♪ ▏▶全文朗讀
電視節目、報紙新聞、雜誌等等，甚至一般人開講mā可能ē去講著DNA − 一个tī現代時行ê名詞，kán-ná若出喙講--著，就是高科技koh sî-mô͘，suah罕罕有人頂真來瞭解DNA tsit-hō mi̍h。事實伊有tsiok飽ê學問tī--leh，m̄-koh lán tsia beh用kài簡單ê方式來解說。
DNA ê英文全名是：deoxyribonucleic acid。伊是通世界ê活mi̍h lóng需要ê一款酸性koh穩定ê化學分子。DNA分子內底所藏ê訊息就是起造性命ê厝tat；lán ê面路仔，生做lò、矮，大kho͘、瘦，頭毛khiû iah是直，是m̄是gâu破病，是m̄是gâu lim、ài lim，甚至性地ê一大部份，lóng總kap DNA分子有關係。簡單一句話，肉身（hi̍k-sin）ê一切íng-íng是DNA來決定--ê。
Lán細胞內ê DNA分子有一半uì老爸hia來，一半uì老母hia來，所以囡仔ē sîng老爸／老母，m̄-koh，因為DNA分子是一代傳一代，血親之間一定ē有sio-siāng ê DNA 分子 - 因此囡仔mā有可能sîng阿姨、阿舅甚至sîng阿公、阿祖。透過檢驗DNA分子，lán thang知影無仝人之間是m̄是有血脈ê關係。囡仔ē-tàng án-ne 來揣出親生ê爸／母。最近德國發生tsai飛lîng機ê事件，往生者ê遺體lóng lòng kah一塊一塊掖規sì-kuè；法醫透過檢驗tsia-ê破肢sàn骨內底ê DNA分子，tsiah有thang確認in ê主人kap 揣出往生者厝--裡ê人。
▲（第一圖）
說明： 倒手爿是nǹg空掃瞄電子顯微鏡（scanning tunneling microscope ，STM）看--著ê放大兩百萬倍ê DNA 分子。（來源http:／／www.sciencephoto.com／media／209661／view）。正手爿是DNA 分子ê bàng-gah。
除了性細胞（siâu-tsí kap卵tsí），規身軀ê逐粒細胞to有仝款ê DNA分子。DNA分子生做ná像兩條phua̍h鍊絞做伙，koh bē輸ná兩條旋籐相倚旋（第一圖）。DNA分子若kā thiah分開，逐條phua̍h鍊頂kuân to有一粒一粒ê真珠 - Nu-kut-tái（nucleotide，ヌクレオチド）。Nu-kut-tái有四種，每一種lóng是三个部份來tsiâⁿ--ê（第二圖）：一个失氧hu̍t糖（deoxyribose），一个磷酸（phosphate），koh一个hō͘ lán ē-tàng分類tsia-ê真珠ê主要成分 - 有機鹼（base），lán kā in簡寫做：A（Adenine）、T（Thymine）、C（Cytosine）、G（Guanine）。「DNA密碼」ia̍h-sī「遺傳密碼」就是teh講tsit四種真珠tī DNA phua̍h鍊頂kuân排列ê序，iah就是A、T、C、G tsit四項ê序（A、T、C、G ê序就是DNA順次（DNA sequence））。
一粒細胞內底有偌濟DNA分子？無仝生物就無仝。若人，逐粒體細胞（無包括性細胞）to有四十六條DNA分子。In兩个做一對，án-ne就有二十三對。DNA分子若kā家己纏ân，就變做棍仔形，lán叫伊做染色體（染色体，せんしょくたい）（第三圖）；所以人有二十三對染色體。性染色體決定一寡動物ê性別，在人來講，X kap Y tsit對就是性染色體；kan-taⁿ查埔tsiah有Y染色體，所以lán講查埔人ê性染色體是XY，若查某就是XX。
▲（ 第二圖）
一條DNA分子ē-tàng按照功能分做Tsín（gene）kap結構ê部份。Tsín有紮一kuāⁿ特殊ê DNA順次 - 遺傳密碼：ē-tàng用來產生RNA分子ia̍h是卵白質ê 一kue̍h DNA分子。Lán人約略有兩萬ê Tsín。Tsín若無活動ê時就恬恬tī hia，in若活動，就ná像電火點to̍h，ē開始生產遺傳密碼所指定ê RNA分子ia̍h是卵白質。細胞內ê兩萬ê Tsín bē siâng時活動，in ē按照細胞ê類型kap細胞所需要ê功能來起pōng - 細胞ná像一間烏暗ê房間，兩萬ê Tsín就是兩萬pha電火；電火開關若開，Tsín就活動，電火開關若關，Tsín就hua--去恬恬 bē活動。比論肝細胞就有kap肝功能相關ê Tsín teh 活動，其他ê Tsín就去hông約束tiâu--leh；肝--裡啥mih Tsín 受約束，啥mih Tsín ē得活動，是lán uì有形卵到tsiâⁿ人ê個體過程當中一步一步經由細胞分化來決定--ê。
DNA分子ê基本結構就是交纏旋籐：tsit條旋籐ê頭拄hit條ê尾；A拄T，C拄G，tī兩條交纏旋籐ê中央，倚靠氫（king）力（hydrogen bond）互相giú hō͘ tiâu，tsiâⁿ做雙雙對對ê有機鹼；tsia-ê「有機鹼對」一層一層koh受互相ê分子力影響，致使交纏旋籐尾--à tsiâⁿ做ná一个捲螺仔梯ê形（double helix）（第一圖）。
DNA順次ē影響DNA ê 結構。DNA ê 結構 - 規條DNA分子是beh khah彎曲，tēⁿ tsa̍t-tsa̍t，á是beh 放līng-līng - ē決定一个Tsín 是m̄是ē活動。簡單講，DNA分子束愈ân（愈彎曲ia̍h是tēⁿ愈tsa̍t），Tsín就愈bē活動。設使一个DNA分子頂頭有1,000 ê Tsín，束ân ê所在，hit-tah ê Tsín就khah bē 活動，甚至規个恬--去；賰--ê就是有teh活動ê Tsín。佗位束ân，佗位放līng，實際是無一定，Tsín ê活動是tuè細胞所需求來變化，所以DNA分子ê結構是一直teh改變（dynamic）。
