青春夢──日本時代阿公阿媽ê戀愛故事

作者:張翠硯

4--月ê台語sa攏有講座邀請著台北科技大學文化事業發展系ê鄭麗玲教授來主講。鄭教授是師大出身ê歷史博士,主要研究「日本時代ê台灣史」。講座除了探討阿公阿媽ê年代男女戀愛ê故事,mā講著hit个時代ê女性,因為ē-tàng受教育,tsiah hōo女性ê社會地位ē-tàng提昇。




藝旦kap女給(lú-kip)


1880年代,王香禪是hit个時代tī台北大稻埕「永樂座」tsiok出名ê藝旦(iah是日本人講ê『花魁』)。電影《最好的時光》內底舒淇演--ê就是王香禪。Hit-tang-tsūn ê藝旦是「色藝雙全」,就ài ē-hiáu 彈南管koh 吟漢詩。除了王香禪,李香蘭mā是仝年代ē-hiáu 演koh ē-hiáu 唱ê 紅牌女星。

連雅堂主辦ê《風月報》ná像lán今仔日ê《蘋果日報》,ē票選上suí ê藝旦ia̍h女給是啥人。除了藝旦以外,女給是tī咖啡廳服務ê美女,in 主要ê 人客是高校生以上ê大學生,in kap 藝旦無仝,就ài 知影真濟現代流行ê 新消息,一个人ài看tsiok濟本雜誌,kap 人客討論上 時行ê 歌曲iah是電影,tsiah有才調吸引人客、受歡迎。

受教育ê現代女性


「馬偕夫人」張聰明


伊是對hit當時ê教育真有貢獻ê關鍵人物。伊ē-sái講是第一个受教育ê查某人,koh因為sì-kè tuè翁婿馬偕牧師去傳教,ē-tàng受西方教育。In兩人做伙創辦「女學校」,培養koh-khah濟傳教師,hōo傳教ê版圖湠koh-khah遠--去。Hit時ê查某囡仔mā因為受教育,tsiah開始有一寡男女之間ê接觸。

日本時代ê學校內底lóng ē囥日本思想家「二宮尊德」ê銅像,男女學生逐家lóng真ài kap伊hip相,經過ê時,koh ài liù帽仔kā伊行禮。Tuì資料相片內底,ē-tàng看出查某囡仔ê穿插kap pose lóng真有自信,姊妹仔伴tī hip相館mā ē輪流扮男iah是扮女,ná像leh 辦公伙仔。

楊𤆬治


伊是日本時代「第三高女」頭一个台灣老師,教查某囡仔家政方面ê技術。伊kap翁婿吳鴻麒是講親tsiânn熟sāi --ê,根據古早ê資料來看,hit-tsūn ê查某囡仔 ē-sái  tī sio對看ê時,提出伊感覺適合ê查埔囡仔ài有啥條件。表示女性ê戀愛自由kap 自主權,lóng 有真大ê 進步。

18公分 kap社團ê男女交流


相對來講,學生之間ê 意愛iáu是受著真濟約束。Hit-tsūn ê學生下課了後若beh出門,mā hông規定ài穿制服。鄭教授tī做研究訪談ê過程bat有當時ê女學生kap伊分享講,「有一工tī校外kap一个查埔囡仔講話,隔tńg工就hōo學校叫去問話」,學生女講「冤枉喔,guán兩个講話有離18公分neh」。自hit-tsūn開始「18公分」變做「不良行為」ê 代稱。若有人違反男女接觸ê規定,就ē hông 講「in he 18公分--lah」。

Tī學校,男女之間ê接觸拄著真濟限制,m̄-koh, 另外一个男女交流ê機會就是社團。Bat有學校老師家己ê查某囝,因為kap仝一个學校ê查埔囡仔約會,去hōo 學校掠--著,hông 禁學處罰,hōo做老師ê老爸真無面子。學生mā ē-sái 參加電影社團,m̄-koh 就有老師ē提出 tsiânn譀古ê 建議,比喻講,電影院ē-sái mài hiah 暗--無?查埔kap查某ē-sái 分開坐--無?Tsia-ê 要求lán tsit-má 看--起-來,實在lóng無啥道理。

教育tuì 女性ê影響


以早ê年代,男女大部份lóng是講親tsiânn結婚,也 ē-sái講「學歷就是嫁妝」。M̄-koh,時代漸漸進步了後,女性無認同一出業就嫁翁是好代誌,希望家己ē-tàng 對交往ê對象有khah深刻ê了解。

受教育ê女性因為bat字,開始做khang-khuè 趁錢。有真濟人去做車掌小姐。查埔--ê 若想beh kap車掌小姐約會就ē約一陣人做伙去咖啡廳。

仝姓bē-sái結婚


Tī  hit-tang-tsūn ê社會,仝姓ê人beh結婚是tsiânn嚴重ê禁忌,像作家鍾理和就是一个例,m̄-koh in 兩人上尾mā是有結婚。Tse mā bat是伊寫作ê主題。比較--起-來,像馬偕kap張聰明 ê師生戀,iáu是別个因為無愛相親ê對象,甘願beh kap 陪嫁sio tshuā走ê查某囡仔,甚至是同性戀ê 故事,ná 像lóng是真平常ê 代誌。對tsia-ê實例來看,lán ē-tàng看出社會對女性選擇婚姻ê自由,態度mā愈來愈開放。

問答時間


講座上尾ê問答時間,有聽眾問著日本時代禁止台語ê情形,鄭教授講,「hit-tsūn日本政府無愛你講台語,台語歌mā去hông 改做日語,甚至改編做軍歌。Tī皇民化ê時代,政府希望所有ê 人lóng 講日語」。

(本文是2019年4月初10 台語sa攏有ê講座摘要記錄)
台語sa攏有講座專欄,本文使用教育部推薦漢字kap臺灣閩南語羅馬字拼音方案
台文通訊BONG報302期,2019年5月出刊。

--------------------------------------------
歡迎捐款贊助 李江却台語文教基金會 (捐款thang抵稅,匯款了後請通知02-23112199)
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
有固定的長期捐款, 讓更多的台語文相關計畫可以穩定的推行,感謝逐家。


郵政劃撥:19021486
戶名:財團法人李江却台語文教基金會
電匯:123-20-050514-2
華南銀行士林分行活儲
戶名:財團法人李江却台語文教基金會

李江却台語文教基金會需要你ê定期捐款,逐個月捐助NT$200以上,lán做伙來推動復振台灣語文ê事工,歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會(台文通訊BONG報發行單位)NT$200(iah是逐冬NT$2,400)以上,做伙支持基金會事工kap雜誌編印發行費用。歡迎利用郵局劃撥、信用卡(寫捐款單)、線頂捐款、現金贊助、銀行/ATM轉帳(轉帳了後請通知)、支票、郵局戶頭自動轉帳扣繳(寫授權書),捐款收據ē-tàng做『列舉扣除額』抵稅ê用途。