作者：王雅玲 （作者是國校台語老師，偏名「王梨老師」）
第一屆「全國台語政策民間會議」是由台語政策推動聯盟（包含台灣公民參與協會、台灣台語路協會、國立臺灣師範大學台灣語文學系、李江却台語文教基金會、 台北市台灣語協會等單位）tī 2024/12/22舉辦ê活動。
12月22禮拜tsit工，天氣tsiânn寒，我透早就peh起來坐車去師大開會。到位ê時，看著古錐ê囡仔leh練跳舞，koh笑bi-bi kā我ia̍t手，哈哈。而且報到hia真濟人行--倚-去，看著心內真歡喜。
起鼓ê時，文化部李政務次長hām教育部終身教育司司長tsiūnn台講話。司長講啥我差不多bē記得了了--ah，我kan-na想beh kā伊問：「課本tang時beh改做 “台語”？」；文化部政務次長講in為著beh tshui-sak「台語家庭」，錢kah人lóng tshuân好，22个縣市suah無到一半beh tàu-sio-thīn，beh哪ē án-ne--leh？問題就是中央kah地方，台語lóng無一个專責單位，莫怪無人beh tshap。
Koh來，是民意代表。陳培瑜立委講伊本身1976年出世，細漢bat為著講台語hōo老師罰洗喙，做立委了後見擺替台語出聲，就有一大堆客人khà電話來kā伊lé；tsia-ê客人m̄是普通ê客人，是有政治目的--ê。新北市議員黃淑君講伊是1989年出世ê台南人，uân-á真關心台語ê代誌，tsit站仔按算beh tī新北市成立台語相關ê委員會，m̄-koh，需要台語團體具體kā in講成立了後ài做啥；伊講，政府無tsiah gâu，lán人民ài直接hōo政府知影in應該ài做啥。
Suà--落-來是向陽老師ê演說，伊親像一位台語紳士kā逐家講出「台語光榮感」ê重要性，mā講起現此時台語教育政策真濟所在做了無夠ê問題。
接suà是許慧如教授ê演講，tse是上kài精彩ê一段，所有ê人bē輸拍開新ê眼界。許教授一刀見肉kā台語tsit-má面對ê四个問題展現出來hōo逐家去思考：
1.本土語地位無實質提升
對108課綱來講，「國語」就是華語，英語就是英語，啊本土語--leh？內底包括40種以上ê語言，甚至有新住民ê語言tī內底，án-ne包包做一伙，一禮拜kan-na一節課niā-niā。
2.本土語tī形式上平等，忽略台語ê通用語地位
自本台語tī台灣就有八成ê人口，2020年ê調查，規个台灣mā iáu有80% ê人ē-hiáu講台語。M̄-koh，tann台語suah歸tī「本土語」內底，縛跤縛手。Lán應該ài hōo台語恢復伊「共通語」ê地位，sì-kè lóng ài有台語、台文，án-ne tsiah tio̍h！
3.無釐清復振kah推廣tsit兩个觀念
復振：恢復，就像物種復育，語言也有「棲地」。推廣：新事物／觀念普及。Tsit-má lán leh拍拚ê台語運動應當是復振，kā本來ê棲地恢復tsiah tio̍h，所以lán m̄是leh推廣台語，lán ài kā講台語ê台灣人叫hōo精神！
4.Siunn過強調文化kah傳承，顛倒hōo本土語言脫離日常生活
Tsit-má ê教育，lóng kan-na強調台語有偌suí、專工辦課程來學台語。Tse是『育、樂』ê部份。M̄-koh，lán若想beh hōo台語活--起-來，應該ài hōo台語自然出現tī『食、衣、住、行』內底。台語bē-sái kan-na叫教育部hām文化部去做，內政部mā應該ài做，生活中無論是做啥，lóng ài有法度講台語、看台文。
