主講／賴怡忠
記錄／蔡天享
本文是2021/1/13 ê講座摘要記錄，主講者賴怡忠是台灣智庫ê執行委員。
2021年1月13暗時，12度ê冷風sǹg-sǹg叫，台北市潮州街「禾一空間」演講場滿座，tse是lán台灣智庫執行委員賴怡忠先生所主講ê「新冷戰局勢下ê台灣」。
「冷戰時代」講--ê是tuì 1950年到1990年美國集團hām蘇聯集團leh對抗ê時期，tsit款東西兩方對抗結束了後，號做「後冷戰時代」，大約是1990年到2018年為止，煞尾就進到「新冷戰」ê階段。賴執行委員ê主題是beh來解sueh後冷戰時代是按怎ē行到新冷戰時代？新冷戰時代對台灣ê影響又koh是按怎樣？Lán beh如何tsiah ē-tàng理解新冷戰時代--裡台灣kap世界ê關係--leh？
國際上有一寡專家——譬論講美國國務卿Michael Pompeo ——認為世界已經進入新冷戰時代（A new kind of Cold War），有四項現象支持tsit款講法。
頭一項是美國對中國發起貿易戰爭，早前美國敢去tu̍h中國對台灣、西藏ê政策hām人權壓迫問題，m̄-koh bē tī經濟問題sio-jiáng，因為美國認定hām中國做生理是互相有錢thang趁。M̄-koh，幾若十冬過--ah，美國企業kap工場濟濟lóng徙去中國，致使美國人ê失業率hām美國對中國貿易逆差tsiâu tshìng kuân，人民對tsit款無公平ê競爭不滿，自2018年開始就提高中國貨出口到美國ê關稅。
第二項證據是中國制定「內循環」為主ê經濟策略，中國tī 2020年提出「第十四次五年經濟計畫」kap「未來十五年經濟前景」，kā以往30冬來重世界貿易hām出口ê策略，改換做以內銷為主，減少kiau世界ê連結。
第三，是中國開始對外國tshui-sak伊ê政治模式，伊有自信講伊ê政治體制比民主體制koh-khah好，譬論講有才調kā中國國內武漢肺炎sio湠確診ê人數控制kah比歐美國家koh-khah少。也用tsiânn濟資源來破壞民主體制，比論講，發佈假消息來影響台灣ê選舉、買收加拿大反對黨等等。
煞尾，是北京對民主國家軍事對抗ê強度hām頻率大大提升，舉例來講，kan-na 2020年hit年，中國tī釣魚台海域kap日本對抗ê數量就超過2010年到2019年hit 10冬加--起-來ê數量；另外，中國hām印度tī雙方交界ê山區發生衝突，中國兵拍死數十名ê印度軍人。
1950年韓戰爆發，冷戰開始，美國kap蘇聯對抗，tsiânn做自由世界集團對抗共產主義集團ê局勢。美國有北大西洋公約組織（NATO）國家ê支持，蘇聯有華沙公約組織sio-thīn，美蘇兩國ê經濟並無啥mih交流，蘇聯因為無法度負擔軍事支出，致使後--來tī 1990年解體。Hit當時美蘇並無正面衝突，所以kā叫做「冷戰」（1950～1990）。
1990年冷戰結束，進入後冷戰時代（1990～2018），蘇聯主動認輸，甚至認同美國反制Iraq（『伊拉克』）侵略Kuwait（『科威特』）。另外一方面，東西兩方對抗結束，各國普遍鼓勵中國加入全球化ê經濟體系，就算講1989年發生天安門大屠殺，國際上也無偌致意，中國勢力就án-ne愈來愈大；顛倒是俄羅斯hōo各國拒絕加入歐盟，北大西洋公約組織趁機會吸收原底是俄羅斯盟友ê東歐國家，引起俄羅斯ê不滿。另外一个問題是Iraq戰爭無解决，致使出現恐怖主義，Iran（『伊朗』）變做強勢。
2018年以來，進入新冷戰時代，美國tī「國家安全戰略」內面，明列中、俄是美國ê全球競爭者，批評美國過去40冬來對中國ê政策失敗，認為中國m̄是負責任ê國家。國務卿Pompeo tī 2020年ê時也講美國hām中國是tī-leh新冷戰，雙方m̄是勢力ê競爭，是價值ê對抗。中國也講beh以「內循環」為主，降低倚靠外國ê經濟，對美國要求雙方是新型大國關係。M̄-nā án-ne，中國也一步一步掌握國際組織，習近平tī聯合國永續發展目標（sustainable goal）提出「人類命運共同體」ê講法，尾--à變做聯合國記錄在內ê一句話；中國甚至加入去聯合國人權委員會內底，有50外个會員國家倚中國hit爿，超過半數，美國ê影響力降低，tī聯合國120外个會員國家，中國掌握三分二。以中國「一帶一路」政策來講，共產黨想beh永遠執政，掖錢買收各國ê貪汙政客，照理講民主應當是常態，m̄-koh suah來倒退lu。
