主講／李南衡、周佳穎
記錄／鍾育紋
記錄／鍾育紋
本文是2021/2/21 ê講座摘要記錄，主講者李南衡，目前tī綠色和平廣播電台主持文化性節目，mā有tī《台灣教會公報》寫〈那teh褪色的台灣俗語話〉專欄。主講者周佳穎，外號「台南妹仔」，台北藝術大學電影創作學系畢業，「台南妹仔教你講台語」頻道創作者、公視台語台《逐工一句》節目編導。
2月21是世界母語日，李江却台語文教基金會邀請兩位無仝世代、仝款為台語leh拍拚ê主講者：李南衡、周佳穎，做伙來分享in ê台語路。
頂真ê oo-jí-sáng李南衡先生
頭起先來分享--ê是李南衡先生，伊講伊ê台語路起步無算早，tuì伊60歲開始行，佳哉食到80歲iáu活--leh，iáu ē-tàng為台語做khang-khuè。伊ê頭一本台語冊是《台語大爆笑》（1996年3--月出版），m̄-koh hit-tsūn伊iáu bē-hiáu讀寫台文，伊tī《自立晚報》、《民生報》連載華語ê笑詼，尾--à收集--落-來是鄭良偉教授kā tàu翻譯做台文（有人問伊講是用啥mih文寫--ê？哪tio̍h koh翻譯？伊lóng滾笑應講是用德文寫--ê。）鄭教授就鼓勵伊學台文，tī 2000年hit跤兜仔，伊hē決心beh好好仔來學。李南衡先生有一个真可取ê所在，就是見若beh學啥就ē tsiok綿爛去學，拼音ê冊、幾若本台語辭典lóng拚勢研究、做筆記。
經過兩冬，伊開始用台文來寫作，hit-tsūn伊mā有寫綠色短評專欄hōo電台放送。主持人ē用台語來講，別人交ê稿是華語ê稿，主持人tio̍h-ài先kā轉做台語；主持人bat kā講--過，上愛接著伊寫ê稿，因為是用台語寫--ê，主持人提--leh就直接唸，lóng免koh了工去翻譯。
2005年，李南衡先生koh去讀師大ê台文所，因為對外來語真有趣味，伊發現真濟文章內底lóng看ē著外來語。進一步kā分析，tī日本時代ê賴和所寫ê文章--裡，tuì日語來ê外來語占大面；m̄-koh過50冬了，王禎和ê小說用ê外來語suah變做美國話khah濟，tsit个主題mā tsiânn做伊ê碩士論文，而且規本koh是用台文來寫--ê。
另外，伊mā有受邀請tī《海翁》雜誌連載「亂e亂唱ê台灣話」專欄，分享伊所觀察著台語khah ē講m̄-tio̍h ê所在，比如宋楚瑜選舉ê時，m̄知「喙瀾」按怎講，suah創造華語khuì ê新台語：「口水」（kháu-tsuí）tsit个詞。後--來伊有出版《那teh褪色的台灣俗語話》，諺語tsit類ê冊有真濟人leh寫，m̄-koh伊tsit本（後來koh有第二冊）hām人ê無仝，內容主要是80歲tsit沿iáu-koh知影，m̄-koh已經漸漸少人用ê諺語。趁tsit个寫作ê機會，伊想beh kā tsia-ê已經beh拍無--去ê諺語記錄--落-來。
兩冬前，因為大腸癌蹛院治療（講著tsiah-nī艱苦ê主題，人稱幽默大師ê李--先-生竟然kā逐家講，以前lóng聽人講「斷腸人在天涯」，伊倒tī病床頂tsiah發現tsit句話根本講m̄-tio̍h--ah，是斷腸人tī「病床」m̄-tsiah tio̍h）。Hit-tsūn出版社ê人去kā看，講著伊khai真濟心血所收集ê資料，若準hōo當做pùn-sò tàn掉就tsiânn無彩，講--leh講--leh，新ê寫作計畫就án-ne起磅--ah。出院無幾工，hit位做代誌上頂真ê李--先-生又koh出現tī電腦頭前，經過冬半ê用心整理，一本內容精彩koh豐富ê《台灣外來語》就出現tī逐家ê面頭前--ah。
