主講／江文瑜
記錄／戴如意
本文是2021/8/11 ê講座摘要記錄，主講者江文瑜是台灣大學語言學研究所教授。
行政院國家發展委員會tī 2018年提出「2030雙語國家政策發展藍圖」，雙語所指--ê是「英語」kap「台灣華語」，目標beh提升國民ê國際競爭力，hōo台灣tī 2030年ê時tsūn，tsiânn做一个雙語國家。其中有一條推動理念：「兼顧雙語政策hām母語文化發展」，是tsit份資料內底，唯一hām母語有關係ê政策。
Tsit-má定義ê母語，包括：台灣話、客語、原住民語、馬祖ê閩東語hām手語。目前，學生tī國小到高中階段，一禮拜kan-ta ài上一節母語課，而且tī國三、高二、高三koh m̄是必修，用tsiah-nī少ê時數beh kā母語學好，根本是無可能ê代誌。江文瑜教授煩惱，若變成雙語國家，只是愈打壓母語ê生存環境。
若看亞洲kā英語做國家語言ê國家，無論是新加坡、香港、馬來西亞，lóng有hōo英國殖民過百外冬ê歷史；lán隔壁ê菲律賓，mā hōo美國統治過49年。日本殖民台灣50冬，tī尾期，ē-sái理解日語ê台灣人，差不多占四成；hōo認證做「國語家庭」ê戶數，就koh愈少，kan-ta有1.3%。Tsit幾个例lóng顯示：beh tsiânn做一个雙語國家，m̄是tsiah-nī簡單ê代誌。
江教授提出兩个訴求：頭一个是，kā雙語國家政策改做「2030英語環境友善政策」。英語tuì lán來講iáu是外國語 ，beh kā英語學hōo好，無定著台灣ài變雙語國家，重要--ê是，提供一个對英語友善ê環境，發展藍圖ê目標mā仝款做ē到；第二，雙語國家ê目標hām文化部「國家語言發展法」sio衝突，國發會kap文化部應該同齊討論對策。
Tsit幾年政府thui-sak轉型正義，主要是tī lán目睭看ē著ê歷史事件kap人物，江教授提醒，語言ê轉型正義mā仝款重要。對經歷『我不說方言』世代ê人來講，母語hông剝削帶來真濟自卑kap痛苦，tse是失語者ê集體創傷，需要lán tsit-má起造多語ê環境來彌補。
母語ê復振有幾个方面thang拍拚，頭起先是媒體，已經有ê公視台語台，ài koh提kuân預算，鼓勵製作koh-khah濟本土語言ê作品，投資國際級ê電影電視；mā ài提供語言友善ê環境，親像公家機關增加口語翻譯、補助老師用本土語言教課；koh有建置資料庫，kā語言資料電子化。逐家做伙拍拚，hōo本土語言koh-khah發展，kā lán ê母語揣倒tńg--來。
線頂看影片
台語sa攏有 - YouTube 頻道
#台語sa攏有講座專欄，本文使用教育部推薦漢字kap臺灣閩南語羅馬字拼音方案。
台文通訊BONG報330期，2021年9月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
