作者：草地人
編按：原文tī 2004年11--月，《台文通訊》第128期，第13頁刊出；漢羅用字有koh調整--過。
台獨運動覺醒tī二二八事件國殤ê心疼；台獨運動開始tī海外留學生ê思鄉夢；台獨運動開花tī本土性政黨ê執政；台獨運動落實tī台灣新文化ê形成。M̄-koh chit款新文化形成ê關鍵在tī台語文運動ê成功iah是失敗。無家己語文ê文化是空殼ê好看，無久長ê ǹg望；當然也bē有家己特殊民族性ê建立kap生湠。Chit款認知kap決心促成1991年《台文通訊》tī洛杉磯ê Torrance創立。
Tī 1991年前，海外台獨運動ê關心面kan-taⁿ限制tī政治ê層次，親像廢除戒嚴ê咒筐；消除烏名單ê惡夢；抗議島內無人權ê政治關監；島內民主政治ê呼籲；爭取台灣政治ê自主性……等，lóng是政治性ê關懷。真少人有想著beh有家己新文化ê建立，koh-khah免講是家己語文ê推動。Chit款情形，kap海外台獨運動本身ê khùi力ke減有關係。政治關懷是迫切主要ê運動內容，親像聲援美麗島事件、陳文成事件、林--家兇殺ê新二二八恐怖；本土性政黨ê成立……等具體性ê行動。當時雖然有《公論報》kap《太平洋時報》ê新創立，但是關心面離bē開政治性ê層次。差不多完全無kha̍p著beh有家己ê新文化iah是台灣固有文化ê宣揚。一直到1991年，島內有《新文化》雜誌kap海外《台文通訊》ê成立，chiah開始有chit款ê覺醒kap鼓吹。
《台文通訊》開始tī鄭良光Torrance ê辦公室。因為tī進前，有鄭良偉教授來Torrance ê台福教會舉辦台語文ê研習會。有幾位同鄉（王秋森、許清煌、洪茂澤）感受著台語文久長受壓迫kap輕視，真迫切來鼓吹挽救chit个kiōng-kiōng-beh受消滅ê母語。逐家參詳撥一點仔時間來tàu關心。利用每禮拜二暗tī鄭良光ê Torrance辦公室聚會，學寫台語kap分享讀冊ê心得。然後由鄭良光獨立創辦chit份四頁ê小刊物。伊家己kap另外一位兄弟（精兵）負責寫稿。因為chit陣人lóng是教會ê信徒，in ǹg望tī台灣新文化形成ê時，ē-tàng注入基督教文化ê精華來取代中國文化ê封建思想，所以tī第二年in也推出「台灣百合論壇」，由精兵（筆名）執筆kap台灣幾位關心ê牧師（黃伯和、董芳苑、王貞文）tàu跤手。用台文來寫神學性ê論題kap同鄉分享，開始台語文運動全面性ê推動。
Tī發行ê第二年，tī台灣本土成立《台文通訊》聯誼會，由陳明仁kap陳豐惠負責。推動到每一个縣市，也訓練台語文ê師資。Tī《台文通訊》ê前四年，lóng是鄭良光家己獨資支持chit个刊物，後--來由陳柏壽牧師牧養ê教會所成立ê聰美基金會接辦，李勤岸接編輯三年。到第八年，由陳雷……等加拿大ê幾位有志接辦，繼續chit款台語運動ê香火。
《台文通訊》ê標誌是一个犁田ê人tī一枝蠟燭火ê內面。Che是強調chit个刊物ê草根性kap啟發性。親像tī《台文通訊》成立ê前兩年，仝chit陣關心台獨ê教會朋友成立「光臨團契」關懷台灣ê弱勢團體（幼妓、原住民等）向台灣本島呼籲人權性ê關懷。後--來有彩虹專案、勵馨園ê成立，專業關心台灣弱勢婦女ê運動。
《台文通訊》是一个平面性ê小刊物，m̄-koh伊所發起ê台語文運動已經影響台灣本土政黨ê關心。Tī通俗ê學校教育加入台語文ê課程。Tī高等教育也有台灣文學ê課程。M̄-koh chit款ê台語文運動iáu離「新語文、新文化、新民族、新國家」ê目標真遠。親像採用台語文ê平面媒體iáu是非常少；tī台灣ê高等教育iáu無台語文系所；tī官方ê文件iáu無有台語ê書寫；tī商業性ê廣告iáu是用中文做主體。Che表明台灣ê獨立運動iáu是停tī政治層次，對文化獨立ê努力iáu是初步。一个本土性ê政黨若忽略本土語文ê正當性kap主體性，kan-taⁿ注重tī政治上ê權益，che是無根ê台獨運動，親像台灣本土ê教會（長老會）因為過去無投入tī台語文運動，in ê第二代、第三代會友流失到華語教會，tī政治ê立場也偏向中國主體ê立場。Che證明，若無家己ê語文，就bē有家己ê文化，無家己ê文化，所起造ê國家是空殼--ê。有一个實例ē-tàng做lán ê參考。
以色列tī西元前587年亡國。In ê百姓流散tī逐款語文ê國家。In ê先覺者，強調家己ê語文保持，tī每个禮拜六聚集第二代教in希伯來文kap猶太文化。Che是猶太人安歇日ê文化來源。一个猶太人若m̄守安歇日制度，就是民族ê罪人，che是亡國亡族ê開始。Chit款堅持hō͘ in有khùi力tī 1947年重建家己ê國家。雖bóng是小國，tī四圍阿拉伯勢力ê威脅，因為有真強ê文化認同，hō͘ in m̄驚亡國ê威脅。
海外台獨運動有濟濟團體teh學習猶太人建國運動ê路徑（親像FAPA、TACL等）。M̄-koh iáu是停tī政治ê層次。雖bóng目前有台灣傳統週ê慶祝，che是表演性ê活動，對tī固定台語文活動ê參與 iáu是非常非常少。Che表示海外台獨運動是無根ê運動。關心台灣獨立運動ê多數是第一代ê中古老人；koh 20年，chit个世代ê人lóng歸土，海外台獨運動ē變做歷史名詞。Hit時，台灣若koh受中國併吞，啥mih人ē koh再關心--leh？Hit時，也是濟濟人台獨夢醒ê時。為啥mi̍h tio̍h chiah-nī悲觀--leh？因為《台文通訊》ê草根運動ê呼籲並無得著海外台獨運動主流ê重視kap具體ê支持。無家己ê語文，就無家己ê文化；無家己ê文化，就無家己ê民族；無家己ê民族，所建立ê國家是別人ê附庸；早慢ē受併吞，che是真淺ê道理kap歷史演進ê結果。
