作者：孫博萮（Sng, Phok-jû） （作者是台澎法理建國工作者 ）
Tī lán台灣母語復振tshui-sak ê運動中，最近上kài重要ê討論就是根據《國家語言發展法》要求tī「國民基本教育」各階段ài將「國家語言」列入去「部定課程」內底，本土語言應該改做國高中必修，無疑悟8月17竟然去hōo教育部「課審會」初審ê國中分組否決。
「課審會」前一工8月16，我kap兩位台語前輩鬥陣去「國家」教育研究院台北院區參加《十二年國民基本教育本土語文課綱草案》ê北區公聽會。博tī會中登記第一个發言，以下是發言ê重點，有一部份因為時間關係（每一人只有三分鐘），無法度全部講了，賰--ê就用文字提供hōo主辦單位，有一寡是後--來想--著koh追加--ê ，整理hōo逐家參考。
頭一步，lán tio̍h-ài為lán台語人ê母語正名。
台語就是台語，是一个語種ê稱呼，台語m̄是、mā m̄-thang號做「閩南語」，「閩語」、「閩南語」ē-tàng做一種語系、語群ê「分類」，m̄是對特定語種ê「稱呼」，台語m̄是中國ê「方言」。所以thōng要緊--ê，就是ài liōng早將「台語」正名、棄sak過去以「中國」為中心、正統ê思考方式kap立場。
基進黨立法委員陳柏惟tī 10月19 mā針對台語名稱問題對教育部提出質詢，伊認為tsit-má課本台語hông稱做「閩南語」無妥當，受著文化、歷史kap風土民情ê影響，台語kap閩南語有tsiânn大ê差別，呼籲教育部應該修正對台語ê稱呼方式。
第二，既然tsit-má《國家語言發展法》已經通過，lán tio̍h-ài hìnn-sak用「中華話」做思考基礎ê心態。像主辦單位提供hōo--lán ê tsit幾本手冊，應該mài用「中華文」、ài直接用台文、客語文、原住民族語文來書寫，tse就表示lán主管機關ê心態，猶原是用「中華語」為頂位做思考基礎。
M̄管是用漢字正字iah是羅馬字，若是連主管機關to無能力用全母語來思考，lán beh按怎來教育lán ê囡仔、beh按怎要求教學現場ê老師？若是驚講有人看無，應該是ài準備對譯版本，m̄是孤提供一種「中華文」ê版本，ài hōo每一種本土語言ê使用者lóng ē-tàng受著完整ê尊重。
第三，lán tsit-má有真濟家長拚命leh kā細漢囡仔講台語／母語，但是囡仔大漢了後，suah無法度連結學校教育。囡仔一旦去學校上課，就變做全「中華語」ê環境，自校長、老師到同學，kiōng-beh全部lóng是「中華語」使用者，學生囡仔欠缺ē-tàng對話ê對象，甚至連老師mā無一定ē-hiáu講，無法度hōo語言能力koh-khah進步。Tsit部份m̄管課綱按怎修改、加強，lóng無可能補救。
Tse表示lán本土語言教育無應該是基本教育ê附屬品，應該是主體，一禮拜一節tsit款設計是絕對無夠--ê。真正想beh改善tsit-má母語流失ê狀況，應該ài規定tī lán ê教育體系中，設置全母語學校（m̄-nā是「浸水式教學」niā-niā）。Tuì幼稚園、國小、國中、高中職基礎教育，到大學以上ê高等教育，所有ê學科lóng ài直接用母語來上課。M̄管是社會、自然、音樂、體育、iah是數學、微積分，甚至是英文等外語，lóng ài有法度用母語來教學，教授、碩士生、博士生mā ē-tàng用母語來做學問、做研究；m̄免感覺tse無可能，人香港久長以來就是án-ne ê教育環境（tse mā漸漸受著中國政府愈來愈重ê壓迫，『圖博』、『維吾爾』族、南蒙古mā lóng是），tsit部份mā需要tuì教師訓練開始做起。
