（本文是2019年7月初3 ê講座摘要記錄，主講者是中央研究院台灣史研究所副研究員）
歷史是過去一代koh一代人ê生活記持累積--起-來--ê，lán透過某人所流傳--落-來ê文獻想像過去ê情境，其中大部份是文字記錄。Tī-leh做歷史研究ê時，語言是真重要ê工具，透過語言來解sueh時代ê變遷。Iáu-m̄-koh，一種語言代表一種思考方式，使用啥mih語言ē tshuā lán看著無仝角度ê歷史故事，án-ne台語又koh tī當中扮演啥mih款ê角色--leh？
Tsit擺台語sa攏有邀請翁佳音老師，來分享研究台灣史ê過程中，台語tsiânn做啥款ê工具，是按怎必要？若是順頭前段來講，「一種語言是一種思考方式」tsit句話說明語言並m̄是kan-na用來講話，使用仝語言代表仝一陣人ê生活經驗，kap啥mi̍h有關係、需要用--著，tsiah ē tsia̍p用啥款ê語詞，時間一下久tsia-ê經驗就累積做lán所講ê「文化」。台灣經歷真濟政權，荷蘭、鄭成功、清朝kap日本，到離tsit-má上近ê國民黨政府，雖bóng逐个政權使用ê語言lóng無仝，台灣人一直lóng有家己溝通ê工具，尤其台語做一个大部份人使用ê語言，tī台灣起起落落ê歷史上，參與tsit塊土地ê大細項代誌。
翁老師tuì「兩款語言對仝一个字ê解sueh ē有無仝」ê現象開始講起，譬喻講「厝」tsit个字，tī台語內面代表「厝內、一間厝」ê意思，也就是hōo人有歸屬感ê所在，m̄-koh tī-leh華語內底，tsit个「厝」是人若過身ài囥tī「厝」，tsit个時tsūn厝就kap台語ê厝意義顛倒píng，tuì tsia開始，lán ē-tàng發現因為生活經驗、文化、歷史演變ê差別，致使語言ê內涵完全無仝。平平lóng使用漢字，簡單一个字就ē呈現每一个社會ê面路仔。
另外翁老師分享「討契兄」ê由來，mā有影趣味。Tsit-má lán若講著討契兄頭殼內隨想--著--ê是啥款ê畫面？通常ē想著查某人討契兄，事實上，tī古早時代，討契兄是查埔人ê專利。海賊出外討海，船頂bē-tàng有查某人，雖bóng逐家tī故鄉已經娶某，suah因為tī海上ài互相照顧，決定結拜「討契兄」，討契兄表示有兄弟大細漢ê分別，通常上細漢ê「貓仔精」是逐个阿兄上kài疼惜ê小弟，koh ài陪哥哥睏iah是tshit-thô。清朝古冊mā有記錄著「閩南人重男性」，lán tiānn-tiānn聽--著ê鄭芝龍就有18个哥哥，可見討契兄tsit个詞kap hit个時代ê海賊文化有密切ê關係。Tsit个故事提出看待歷史ê重要性，有真濟台語詞流傳到tann，lán tsia̍p leh使用，suah kā in當做理所當然。一个語詞背後代表一段歷史，甚至ē-tàng看著政治、文化ê變遷，討契兄就是tsiânn好ê例，jiok tńg去揣歷史ê源頭，除了發現討契兄ê文化緣起，mā hōo lán了解台灣kap各國ê關係，koh-khah趣味--ê是知影「討契兄」ài按怎寫做台文！
現在ê研究者基本上用華語來研究歷史，但是華語是到國民黨來台灣了後tsiah tsiânn做優勢語言，所以用華語來解sueh歷史，就ē有真濟tîng-tânn iah是làu-kau ê情形，翁老師舉一个日本時代警察教科書ê例，冊內底寫著「廟番婆」，有一寡研究者可能ē解sueh做「tī廟--裡ê原住民」，m̄-koh tuì日本字來看，「番」有次序、輪流ê意思，所以廟番婆只是leh講顧廟ê女性niā-niā，原住民ê「huan」寫做「蕃」，是為著beh kap「番」做區別。若是lán看著漢字就用華語來思考，就ē解sueh錯誤，mā無法度接近歷史。
Tī台灣，lán經歷無仝政權，各種文化互相透lām，tuì語言來看上kài明，lán講ê「柑仔蜜」tī菲律賓有tsiânn sio-siāng ê講法；飯桌頂tiānn出現ê高麗菜m̄是tuì韓國來--ê，其實tī荷蘭時代就有--ah，而且高麗菜ê荷蘭文就是「kool」，koh有一thoo-lá-khuh ê語詞是kap無仝語言混合，若是kan-na用華語思考，根本無法度解sueh。
打狗m̄是唸「tá-káu」，tuì荷蘭文獻來看ài唸「tá-kóo」，因為tuì鼓山tshiâng--落-來ê水親像「鼓leh tân」，地名就號做「tân-kóo」；苗栗ê「苗」古字是「猫（bâ）」、民雄ê古名是「打猫」，後--來華語猫、貓不分tsiah變做「苗栗、打貓」；iáu-koh有麻豆（Muâ-tāu）應當是「ma-tau」，tī荷蘭時代留--落-來ê文獻--裡是碼頭ê意思，表示hit-tang-tsūn碼頭mā唸做「má-thâu」。翁老師舉tsiah濟例是beh講台灣歷史kap語言有真重要ê關係，但是語言學界kap歷史學界suah無合作，各人做各人ê研究，làu-kau--去ê歷史就假做無看--著，研究有錯誤mā準拄煞，致使台語一直無法度tsiânn做一个研究ê工具，mā漸漸hōo lán放bē記。
翁老師tī-leh上尾不斷強調歷史研究只要堅持一个原則，he就是「面對歷史，ài用gōng人ê方式」。意思是講做研究ê時tsūn，直接去想hit段歷史ê背景之下，ē拄著啥mih人、講啥mih話，尤其是一般ê百姓是按怎生活？M̄免啥mih理論kap困難ê方法，kā家己tàn到hit个時代，上gōng ê方式ē-tàng得著koh-khah趣味ê結果，tī tsit个過程當中ē發現台語橫過歷史，伊就是台灣歷史ê見證者，lán ài好好保留tsia-ê珍貴資源，用台語ê角度繼續研究tsit塊土地ê歷史。
#台語sa攏有講座專欄，本文使用教育部推薦漢字kap臺灣閩南語羅馬字拼音方案。
台文通訊BONG報305期，2019年8月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