Tuì後冷戰到新冷戰，到底發生啥mih代誌--leh？為著beh脫離冷戰，suah演變做新冷戰ê局勢，東歐kap蘇聯sio連suà崩--去，獨獨中國無代誌——六四天安門事件刣學生無倒，共產獨裁做王。1990年代主流ê主張是kā中國引入來世界ê體系，hōo伊發展，結果到tsit-má 30冬--ah，顛倒kā中國飼大尾，tī世界橫霸霸，支持獨裁體制來挑戰民主制度。
新冷戰時代對lán台灣有啥mih款ê影響neh？後冷戰時期，美國beh khiú中國做戰略ê朋友，來抵抗蘇聯，就算講1989年天安門事件mā無影響--著。台灣自1987年解嚴，野百合運動逼「老國大」退場，李登輝tshuā頭進入民主化，台灣人想beh出頭天做主人，挑戰一个中國政策。世界有一寡國家為著tī中國做生理ê經濟利益，罵台灣是麻煩製作者，要求台灣對中國開放，用交流來代替對抗。到tann來，tsiah知台灣ê主張有理，mā khah beh支持台灣--ah。中國白賊、危險、無實在，mā無可能民主化，美國原底對中國ê態度是「信任kap驗證」（trust and verify），美國國務卿Michael Pompeo講，tsit-má變做是「無信任kap驗證」（detrust and verify），m̄-koh中國已經變強--ah，beh對抗中國，美國ài付出比早前koh-khah濟ê代價。
Suà--落-去，lán ài按怎理解新冷戰時代台灣kap世界ê關係--leh？台灣成功防治武漢肺炎，是民主體制成功ê好模範，昨hng台灣有一个確診ê本土案例，一寡人就kiāu kah無力--去，suah無想著別个國家一日有規千个病例。Lán台灣受著國際尊敬，人民有自信、國家有能力，早前講台灣薪水低、勞工工時siunn長、傷肝koh傷心，呵咾中國ê留學生比lán台灣ê學生koh-khah認真拍拚……。M̄-koh自2013年起，中國ê經濟勢力就bái--去，以往1990年代，kha̍p-bē著就10%以上ê成長率，到kah 2013年lak kah賰5％左右，變做新常態（new normal） ，國內失業ê壓力增加。
中國若想beh實現十冬內國力超過美國ê口號，有可能ē冒險來拍台灣，lán ài提防in tsit款錯誤ê自信。台灣地理上tī西太平洋hām印度洋ê雙叉路口，地緣戰略重要，lán又koh是科技島，有世界供應鍊ê重要角色——親像台積電tsit款ê護國神山。中國主張講民主制度無適合徙來華人社會，hōo台灣來拍破，尤其是lán tsiânn做民主模範kap防治武漢肺炎成功，國際上也看出中國按怎對付香港，就ē án-ne來對付台灣。台灣tī國際上ê價值性提kuân，致使國際新冷戰出現矛盾ê局勢，beh解決台灣地位問題，m̄-nā是統一iah獨立tsit个單純ê問題，是ài先了解國際結構ê變化，tsiah有才調處理。
Ài先了解世界，tsiah ē-tàng分析兩岸關係，台灣kiau中國ê關係已經變kah m̄-nā是兩岸關係，是包含新冷戰結構性矛盾ê特殊關係。新冷戰結構若是對抗性--ê，台灣無法度kap中國和平發展；新冷戰結構若是ǹg和解ê趨勢leh行，台灣採用對抗性ê屈勢也是無彩工。有人講，台灣ài對美國hām中國採取sio仝距離（equal distance）ê關係，tse是無認bat新冷戰結構ê無知之言。
中國是台灣生存上大ê威脅，lán國防定著ài有夠勇，美國tsiah有可能來kā lán tàu幫贊，美國人ê子弟也是爸母tshiânn養--ê，beh派in來kā lán tàu sio戰，lán家己ài先有拍算kap準備。近來美國解除台美官方交往ê限制，是一款進步，khah早兩爿官廳ê人beh會面，就ài am-am-iap-iap，揀一間咖啡廳來tshiâu代誌，台灣官員無法度行跤到美國人ê官廳內底。終其尾，台灣ài ē-tàng生存--落-去，而且tī民主、國防kap經濟各方面永續來發展，án-ne，tī新冷戰結構內底，就算講lán拄著sǹg-sǹg叫ê對頭風，猶原徛ē在，時到tsiah有飽tīnn ê khuì力來思考，進一步揣著lán國際地位正常化ê方向。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
