koh來tio̍h-ài大hua̍h行，nǹg出街市kap捷運站，來到鼻頭街ê嘉士洋行殼牌倉庫，tsia就是現時ê淡水文化園區，園區曠闊、景觀特殊，自tsia做淡水洋風建築行跤收煞ê尾站，除了歇喘賞景以外，上要緊--ê是ài去殼牌故事館看19世紀以來殼牌倉庫ê歷史發展、看國際局勢變化影響殼牌倉庫ê保留、看在地文史團體、文化工作者按怎搶救hōo伊免受拆除。Tsit段歷史hōo lán一个真好ê教示，hit寡人為著私利，不管時家私頭lóng tshuân好勢leh tng等，等kah有一日lán若是tènn恬恬、激khòo-khòo，無leh注意ê時，in就beh出動--lah！
