 |
| （圖片來源:保育類野生動物收容中心 沙林生命教育館 08-7740414 912屏東縣內埔鄉學府路1號http://ptrc.npust.edu.tw/default1.asp） |
新曆8--月是舊曆ê 7--月，有tsiânn濟節日tī tsit個月。除了中元普渡以外，m̄知逐家厝內kám有拄仔好滿16歲ê囡仔？舊曆7月初7，是囡仔ê保護神──七娘媽ê生日；若是有囡仔平安大漢到16歲，tsit工就ài「做十六歲」，感恩七娘媽有保庇囡仔。Tsit工m̄-nā是七娘媽ê生日，mā是伊kap伊ê愛人相會ê日子。另外一个民間傳說，是講七娘媽就是織女，是天帝ê第七个查某囝，因為愛著凡間男子，就hōo in阿爸處分，一年只有tsit工ē-tàng見面。
所以七娘媽生tsit工，時常lóng ē落雨，是因為織女看著翁婿牛郎，tsiânn濟思念kap m̄甘，就án-ne háu出聲--來，目屎ná像雨。Tse傳說，mā是有teh批評講，序大人若是為著囝兒孫仔操煩siunn濟，mā m̄是一項好代誌；「兒孫自有兒孫福」，hōo少年人家己有自由意愛ê空間，序大人mài插手、尊重祝福就好。
講tsiah濟，是kap lán台灣ê啥mih動物有關係--leh？可能有人ē臆是「客鳥」，因為牛郎織女ē-tàng相會，就是因為客鳥做橋，hōo in兩个ē-tàng行過天河。但是tsit个專欄，是專門beh介紹台灣特殊ê動物，kap分享一寡生物ê智識，所以按做十六歲ê成年禮講起，tsit個月beh講--ê是「黃葉猫」（n̂g-hio̍h-bâ）。
先ài注意──「貓」（niau）m̄是「猫」（bâ），雖然漢字tī-teh華語內底是通用--ê，但是按潘科元老師ê講法，就是「台語太豐富--leh，只好將本來仝一字ê無仝寫法，提來分用」。6月份ê時tsūn，tī tsit个專欄有講著「棕蓑猫」；台灣有一寡動物lóng號做「猫」：果子猫、臭羶猫、竹筒猫、黃葉猫...。以前台灣ê先輩看著in lóng siāng形，用現在ê生物分類智識來看，就是khah細隻ê肉食動物，除了lán人khah熟sāi ê貓仔kap狗仔以外，其他ē掠細隻動物，像鳥鼠hit款ê動物--ê，差不多就是「猫」。像講棕簑猫是「獴科」，果子猫kap黃葉猫是「靈貓科」，羌仔虎kap臭羶猫是「貂科」，tsia--ê lóng是「食肉目」下跤ê分類。頂個月介紹ê熊仔，mā是「食肉目」下跤ê動物，但是tī-teh分類內底，伊kap狗仔khah近。簡單來講，貓仔類ê親tsiânn主要是食肉，喙齒數量khah尖kap khah濟；狗仔是食臊以外，mā ē-tàng食菜。
台語講著「黃葉猫」，其實無法度確定是『黃鼠狼』iah是『麝香貓』。Tsit兩種動物，看--起-來lóng是黃色為主，但是ē-tàng koh問一句：Tsit个「黃葉猫」kám是「竹筒猫」？若是，tse就是狗仔ê親tsiânn，鼬科貂屬，人講『黃鼠狼』ê『華南鼬鼠』；若是tsit个「黃葉猫」mā ē-tàng叫做是「tshit-á」，tse就是貓仔ê親tsiânn ——『麝香貓』--ah！
為啥mi̍h『麝香貓』ē有「tshit-á」tsit種叫法--leh？有幾種可能性：講tse「黃葉猫」ê身軀，除了塗黃ê毛以外，koh有暗塗色、烏色ê斑紋，tī-teh in kha-tsiah-phiann是一條一條--ê，若是來到尾溜就是一節一節--ê，華語有人是叫 in『九節貓』。若是講「tshit-á」ê發音親像「七仔」，有可能是講著in tse身軀特色。另外一種講法，就是『麝香貓』in 身軀ē發出特殊ê芳味，hōo以前ê台灣先輩認為──ká-ná查某囡仔噴芳水，所以對in khah親切ê叫法，就是「tshit-á」。
潘科元老師是推論講：女朋友有tsit个「tshit-á」，就是按「黃葉猫」來--ê！「俚語有用bâ-á稱呼無正經ê女性，寫做媌仔。」「也有「反比喻」ê可能性，就是本來是用動物「猫」來比喻人，tī tsia是顛倒píng，用對人ê俚語稱呼來叫動物。」
以上幾種講法lóng有通，m̄知逐家認為佗一个khah趣味--leh？無論按怎，「tshit-á」tī-teh lán台灣ê保育分類內底，是二級ê保育類動物。因為「黃葉猫／tshit-á」ê皮毛真khiū軟，是毛筆ê原料，加上in身軀有生產芳味ê腺體，就有人ē做歹生理，掠in來提煉腺體，騙無知ê人講tse就是「麝香」，趁tse烏心錢。Tse lóng是「黃葉猫／tshit-á」tī台灣生活ài面對ê威脅。
另外就是in需要來食鳥鼠、蛇、雞鴨來顧腹肚，但是lán人有時ē用藥仔來thāu鳥鼠，in mā ē受著影響。Tse lóng是有方法來解決--ê；以前有tī tsit个專欄介紹過「鷹仔紅豆」、「石虎雞卵」，有興趣ê人ē-tàng去揣來看。「黃葉猫／ tshit-á」本底生活tī竹林、草原、河口，kap lán人類活動ê空間有tsiânn濟重疊；in主要是暗時活動，現此時若是想beh看著in，ài到千外公尺ê山區國家公園tsiah有機會，陽明山、雪霸、太魯閣、玉山……等等幾个國家公園，lóng有觀察紀錄。
8--月ê專欄主題是「黃葉猫」，主要是按頭前開始ê節日，講著「成年禮」kap「自由戀愛」ê主題，牽來介紹講「黃葉猫」有兩種，叫做「tshit-á」--ê tsiah是lán beh介紹ê主角。但是無論是交往ê對象，iah是tsit種台灣特有亞種ê貓仔類動物，lóng ài好好仔來熟sāi kap保護tsiah tio̍h啊！
（作者是台灣綠黨中央執行委員）
（作者是台灣綠黨中央執行委員）
#台灣動物記事 專欄，本文使用教育部推薦漢字kap臺灣閩南語羅馬字拼音方案。
台文通訊BONG報305期，2019年8月出刊。
歡迎捐款贊助 #李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
有固定的長期捐款， 讓更多的台語文相關計畫可以穩定的推行，感謝逐家。
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
