主講／陳逸凡
記錄／戴如意
本文是2021/7/14 ê講座摘要記錄，主講者陳逸凡是台灣教會公報》總編輯。
陳逸凡tī傳統ê長老教會大漢，外公kap爸母lóng是虔誠ê基督教徒，雖然in真認同《台灣教會公報》，m̄-koh對報紙代表ê意義kap內涵其實無真清楚。伊ê外公外媽khah早tī教會學習白話字，爸母mā有讀到師專、受高等教育，m̄-koh因為無受著文化ê啟發，in對母語kap文字保存iáu是無啥意識，mā是ē計較序細華語、英語學了kám有好。
顛倒是陳逸凡伊家己 khah有語言ê意識，知影kā母語掠hōo tiâu ê重要。Mā是入來《台灣教會公報》食頭路了後，tsiah對tsit份報紙有khah深ê認bat。伊一開始tuì基層ê編輯做起，koh出外走新聞、做記者，到尾--à tsiah接總編輯tsit个khang-khuè。Tsit擺主題伊號做「老身猶原在」，是beh kā少年輩紹介：tse是台灣頭一份報紙。
一、來--者何人？巴克禮牧師kap伊ê同伴
巴克禮牧師細漢ê時tsūn kap一般人仝款，lóng有想beh蹛別莊、變好額ê夢想；後-- 來，伊感受著上帝呼召伊去傳福音，就tī 16歲寫獻身文，beh一世人做上帝ê工。Tī蘇格蘭leh讀Glasgow大學ê時，巴克禮牧師kap伊ê同學決志beh去傳教，受訓了後派來台灣，開始in宣教師ê一生。
台灣頭一台印刷機是1880年馬雅各醫生tuì故鄉寄--來--ê，m̄-koh一開始無人ē-hiáu使用，機器tshāi tī hia真久。一直到四年後，巴克禮牧師趁歇假去kā印刷技術學ē-hiáu，koh成立「聚珍堂」tsit間冊房，tsiah開始tī內底印報紙。Koh因為hit-tang-tsūn拄著清法戰爭，《台灣府城教會報》（tsit-má ê《台灣教會公報》）到隔年tsiah正式發刊。
第一版ê《台灣府城教會報》kan-na有四頁，頭版有兩个重點：第一，是ài ē-hiáu看聖冊，án-ne m̄免靠別人，就ē-sái家己學習上帝ê道理；第二，是孔子字（漢字）真oh，鼓勵基層ê人民學白話字，學習--起-來khah緊，ē-tàng讀報紙、讀聖冊，m̄-koh學漢字ê智識份子mā m̄-thang kā白話字看輕，兩種字lóng ài學。
二、大膽狂徒？時代ê米該雅tī tsia
《台灣教會公報》創刊到tann hông停刊三kái。第一kái是二戰ê時，去hōo日本政府停刊。第二kái是1969年，國民黨政府ê「國語政策」禁止台語白話字，tsua̋nn去hōo停--起-來。第三kái，是1987年，因為頭版標題寫紀念二二八事件40週年、訴求和平，結果tī出刊ê透早，報紙就hōo警備總部khok--去。落尾幾十个人tsiūnn街遊行、抗議政府打壓宗教自由，koh到市政府外口包圍、要求kā報紙送--轉-來——tī戒嚴時代，tse是tsiânn勇敢ê行動。
《台灣教會公報》用聖經內底ê故事，來比喻in是「時代ê米該雅」。聖經記錄——米該雅講：「我kí永活ê耶和華來講，耶和華對我講啥mi̍h，我beh講伊。」意思是，就算是歹聽話，米該雅mā ē照實講--出-來。陳逸凡講，辦報紙無好空、講話無好聽，m̄-koh若上帝需要借in講話，就ē繼續辦--落-去；mā親像in tī 1977年刊出ê人權宣言：「期待台灣tsiânn做一个新koh獨立ê國家」——tio̍h-ài好膽行家己ê路。
三、老身iáu在？百年身ê新氣象
Tsit一、二十年技術變化緊，《台灣教會公報》mā慢慢仔leh轉型，除了報紙，mā設新聞網站、辦展覽、紹介hōo少年人熟sāi。現在媒體傳播ê道理，ài讀者有tshi̍h讚、有分享，tsiah ē tī網路ê茫茫大海內底hông看--著；尤其若報導khah敏感ê政治議題，mā ē影響著接觸ê人數，tse對堅持理念ê《台灣教會公報》是一个考驗。陳逸凡mā提醒，接收資訊ê時m̄-thang完全相信，tio̍h-ài有tsit个意識，tsiah thang保障家己ê網路人權。
線頂看影片
台語sa攏有 - YouTube 頻道
#台語sa攏有講座專欄，本文使用教育部推薦漢字kap臺灣閩南語羅馬字拼音方案。
台文通訊BONG報329期，2021年8月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
