主講／陳俊宏
記錄／張翠硯
話頭
12--月ê salon講座邀請「國家人權博物館」ê陳俊宏館長，來kap lán分享in tng-leh拍拚實踐ê「轉型正義」khang-khuè到底是leh做啥mi̍h？Tsia-ê任務koh應該按怎透過藝術hōo一般民眾koh-khah了解、重視歷史--leh？
紹介「轉型正義」kap「促轉會」
陳館長tī講座一開始先說明「轉型正義」ê意涵，簡單講就是，tī一个國家民主化了後，beh按怎來面對、處理hit寡過去因為政府「威權統治」，造成真濟違背人權ê代誌、kap真濟性命ê犧牲。轉型正義是每一个民主國家lóng ài經歷ê過程。伊ē-tàng分做四部份。第一，查明歷史真相。第二，到底是啥人ài負責任？第三，對被害者應該按怎進行身、心兩方面ê補償？第四，為著mài hōo歷史悲劇koh再發生，制度應該按怎改變？轉型正義是「為著未來，lán ài面對過去」。
「促轉會」ê轉型正義khang-khuè有分幾个小組，其中「保存不義遺址」是想beh kā關押政治犯ê所在，變做進行人權教育ê場所。轉型正義有可能tī各種政治情形之下進行，可能是威權統治政府倒擔，像東、西德，mā有可能是新、舊統治者合作，像南非，koh有一種是威權統治政府並無倒擔，in iáu是掌握權力，tī in ê手--裡進行轉型正義，台灣就是tsit類。李登輝總統tī伊任內有進行被害者ê賠償。現此時ê政府，除了賠償mā進行被害者ê司法平反，kā in除罪。
陳館長講，轉型正義m̄是加害者kap被害者ê代誌niâ，是逐家lóng ài面對ê歷史，是文化反省運動。Lán應該ài有「對抗」獨裁者ê記持，m̄是kan-na有獨裁者ê記持。
博物館leh做ê轉型正義，用藝術來傳達議題
「講故事」其實是有治療效果--ê，tī你kā代誌講hōo別人聽ê過程，家己心肝內mā ē感覺khah好過。博物館mā ē邀請受難者本人kap家屬做伙來參與「人權教育」ê活動，kā故事講hōo逐家聽。
有一位tī南非接觸人權運動ê大法官bat kā陳館長講，南非人權運動上關鍵ê元素其實是藝術，比he海量ê紙本報告koh-khah重要。透過藝術ē-tàng創造對話、辯論ê空間。
音樂對受難者來講，mā是真重要ê記持元素，in tī監獄內底ē寫歌，beh hông審判ê時，mā ē kā獄友交代ài唱佗一條歌kā送，所以博物館ē辦音樂工作坊，請in來分享對in有深刻意義ê歌。除了音樂，「人權影展」是另外一个hōo議題接近民眾ê方式。博物館kā真濟kap議題相關ê電影買公共放送ê版權，若有學校想beh做人權教育課程，in就ē kā影片寄hōo學校做教材。博物館mā揣藝術家kap in合作，一擺四個月，藝術家ài先上課了解白色恐怖ê歷史背景tsiah thang開始創作。少年藝術家ê相關創作百百款，有桌頂遊戲，mā有leh講白色恐怖受難者故事ê繪本。
校園白色恐怖地圖計畫
博物館tī 2020年5月19解嚴紀念日tsit工，公佈校園白色恐怖地圖，統計全台灣有百幾个學校內底ê不義遺址，老師若有想beh hōo學生koh-khah了解家己學校ê歷史，博物館就tshiànn講師去kap老師合作上課。目前已經有十幾間學校kap in leh合作。合作初步是由博物館策畫展覽，hōo學校ê老師kap學生koh進一步了解歷史，tī合作ê過程當中，有學校m̄-nā舉辦歷史資料ê展覽niâ，tī了解koh-khah濟歷史真相了後，koh製作相關議題ê舞台劇來講故事、保存家己ê歷史。Tse對博物館來講，是tsiok大ê鼓勵。
囡仔mā是人權教育ê重點
博物館mā有規畫專工kā囡仔做導覽ê活動，等in熟sāi園區了後，換in來導覽別个囡仔，mā有囡仔bat策畫展覽邀請蔡總統來看。專門創作真濟囡仔齣ê「Lo-lí-á（『夾腳拖』）劇團」mā寫tsiok濟白色恐怖ê故事，hōo囡仔自細漢thang了解自由kap人權ê意義。
人權博物館m̄是kan-na講轉型正義、白色恐怖
陳館長講，伊知影iáu有真濟人權議題需要重視，像博物館就有kap「移工」議題ê專家合作，kā兩陣人箍做伙，按算2021年8--月beh辦「移工人權展覽」。Tī講座上尾有聽眾問館長對「語言轉型正義」ê看法，陳館長講，博物館有leh培訓台語、原住民語等等母語ê導覽人員，ǹg望ē-tàng沓沓仔tī博物館實踐各種語言ê平等權利。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
