主講／蕭文杰
記錄／吳宛霖
記錄／吳宛霖
編按：本文是2021/1/28棲地復育台語講座「大聲叫出lán ê名：Tuì lán ê古早厝，了解lán ê文化」講座摘要記錄，講者是國立臺北教育大學社會與區域發展學系ê蕭文杰助理教授。台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃有關生態環境議題ê台語講座，歡迎逐家tī逐個月第三禮拜四暗時7點到9點，同齊來「呷米共食廚房」（台北市中正區衡陽路9號3樓）擴展家己ê台語棲地（tshe-tē）！詳細資料ē-tàng看「台灣蠻野心足生態協會」FB專頁。
Tī講座iáu未開始進前，蕭老師特別放〈M̄-thang嫌台灣〉、〈母親ê名叫台灣〉tsit兩條歌hōo逐家聽，是按怎beh聽tsit兩條歌？蕭老師講，若beh講著世界遺產，每一个國家lóng ē用家己ê文化資產做主要論述，bē kā世界遺產hit十條ê登錄標準當做聖旨來看待——日本人有日本人ê角度、美國人有美國人ê角度，來思考in家己ê文化；lán台灣人，當然mā ài有lán家己ê主體性，ài用lán海洋國家、多族群、移民ê角度，來看lán台灣家己ê文化。Suà--來，蕭老師就用『高更』ê圖「Where Do We Come From? What Are We? Where Are We Going?（1897）」，hōo逐家思考：lán是tuì佗來？Lán beh tuì佗去？Lán到底是beh行tuì佗位去？Lán到底是啥mih人？Lán beh保留啥mih款ê文化？
文化是啥mi̍h？課本內底ê文化資產論述寫kah一大堆lò-lò長，lán無需要去硬死記。簡單講，文化就是lán ê DNA，伊是人行--過ê身影、跤跡，是風格、性格。Beh認bat文化，tio̍h-ài先認bat lán家己是啥mih款人。一件lán上kài清楚ê代誌，就是「厝--裡ê滋味」，tī厝--裡媽媽煮啥mih菜，你凡勢ē kā學--起-來，若鼻著tsit款氣味，就有tńg去厝--裡ê感覺——文化就是án-ne ê感覺。有人去看歐洲ê教堂感覺tsiânn suí，翻頭看lán台灣ê古厝suah感覺khah差，就主張kā拆拆--leh，án-ne kám tio̍h？Suí-bái無比止，suí kap bái是真主觀ê概念，koh再講，文化資產mā有in歷史文化ê感情跤跡tī--leh。
Beh認bat lán ê文化，上直接、上緊ê方式，就是去看古厝，因為古厝伊家己ē講話。規百年來，卯澳（Báu-ò）吳--家樓仔厝恬靜徛tī東北角，lán m̄免去píng冊看資料，伊粗勇ê石頭自然ti̍k ē用上原始ê面貌、用粗peh-peh ê聲音，講出先民一代一代流血、流汗、hām大海tshia拚ê歷史，歐洲ê教堂kám m̄是仝款án-ne？
卯澳吳--家樓仔厝是東北角獨有ê地理特質風貌，mā見證台灣粗曠ê海洋史美學，建築物是罕得看--見ê兩層樓石頭厝，壁堵頂ê銃空，顯明hit時治安無好，有錢人就起銃樓來自衛。蕭老師bat tī hia khioh著銃子，he就是台灣初墾時期ê風貌，表現地方營造ê技術流派——取在地ê石頭，厝頂khàm紅瓦，『火形山牆』1頂面妝thānn真罕看ê日頭圖騰。Tse m̄知是m̄是hām早期ê平埔文化有關係，建物主體kōo石壘疊造，工法有『亂石砌、人字砌、條石順丁砌』等。
M̄-koh，尾--à吳--家樓仔厝並無通過古蹟身份ê申請，因由是「無特殊性」、「嚴重敗壞」。古厝一間一間拆，lán ê文化恬恬仔流失，lán kám beh變做無記持ê人？為著beh搶救一直滅無--去ê文化資產，《文資法》應該ài增修公益訴訟tsiah tio̍h。Lán mā ài勇敢出聲，bē-sái koh恬恬，據在先人留--落-來ê文化資產hōo人beh拆就拆，bē-sái在人來洗除lán ê文化記持。
世界遺產kap文化其實是仝一項代誌，文化資產hām環保mā是kap鬥陣ê議題。Lán來看菲律賓ê稻仔山田，是按怎ē hōo人認定做世界遺產？伊是屬人文類，用傳統文化kap社會環境融合，結合傳統智識kap現代科學，來追求自然資源ê永續利用。Tī tsiah-nī kuân koh崎ê所在種作，田水ē保溫，保存特殊米種，栽種ê智識代代相傳。上尾，蕭老師koh紹介逐家，ài揣機會去淡水看菅蓁林黃--家古厝、忠寮李--氏古厝，沓沓仔去欣賞、發現古厝ê藝術價值。
 |
Tuì頂kuân到下底憑頭是：金、木、水、火、土， 圖片來源：維基百科ê圖 |
Tuì頂kuân到下底憑頭是：金、木、水、火、土，
圖片來源：維基百科ê圖
- 福建閩南、廣東潮汕、馬祖、金門kap台灣ê人家厝，tiānn看ē著「五行（火、水、木、金、土）款式」ê鰲頭壁（gô-thâu-piah），有翹燕仔尾ê厝脊尾ē-sái看做「火式」，真普遍。
#棲地復育台語講座 專欄，本文使用教育部推薦漢字kap臺灣閩南語羅馬字拼音方案。
台文通訊BONG報324期，2021年3月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
