Che啥mih花？
作者：陳 雷
Che siáⁿ-mih hoe--ah?
Ū chi̍t-sî
I ūi lán hoaⁿ-hí
Thàu-chá hoe-khui
Chheng-chhun phang-bī
Bô kè-kàu cha-hng ê kòa-lī
Che siáⁿ-mih hoe--ah?
Ū chi̍t-sî
I ūi lán siūⁿ-khí
Bāng--lih ê ko͘-niû
Thâu chhih-chhih
Kán-tan giân-gí
Che siáⁿ-mih hoe--ah?
I ūi lán siong-sim
Ah, ū chi̍t-sî
Ài-chêng ê súi-chhái poa̍h-lo̍h thô͘
1 bān 1 bān
Bô koh chheng-phang
Kám í-keng bē kì--tit
I ê súi miâ...
Phàng-kiàn tiⁿ-bi̍t ê siàu-liām?
Ah, ū chi̍t-sî
I lâu ba̍k-sái
Ná ē thè-sek ê kì-tî
1 pha 1 pha
Jiok bē tio̍h siám-kòe sin-piⁿ ê kià-bāng?
Ah, ū chi̍t-sî
Che hoe kap lâng kāng-khoán
Chheng-chhun ióng-khì
Lîm-sî--ê kiò-sī éng-oán
Ah, ū chi̍t-sî
Che hoe kap lâng sio-siāng
Pó-sioh m̄-kam
Lîm-sî--ê chiâⁿ-chò éng-oán