第四，阮mā ē-tàng了解，現階段beh達成頭前所講ê目標iáu需要時間。Lán現階段ē-tàng先做--ê，是優先獎勵有能力用全母語開學科課程ê老師，hōo in tī學校開正式課程。
另外，除了有通過語言認證ê學生應該ài tī升學考試加分，報考「國家」證照考試、公務人員考試等，mā lóng應該加分鼓勵。公務人員、「國營」企業、「國軍」等招募人才，mā應該ài特別設定有母語專長ē-tàng優先錄取ê名額。
針對考試ê部份，mā ài設計用母語出題ê考卷，hōo已經有相當程度ê考生來進一步加分，增加學習ê動力kap誘因。尤其是針對想beh考師範大學、教育大學、參加師資培訓ê人，用母語考試更加需要特別加分鼓勵。Tse lóng是為培養未來用全母語教學ê科任老師做準備，án-ne tsiah有可能拍破目前教育體系獨尊「中華語」、對母語發展無友善ê歹境。
第五，針對tsit-má tī校園、公私部門內底母語使用無友善ê環境，主管機關應該ài比照「性別平等委員會」來設置「語言平等委員會」。除了提供語言平等教育，mā提供使用母語受著壓迫ê人，有申訴、救濟ê管道，來改善使用母語無自由ê狀況。主管機關mā應該ài提供校園、公私機關各種本土語言通譯ê資源，hōo各族群ê自然語言ē-tàng自由流通。
第六，針對學術語詞、專有名詞、新ê名詞，lán政府應該ài有一个專門ê本土語言委員會來研究、發佈，hōo本土語言mā tuè ē著時代ê進步。有一寡新字mā ē-sái直接使用外來語ê原文，hōo lán kap世界流通ē-tàng koh-khah利便。
政府ài設置「國家級」ê本土語言通譯團隊，m̄管是接待外賓、iah是總統、部會、「國會」kap地方議會開會、公私部門說明會／公聽會／聽證會等等，lóng有能力提供專業ê通譯服務；公部門、博物館、國家公園、公營重要景點ê導覽，mā ài訓練、配置母語解sueh人員。
另外，lán應該ài koh-khah拍拚來tshui-sak羅馬字使用正常化，全面用羅馬字取代中華注音符號。Hōo lán ê囡仔m̄管是學習本土語言iah是外國語，lóng ē-tàng koh-khah有效率，mài koh浪費性命去學習中華注音符號。
最後，就是親像tsit款本土語言課綱公聽會、討論會ê場合，應該ài每一種語別分開開會討論（tsit擺是台語文、客語文、原住民族語文全部同齊討論）。因為每一種本土語言拄--著ê狀況lóng無仝，應該針對個別語言ê需求來探討tsiah tio̍h，討論ê問題ē-tàng khah集中、深入，討論ê時間mā ē koh-khah充足。若是不得已一定ài同齊開會，至少應該ài為無仝母語ê使用者準備通譯，hōo每一个人使用母語lóng ē-tàng感受著自在，m̄免因為驚講現場有人聽無，就被迫ài用所謂「共同語言」，放棄／犧牲使用家己母語ê權利kap機會。
針對課審會國中分組初審8月17 ê決議，教育部長潘文忠9月初1 ê時mā回應講《國家語言發展法》有明定國民教育階段國家語言是必修課程，mā規定ài tī新課綱實施三年後（2022學年）啟動，因此ē「依法行政」。M̄-koh母語消亡ê時間無等人，lán台灣未來beh行向起造一个文化多元、平等ê國家，ài tuì tsit-má開始就加速tshui-sak母語復振kap正常化ê khang-khuè。課程設計m̄-nā bē-tàng減少，甚至ài透過筆者頭前建議ê tsia-ê路徑koh-khah增加；hit款對母語教育無重視ê人，mā應該liōng早將in自課審會委員名單內去除，m̄-thang hōo in繼續做台灣母語復振ê鎮路石。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
