聽著tsit个消息，心肝內有夠艱苦！Ē-sái講是看伊大漢--ê，哪ē知影干干仔beh lim酒了後駛車去挵電火柱，死--ah！Tsiah幾歲？23 ia̍h 24？前一站仔tsiah聽講kap伊交往十外年ê女朋友beh kap伊tshé，伊去人上班ê所在hue，啥知影tsit-tsūn已經變做倒tī棺柴底ê人--ah。
交往十外年，無m̄-tio̍h，in國小tī leh上我ê作文班ê時就teh牽--ah，我lóng想講就puppy love，囡仔人哪ē知影啥mi̍h是「愛」？結局in兩人mā是一路行到tsín，查埔囡仔m̄知是八字khah輕ia̍h是按怎，讀國中ê時學校拄tī墓埔邊--a，伊讀無偌久就休學，請教gâu人講是hō͘歹mih仔kha̍h--著。Suà--落-來koh去讀普門中學，蹛hia、食素食，ke減仔有神佛保庇，安然度過hit个風暴期。高中ê時去讀餐飲，ná讀ná考證照，了後koh kā in女朋友ê阿母tàu-saⁿ-kāng，tī傀儡寮仔（『力里』）ê一寮hia煮山產，生理koh不止仔讚。
講in讀國小ê時，就teh牽--ah是正確ê代誌，頭起先m̄敢hō͘ in ê序大人知影，見擺情批寫好lóng叫guán大漢--ê送去hō͘對方。大漢後生真古意，真正替in兩人傳幾仔年ê情批，guán lóng笑伊是in愛情ê「綠衣使者」，另日仔若結連理，tiāⁿ-tio̍hài請伊坐大位。
頂頂禮拜轉去佳冬石光見，載查某囝去買一寡仔物件，轉來ê時tī『全聯』ê門跤口看著in母--à，逐家lóng是tsiok好ê朋友，koh有親tsiâⁿ關係，guán大娘姑嫁in大伯，牽--起-來lóng真親。伊ê個性活潑koh樂觀，互相看--著招呼，歡喜kah親像查某囡仔嬰。查某囝問我：「另日仔食老，kám有想beh轉去佳冬蹛？」我kā應講若有法度食老，可能ē--啦，因為hia有我青春ê記持。拄嫁入去石光見，mā是tsiok bē慣勢，tse是一个閩客混濫ê庄頭，厝邊雖bóng ē講台語，m̄-koh，若拄著親像guán ta-ke án-ne對昌隆客庄嫁--過-來-ê，in講ê客話我就聽無啥有。好佳哉，ta-kuaⁿ是Hō-ló人，guán tī厝mā講台語，kan-taⁿ tī ta-ke in後頭ê親tsiâⁿ來ê時，我tsiah ē感覺礙虐，若無平常時仔是koh『還好』。
少年囡仔看guán囝做志願役，一個月薪水koh有兩萬幾，mā說服in老爸講hō͘伊去做志願役，其實tsit个囡仔tī國中畢業ê時就一直吵beh考中正預校，講以後beh去做軍官。結局是爸母m̄甘孤囝去食苦，硬kā擋--落來。Suà--落-來，讀冊讀kah一直休學，mā m̄知是情緒有障礙，ia̍h是真正去kha̍h著外神，橫直，囡仔phí niâ就一直行坎坎坷坷ê路，做序大ê可能ia̍h m̄敢siuⁿ kā管，規氣hō͘伊家己去選擇家己ê路。總是，m̄管伊拄著啥mih困難，hit个查某囡仔一直lóng陪tī伊ê身軀邊。
所擺今年聽大娘姑仔teh講tsit對少年囡仔tshé--ah，suah有淡薄仔hiau疑。本底koh真敬佩（kìng-puē）in兩人lóng hiah堅心，有法度行hiah久，taⁿ，tsit-tsūn是按怎哪ē講beh tshé--leh？總--是hit工kap in 母--à mā是招呼--一-下-仔niâ，無閒thang問hiah濟，以guán ê交情in 母--à mā bē掩崁tsiah tio̍h。Siáng知...Siáng知...我koh無勇氣khà電話hō͘伊，beh按怎開喙叫人節哀？Tsit-tsūn我家己就已經目屎流目屎滴--ah，是beh按怎安慰hit个一向lóng樂觀、快樂ê媽媽？
人生tiāⁿ-tio̍h是苦--ê，舊年大漢--ê做兵做kah躁鬱症發作，到taⁿ iáu koh逐工食藥仔，guán mā希望伊ê病ē-sái好--起-來，ē-sái行一條正常ê路。大娘姑真信神明，tiāⁿ叫我ài去替guán大漢--ê問一條明路，我想著tsit个彥勳當初mā是án-ne精神koh樣，in路尾聽講是去請教高人，將in兜ê大廳門敲掉重起，tsiah平順--落-來-ê。m̄是我鐵齒，醫學上ê病症iáu是用科學ê方式來醫，神佛ē-sái hō͘咱心靈得著安慰，m̄-koh若真正身體ê koh樣，tiāⁿ-tio̍h ài對症下藥來醫治。guán m̄敢ǹg望囡仔另日仔ē-sái偌tshuàng-tsiòng，只要伊平平安安，健健康康，mài koh精神病giâ--起-來就真萬幸--ah，siáng ē知？舊年mā發生嚴重ê車厄（eh）。
總--是，雖然挵kah真嚴重，mā-koh tī醫生治療之下恢復健康，tsit-tsūn ē行ē走，除了頭殼tio̍h傷ê病母必須ài沓沓仔hō͘伊恢復以外，ē-sái家己坐車去病院ê日間照護病房接受復健，ē-sái順順利利行伊ê人生，就是guán上大ê安慰。但是，彥勳--leh，suah無法度koh行伊ê人生路--lo͘h。哀！悼念tsiah-nī好ê囡仔suah án-ne無--去。尤其是koh tī「老爸節」拄過了ê時tsūn，叫爸母beh按怎承受--leh？