Tsín ê 活動受非常giâm-gâi ê控制。因為tsit項機關實在siat-thái複雜，科學家到taⁿ mā iáu未完全瞭解，lán就無tī tsia討論--落-去。一項重要概念先講代先：Tsín ê活動量一定ài拄拄好，無就ē致病。一个Tsín若是活動了過頭濟，或者是細胞需要伊ê時suah無teh活動，a̍h是講伊活動了 m̄-tio̍h時；tsit款Tsín ê活動就親像是電火開關害--去án-ne - 電火m̄是點bē to̍h就是一直爍，無就to̍h m̄-tio̍h pha。Tsit-lō狀況ē hō͘ 細胞ê化學反應失調，一寡遺傳病、腦神經退化ê病、ho͘-lú-bóng走精ê病、癌症等等lóng kap tsia--ê 有關係。
▲（第三圖）
說明：倒手爿：電子顯微鏡看--著ê人類染色體。正手頂：細胞、染色體、DNA kap Tsín 互相ê關係。正手ē：人ê二十三對染色體。
科學技術進展hō͘科學家有法度tī實驗室內底改變ia̍h是設計DNA順次。Kā人工創ê DNA分子囥轉（tńg）去生物ê體內，hō͘「人工Tsín」 ê活動改變生物ê特性；tsit款就是人teh講--ê：Tsín改造物種（Genetic Modified Organism, GMO）。Tsín改造物種ê目的主要是beh hō͘種作ê mi̍h m̄驚各種天災蟲害，hō͘家畜kap雞鴨好io飼gâu生肉m̄驚tio̍h tse。
人ê四十六條DNA分子總加--起-來，叫做Tsī-lóng（Genome）。科學家想講透過設計DNA順次甚至影響規个 Tsī-lóng ê Tsín調控，可能ē得解決一寡目前無藥醫ê病症，mā ē得hō͘ tsit-má ê治療方式koh-khah好。Tse就是tsit-má上tshìng tng teh 發展ê精確醫學（precision medicine）；因為逐个人ê Tsī-lóng to無仝，愈針對個人體質來治療，效果愈顯明，所以精確醫學mā叫做個人醫學（personal medicine）。
過去beh創Tsín ê改造有tsiâⁿ濟技術上ê限制，最近tse幾冬新發展ê技術 - CRISPR-Cas9系統（clustered regularly interspaced short palindromic repeats-Cas9 system）hō͘改造Tsín ê流程變kah簡單koh快速，而且tu̍h破限制ē得一擺就改造規个 Tsī-lóng。舊年（2014）美國ê一个研究團隊發表成果 - in利用CRISPR-Cas9 kā無正常ê Tsín改做正常--ê，成功治療有Thài-lo̍͘h-sīn血症（Tyrosinemia）ê niáu鼠，in相信未來像án-ne ê方式mā ē-tàng用來治療人類Tsín ê疾病。
DNA／Tsín／Tsī-lóng（第三圖）是通世界ê活mi̍h上大ê祕密，經過半世紀超過ê時間，lán總算tuì伊有khah濟了解。Tsit款科學智識kap技術ê進展hō͘ lán真濟好處，m̄-koh mā 紮來危機。改造Tsī-lóng ê技術若是使用tī人ê有形卵頂頭，將來出世ê囡仔一世人to受改造--過ê Tsín來影響；tsit款技術若是使用tī人ê生殖細胞（germline）頂頭，代代世世ê囝孫lóng ē受影響。雖bóng講改造Tsī-lóng ē得用來治療一寡病症，m̄-koh，lán對Tsī-lóng kap hia病症ê瞭解lóng iáu未透底，致使lán oh評估án-ne做ê風險kap好處。CRISPR-Cas9系統ê發展hō͘ Tsī-lóng改造ê khang-khuè愈來愈輕可，tsit-má lán就應該頂真面對tsit款技術發展對社會、法律、道德、倫理ê衝擊 - tsia-ê 重要--ê lán tiāⁿ-tiāⁿ ē làu-kau--去，因為台灣人一向siuⁿ過對重技術ê效率kap成果，「tsiâⁿ人」ê因素ká-ná拍無--去。
✏ 作者是德國Köln大學發育生物學（Entwicklungsbiologie）研究所自然科學博士
■參考資料：
Baltimore, D., Berg, P., Botchan, M., Carroll, D., Charo, R. A., Church, G., et al. (2015). Biotechnology. A prudent path forward for genomic engineering and germline gene modification. Science, 348(6230), 36–38.
Campbell, A.M., Heyer, L.J. (2006) Discovering Genomics, Proteomics and Bioinformatics (2nd Edition). San Francisco [etc.] : Benjamin Cummings.
Ran, F. A., Hsu, P. D., Wright, J., Agarwala, V., Scott, D. A., & Zhang, F. (2013). Genome engineering using the CRISPR-Cas9 system. Nature Protocols, 8(11), 2281–2308.
Yin, H., Xue, W., Chen, S., Bogorad, R. L., Benedetti, E., Grompe, M., et al. (2014). Genome editing with Cas9 in adult mice corrects a disease mutation and phenotype. Nature Biotechnology, 32(6), 551–553. doi:10.1038／nbt.2884