台南妹仔Ayo周佳穎
自讀國小ê時，周佳穎就tuè tī阿爸身軀邊學台語ê表演。阿爸周定邦是說唱藝術ê表演者，阿爸去學唸歌了後希望伊tsiūnn台伴奏，就叫伊去學校ê國樂社學e弦仔。褒歌、恆春民謠就tsiânn做伊細漢生活中tiānn出現ê mi̍h件，mā是現此時伊創作ê來源。細漢ê時有一段時間ē去kā《海翁》雜誌tàu錄囡仔詩、mā有錄過課本等等。
高中ê時組樂團做社長，刁工揣台語歌hōo同學練習，比如講正月調，tsit款歌是伊tsit沿ê人khah bē去接觸--著--ê。讀台北藝術大學電影系ê時，因為規班ài做伙創作一齣戲，時代ê設定bē-tàng是tī現代，又koh因為表演組查某--ê真濟，伊想--著ê跤本是日本時代咖啡廳ê女給。規齣戲是台語--ê，m̄-koh有真濟同學bē-hiáu講台語，伊自然就koh變做tsit齣戲ê台語指導。落尾伊有導演一齣號做〈疫備起〉ê短片去參賽，用笑詼ê角度去搬疫情期間衛生紙買bē著ê代誌，領獎hit時tsiah知in是唯一用全台語來展現--ê。另外，伊ê身軀邊有bē少創作台語歌ê朋友，mā不時ē去tàu研究台語歌詞ê書寫，iah是按怎用白話字表示。
進前有一个機緣，hōo人推薦伊去公視台語台做導演，就是「逐工一句」tsit个節目。真濟人細漢ê時lóng看過華語ê『每日一字』，製作人感覺台語mā ē用得做sio仝ê節目。台語顧問ē先提供教材，伊tsiah來編寫跤本，通常ē編一齣戲，用情境劇tsit款khah趣味的方式來解sueh俗諺語。主持人「又仁」真gâu演無仝ê角色，所以配合無仝ê內容，設定真濟角色hōo「又仁」來搬。比如講khah生活化、傳統ê題材ê主角是阿珠姨；hām音樂、藝術有關連ê是DJ來演；啊若節氣hit類ê就hōo鳥半仙出場……。
伊mā tī網路頂做家己想beh做ê節目「台南妹仔教你講台語」。自伊來台北就tiānn hōo人呵咾台語講kah真liàn-tńg，mā有bē少人講beh來hām伊學台語，所以伊設定內容主要是白話字ê教學，伊認為tse是學台語ê基礎。伊家己是tī beh升大學ê歇熱，招幾个仔同學做伙來參阿爸學白話字，khai差不多一個月ê時間就學--起-來。家己學習過程中感覺khah困難ê所在，就tī學白話字ê單元用khah趣味ê方式來表現，真濟人kā講伊ê節目對學習台語有真大ê幫贊。Suà--落-來，台南妹仔mā ē繼續行台語路，今年有計畫beh kā生活內底ē講--著ê語詞，做短短--à--ê、心適ê戲劇囥起去網路。未來有想beh kā生活中拄--著ê狀況提來podcast討論，親像是按怎tsit-má真濟人leh迷飼貓仔等等，hōo無閒看影片ê人mā ē-tàng用聽--ê來接觸台語。未來iáu有真濟想beh做--ê，年歲漸漸有，ē用得做kah到--ê應該mā ē koh-khah濟。
#台語sa攏有講座專欄，本文使用教育部推薦漢字kap臺灣閩南語羅馬字拼音方案。
台文通訊BONG報324期，2021年3月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
