主講／葉大華
記錄／吳宛霖
本文是2021/4/14 ê講座摘要記錄，主講者葉大華是監察院國家人權委員會ê委員 、台灣少年權益與福利促進聯盟無給職顧問。
2017年12月初8立法院通過修正《公民投票法》，kā公投投票年歲uì 20歲降低到18歲，tse當然是一个大進展，m̄-koh對「18歲參政權運動」來講，iáu-koh是khih一个大角，因為關係選舉ê投票年歲並無得著立法院ê支持，猶原是維持tī 20歲。反對ê理由大概是感覺18歲iáu-koh無夠成熟、對in無信心……。加上20歲選舉權是訂tī《中華民國憲法》第130條1內面，若beh kā修改，是憲法層次ê問題。Tī台灣，若是去kha̍p著修憲，he差不多是一个無可能ê任務2。目前全世界kā選舉年齡訂tī 18歲以下ê國家已經超過168个，tsia-ê國家內底有九成khah-ke已經kā公民投票年歲訂tī 18歲。Ē-sái講，「修改投票年歲限制」、「擴大青年參政權」已經是世界ê趨勢。講著少年--ê 18歲iáu無選舉權ê民主國家，竟然賰lán台灣一个。
Tī台灣，少年人若是到18歲，國家就慢慢仔送「禮物」hōo--in，beh叫in來承擔公民責任——頭一个就是民事／刑事責任、公投投票權，koh來就是做兵、納稅金——tsit寡除了公投掠外lóng是leh kā in加添責任。Lán lóng知影憲法是規定lán hām國家之間權利義務ê契約，lán照憲法來承擔責任、mā照憲法享受國民ê權利。Iáu-m̄-koh，對少年人來講，in是kan-na有公民義務suah無公民權利，tī公共政策上無法度出聲，mā無合法參與ê管道，造成權利kap義務無對等ê現象。也因為in無選票，無選票就無壓力，政策khah無去考慮著in ê想法、in ê需求，造成世代無平衡、無公平。
民主是啥mi̍h？民主就是ē-tàng接受無仝意見，意見無仝ê時ài去聽為啥mi̍h伊ê意見kap lán無sio-siāng，tse tio̍h-ài tī教育環境來培養獨立思想kap判斷。Lán來看tsit个世代ê少年人：瑞典查某囡仔Greta Thunberg推動全球抗暖化運動，影響真濟國家，伊16歲；台灣查某學生黃玟嵐反對澎湖、馬祖變kiáu場，影響在地人，伊13歲，koh-khah少年。因為網路世界ê發展，少年人集體轉變，in m̄是麻煩製造者，顛倒是改變世界ê行動者。
真濟國家hōo少年人tī高中ê時有參與公共事務ê機會。Tī歐洲，in kā少年人當做是社會進步發展ê重要「同伴」。少年人ē-tàng提早自主自立，tse是聯合國2030永續發展指標。Tī日本，出名作家村上龍出一本冊，號做《工作大未來——從13歲開始迎向世界》3，定義13歲就應該知影ê代誌——知影日本社會有啥mih款ê khang-khuè，每一種工作有啥mih特色、未來性……。一个社會ê公民成熟度，是看公民對公眾事務ê參與積極性，愈早hōo少年人參與公共事務，少年人tsiah有概念去關注。透過教育，協助少年人發展，培養獨立思考ê才調，hōo in做一个負責任ê社會公民。
- 《中華民國憲法》第130條：『中華民國國民年滿二十歲者，有依法選舉之權，除本憲法及法律別有規定者外，年滿二十三歲者，有依法被選舉之權。』
- 除了需要立法院朝野黨團高度共識支持，公民複決ê戶tīng ài 965萬票以上。
- Tse是台灣出版ê譯名，原文冊名是《13歳のハローワーク》。
線頂看影片
台語sa攏有 - YouTube 頻道
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
