作者：趙善權
Lán府城台南總共有22个國定古蹟，是全國逐所在上濟--ê；其中有一tah我tsit-má beh講hōo逐家了解、siânn逐家來tsia行行se̍h-se̍h--leh，伊就是「國定古蹟台南地方法院」1。伊徛tī台南市府前路一段hām永福路二段ê uat角，對面是新起ê台南市美術館。國定古蹟台南地方法院有啥mih特色值得參觀？Tī tsia我按算uì「歷史演進」講起，tsiah-koh紹介「建築特色」，分做兩大部份講hōo lín知。
首先是歷史演進ê部份。現此時tī台南市健康路尾、beh倚安平港ê所在，有兩棟起kah tsiânn氣派ê建築，差不多有十層樓kuân，一棟是台南地檢署，另外一棟是第三代ê台南地方法院。啊有第三代，就有第一代、第二代ê台南地方法院，in tī佗位--leh？Tse就ài koh uì頭講起，台灣有「法院」，是日本人tī 1895年開始統治台灣，就頒佈〈台灣總督府法院條例〉，隔冬就tī台北、台中、台南成立法院。
Hit當時，日本政府徵收清國ê台灣縣學kap萬壽宮兩位設台南第一代法院ê廳舍。後--來漸漸無夠使用，1912年開始起造新ê法院，由日本建築師森山松之助設計，1914年落成開始使用，也就是第二代台南地方法院。原來ê台灣縣學kap萬壽宮，就拆掉tsiânn做法院院長宿舍。
第二代法院一直使用到1990年，又koh感覺無夠使用，當時想beh拆掉重起；好佳哉有一群熱心ê人出來抗議成功，就保留--落-來，1991年tsiah hông指定做國定古蹟。Thìng候第三代新ê廳舍tī 2001年起好，台南地方法院就徙--過--去。保留--落-來ê古蹟地方法院就規个封--起-來，一直到2013年tsiah開始翻修，三冬後翻修好勢，2016年11月初8重新開放到tann。
Suà--來是建築特色ê部份。日本人tī台灣50年ê期間，uì北到南起造tsiok濟官方hām公共建築物。國定古蹟台南地方法院建築特色，tī tsiah濟日本建築內底thang排tī前三坎，非常無簡單，ē-tàng kap現此時ê總統府hām台灣博物館sio比phīng，因為伊是日本時代留--落-來、唯一大型ê地方法院建築物。
Koh-khah大ê特色是，伊ê外觀正面有兩个入口，東爿入口頂kuân有一座低低闊闊ê圓形厝頂，外面有包一沿紅銅，不止仔好看；西爿入口頂kuân有一座kuân-kuân瘦瘦ê高塔，一个kuân一个低形成一種無sio-thīn ê狀況。Tse是真罕見，lán所看--著ê公共建築物大多數lóng是倒爿、正爿ê建築空間以中ng為準兩爿sio-thīn。
Kài可惜--ê是，tī 1970年hit跤兜，高塔因為有裂--開、ē漏水、本身koh小可khi-khi，上重要是hit當時iáu無古蹟維護ê觀念，hông判定是危樓suah來拆掉--去。雖然án-ne，伊猶原有tsiok濟值得欣賞ê所在。建築師森山松之助tsiânn用心設計，伊ê外觀融合西方ê各種建築元素，ē-sái講是一種西洋歷史樣式建築，有希臘式ê壁堵kap大枝柱仔、羅馬式ê拱型門窗，koh有巴洛克風格ê圓厝頂hām法國式馬薩厝頂。
另外，有關古蹟地方法院iáu有tsiok濟其他ê特色，tī tsia我講幾个仔kā逐家分享。
第一，是倚東爿ê入口門廊，早期是法院官員tsiah ē-tàng出入，一般民眾ài uì西爿入口出入。因為有tsit種差別，東爿設計kah tsiânn精巧——頭前有八枝妝thānn kah tsiok suí ê大枝柱仔，天pông mā有特殊ê幾何圖樣，beh入去大門進前koh有一个門罩，頂kuân有日本大正天皇勳章ê樣，值得注目斟酌看。西爿入口門廊ê設計就ke khah簡單，無論是壁堵、柱仔形、天pông，真明顯就看ē出--來。
第二，是有夠suí ê大廳，頂kuân是圓形厝頂，外口ê光線ē uì玻璃thàng--入-來，hōo人產生一種神聖莊嚴ê感覺；頂kuân ê花草mā造作kah幼路koh suí，逐个人入--來看--著，手機提--leh lóng hip bē煞。
第三，是兩排辦公室中ng走廊頂kuân有四个長篙形ê「通光井」，內底有裝玻璃，日頭光ē-tàng uì厝頂反射--落-來，tse是百幾冬前就想--著ê綠能環保觀念。
第四，是tī馬薩厝頂頂kuân有一个通道叫做「貓仔道」，pat聽--過--無？逐日下早10點hām下晡3點ē開放十个人起去參觀。提醒--一-下，假日時tsūn是tsiânn搶市，ài提早來排隊。臆看māi，伊kám有啥mih款用途？（提示：ē-tàng去監察院ê網站揣著答案）
第五，是日本時代lóng總有六个法庭，其中值得參觀--ê是第二、三、四法庭。第二法庭是所有法庭上suí--ê，內底有各種法院kap制度ê說明，mā有日本時代kap tsit-má各種身份ê人所穿ê法袍紹介。第三法庭是上大間--ê，就是因為án-ne，有一層歷史事件pat tī tsia發生——1915年台灣人tī日本時代頭一kái利用宗教來抗日，mā是最後一kái武裝抗日，就是噍吧哖事件，也叫做西來庵hām余清芳事件。尾--à失敗了後，tshuā頭ê余清芳就徛tī tsit个法庭被判死刑，濟濟參與ê群眾lóng tī tsia受判刑。第四法庭tsit-má叫做「模擬法庭」，完全hām目前正式法庭ê佈置sio仝，kài味--ê就是tsia有囥各種法袍，ē-tàng試穿koh ē-sái hip相做記念。
最後，歡迎逐家有閒來tsia行行se̍h-se̍h--leh，感受百年古蹟又koh pat是法院ê想像。
1.作者註：若tī網路拍「司法博物館」關鍵詞去揣，mā是仝所在，伊內底確實有影有tsiok濟有關「司法」ê展覽，但是司法院到tann並無正式編制講伊是「司法博物館」；國定古蹟台南地方法院是屬tī司法院--ê，進一步來講就是司法院ê下跤單位台南地方法院leh管理。
