作者：石牧民
3月11，國立台北教育大學榮譽教授李筱峰tī左轉有書『哲學星期五』活動講『消失了的 “臺字源”：《教育部臺灣閩南語常用辭典》商榷』。李教授為著tshui-sak台語ê khang-khuè leh煩惱心。總--是，李教授m̄是語言、文字學家；伊ê『商榷』並無在理。
在李教授看，教典ê問題有一个大tsáng頭：所選ê「正字」，hōo慣勢使用華語ê人看無；若準看無，人就無beh學。「親像 “跤”、“喙”，台灣人看著 “腳”、“嘴” to慣勢慣勢，是按怎無愛用？」李教授koh講一个聽--起-來koh-khah有力頭ê例：教典內底ê字，伊ê阿公、詩人，koh台語人，準定看無。Án-ne一定有問題！講--起-來mā是奇。Lán人lóng是bē-hiáu就來學。獨獨李教授ê門派是bē-hiáu就無愛學。總--是，追究tse恐驚hōo人受氣，lán講一个無輸贏--ê。無用華語人看慣勢ê「腳」、「嘴」，因端tsiok簡單：台語kap華語無仝款。無仝款ê語言中間有精差，無法度影--一-下就知機。Tse全世界lóng án-ne，kám m̄是？
李教授演講現場，有幾位先進，存pān是beh接李教授ê話頭，講教典選字無用「本字」ê錯誤規大kuānn。Tsit款ǹg望教典品質tsiâu-ûn，làu-khuì求進步ê心意，hōo人感動。而且，tsit種心意有歷史背景。Khah早中國國民黨ê語言政策壓迫台語，對傳承台語有負擔ê台語先生，ē-sái講是tī孤寂內底暗中研究、保留台語ê知bat。Tī hit款壓力下底，自然產生對家己拚性命保留ê台語智識ê疼心；同齊時，mā ē產生對家己久年研究ê信心。總--是，lán必須tio̍h-ài講：現此時，台語tsiânn做國家語言；若是beh tī「正確tı̍k」面頂輸贏，拄好tsiânn做tshui-sak台語教育 ê that礙。
想看māi--leh，若是beh tī學生囡仔中間tshui-sak台語教育，結局逐家台語聽、講、讀、寫ê能力lóng tsiâu備，kám m̄是隨在學生tsiânn百萬人，逐家lóng學仝款一套tsiah有法度？若是一千个人一千種版本，lán siàu想ê「普及化」kám有準算？Tse就是教典設立ê mê角：標準化！有一个眾逐家lóng仝款ê標準教材，一千人來學，湠一千个；一萬人來學，湠一萬个。
標準化kap「正確」，完全兩回事。若追求正確，án-ne就是用「tio̍h」kap「m̄-tio̍h」來輸贏。一千人輸贏「正確」，就ē有一千个版本。拄好無法度tshui-sak。若是標準化，就是逐家人約束無輸贏，kā逐家lóng願意仝款彼个版本掠做「正確」--ê。逐家lóng仝款hit種號做正確--ê，thìng好來考試，thìng好來發證照，thìng好來栽培師資。結局是一个台語活跳跳ê台灣國。
若án-ne，追求「本字」kám講lóng無意義？當然m̄是，he是tsiok頂真ê工夫。M̄-koh，hit个khang-khuè leh進行ê同齊時，教典m̄是「錯誤規大kuānn」bē用--得。逐家約束好勢，教典內底lóng正確，因為he是考試、認證ê標準答案。Ē-sái改--無？Ē-sái。後回開會，委員有新看法，就thìng好改；有leh改，是台語活--leh ê證據。一直有leh改，m̄是錯誤規大kuānn，是標準化工程永遠leh進步。
M̄-thang看輕tsit个標準化ê khang-khuè。西方國家、日本tī進入20世紀hit-tsūn khah贏lán台灣，就是因為in代先願意放落「家己」，用標準化來無輸贏，tuì án-ne，用仝一種步數，軍艦ē-tàng起一千隻，飛行機ē-tàng起一萬台。標準化就是現代化ê大tsáng頭。Lán台語、台語文、台語文學tsit-má就是leh行tsit條標準化、現代化ê路。Lán何苦hōo家己跋倒？
講一个無輸贏--ê--lah！你leh學英文，查英文字典，kám知影內底內容lóng「正確」？你無可能確實知。有致使你無法度順利學英文--無？
台語並無khah細漢，台語並無koh-iūnn。
（作者是台灣師範大學、靜宜大學台文系兼任助理教授）
（後期繼續）
#文學káng「台」 專欄，本文使用教育部推薦漢字kap臺灣閩南語羅馬字拼音方案。
台文通訊BONG報336期，2022年3月出刊。
-------------------參考資料-------------------
------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