QA時間，我印象上深--ê是一个17歲ê少年家，伊認為復振台語ê時，應該ài hōo客人、原住民了解，台語徛--起-來對in是好--ê、有利益--ê。Tsit點真重要，希望客人hām原住民ē-tàng了解，講台語ê台灣人一直lóng真支持--in，lán tio̍h-ài互相支持，向真正ê霸權「華語」爭取平等tsiah tio̍h。
早起場beh結束進前，陳培瑜立委誠心拜託逐个tio̍h-ài骨力khà電話hōo「文化部、國發會、民進黨中央黨部」，hōo in聽著關心台語ê人ê心聲。Lán台灣人就是siunn過古意，別人一直khà電話、一直吵，連賴清德總統to叫是逐家khah愛英語，無愛台語。
當然，mā ē-tàng khà hōo國民黨、民眾黨兩黨，hōo in壓力，聽講2024/12/30 beh審文化部預算，in ē針對台語ê預算去刁難，而且in認為108課綱hōo學生siunn濟「公民思想」，想beh全部改掉，實在是……。
下晡我參加第三組ê分組論壇，主題是『從孩子出發的台語保育政策——家庭、學校、社會的台語政策困境』。聽著Catalan語（『加泰隆尼亞語』）復振ê例，lán台語ê狀況比in koh-khah困難，因為in ê人民是kā講Catalan語當做是真光榮ê代誌，台灣人ē án-ne想--ê m̄知有偌濟？甚至koh ē去恥笑講台語ê人。論壇主持人董力玄（台灣台語路協會理事長）m̄-tsiah ē講，有「語言意識」比「語言能力」koh-khah重要！
張雅琳立委有來現場，伊講出真濟重要ê問題：
1.台語課ê目標是啥mi̍h？
2.文化部beh辦「台語家庭認證」，有啥mih「誘因」？
3.台語園區若是用美學館做據點，內底kám有台語、台文？
4.國科會有關台語ê科普、字典更新，kám有夠？
5.文化部ài繼續做囡仔歌、電影、電視劇等等，台語bē-tàng kan-na tī厝內講，ài看ē著、聽ē著，對伊tsiah有認同感。
後--來我去kā雅琳講，台語八點檔有真濟置入性行銷，lán kám ē-tàng要求文化部去補助八點檔，kā語言意識囥tī內底？Tsit-má顛倒內底有囡仔ê角色就講華語、叫名lóng叫華語，tse對台語ê復振真不利。
上尾，是台北市議員苗博雅（阿苗），伊tsiok認真聽在場每一个人講話，伊講，台語tsiânn做共通語對伊來講是新ê概念，m̄-koh，地區beh按怎分tsiah bē有糾紛，是tsiok需要溝通ê部份。
Koh來，辦台語學校進前，有兩步ē khah緊：
1.實驗教育：Tse對家長來講是tsiok大ê成本。
2.中央允准各級學校成立語言專班：Tse tio̍h-ài有法源來支持，無，ē去違背著「常態編班」ê原則。
QA時間，我攑手講：「其實有bē少『隱藏版』ê台語家庭，lóng ē先看--一-下tsiah決定報名，所以希望若有語言專班，ta̋nn開始戶tīng mài siunn kuân。」
另外一个阿母講：「希望博物館、美術館等等，標示ài有台文。」（Tsit-má是極ke有台語導覽就阿彌陀佛--ah！）
Koh來，一个阿母āinn一个細漢--ê，手koh牽一个大漢--ê，攑手講著in囡仔tī學校hōo導師講『要講台語回去跟你媽媽講啦！』tsit款話。阿苗講，伊希望ē-tàng替in出面處理tsit款語言無平等ê問題。
會後我去揣阿苗，我問伊，lán拄著「性別不平等」有「性平會」來處理，是按怎拄著「語言不平等」suah無「語平會」？阿苗講，就是因為『於法無據』。《國家語言發展法》kan-na是制定觀念，並無具體罰則，mā無具體要求啥mih人tio̍h-ài上啥mih課，tsit个部份有影是一个問題。
小組討論結束了後，tńg去大場--ê，lóng無人提早走，逐家對台語有影是tsiânn關心、tsiânn煩惱。阮逐家有約束，後一改開會進前，ài先為著台語tsiūnn街頭！Hōo政府聽著lán台灣人ê心聲，我真贊成！
