主講／洪子偉
記錄／吳宛霖
本文是2021/5/12 ê講座摘要記錄，主講者洪子偉是中研院歐美所副研究員。
啥mi̍h是哲學? M̄是拆字、算命、看地理，哲學是西方文明ê基礎，強調以理性kap邏輯方法來研究萬事萬項基本ê道理，是啟蒙時代重要ê精神；若是無理性kap邏輯ê能力，就無後--來科學革命kap人權ê運動。哲學ê威力ē-sái講比病毒koh-khah恐怖，若大腦hōo uè--著，可能ē改變人類行為。Locke（『洛克』）、Rousseau（『盧梭』）ê「天賦人權」湠到18世紀歐洲大陸ê革命風潮。Descartes（『笛卡爾』）、Bacon（『培根』）ê科學方法危害著數千年基督信仰ê基礎。M̄-nā án-ne，思想koh ē演化，突變自Hegel（『黑格爾』）kap Feuerbach（『費爾巴哈』）哲學ê『馬克思』主義（Marxismus）開始，尾--à湠到全球，影響百年來ê國際局勢。Tsia-ê哲學思想，tiānn-tiānn是影響人類文明興敗ê力量。
1868年明治維新，日本創辦開成學校tsiânn做研究kap教授西學ê官方機構。民間學者mā系統性引入英國效益主義（Utilitarianism）、自由主義（liberalism）等思潮。1877年東京大學成立，文學部第一科包含史學、哲學kap政治學。是哲學頭一擺以現代專門學科出現tī東亞。你可能ē問「傳統中國kám無哲學？」近代哲學ē-sái講是過水貨，m̄-koh古早時中國ê儒、道思想kám ē-tàng算是哲學？Tse一直lóng有爭議，譬如禮記講『尊師重道』，Aristotle（『亞里士多德』）mā有講『吾愛吾師，但吾更愛真理。』M̄-koh，哲學強調--ê是「批判精神kap獨立思考」。前北京大學校長、前台大校長傅斯年tī 1926年講過一句話：「中國本來就無哲學tsit个mi̍h件。多謝上帝，hōo阮民族一个“tsiah-nī健康ê習慣”。」
政治哲學tī國家leh建立iah是轉型ê時koh-khah重要。Tī民主國家內底，伊界定人kap人之間權利ê界限；m̄-koh tī極權國家內底，伊suah變做獨裁者kā壓迫合理化kap擴張ê借口，beh控制思想、beh審查出版，不准人民有批判ê精神kap獨立ê思考，無反抗ê思想就無反抗ê行為。
1920年台灣ê實存運動（Si̍t-chûn Movement），tú開始是tuì歐美哲學揣一寡思想做武器，來kap日本殖民者意識sio-tak，慢慢仔發展變做台灣文化主體性ê反省，tse是有系統ê思想反抗。30年代tiānn-tiānn hōo人討論ê「實存」（じつぞん）概念，是按德國哲學「existenz」翻譯--過-來--ê，指「形而上學」（けいじじょうがく）ê存在概念，無愛kap存在主義（Existentialism）kap做伙。
台灣哲學有兩種意義，一種是Philosoply in Taiwan——所有tī台灣發生ê哲學活動，另外一種是Taiwanese Philosophy——有台灣特色ê創作性轉化。過去百年ê台灣哲學leh處理啥mih重要ê問題？就是存在kap反壓迫。所以哲學界前輩廖仁義講了tsiânn清楚，『台灣哲學一開始就不是一種囿於學院藩籬的觀念推演，而是源自於民間尋找反支配思想的需求。1』、『台灣當代哲學始於日本統治下的現代化啟蒙，卻在反抗日本殖民中成長茁壯。戰後來自中國的知識份子帶來自由主義與實用主義的洗禮，卻同樣成為批判黨國威權與推動民主化的動力。2』
日本時代ê台灣哲學有兩个特色，第一，是關心存在／存有ê問題（抽象ê「形上學」）：政治上已經m̄是中國ê一部份，文化上mā m̄是日本ê一部份，án-ne lán到底是siáng？探索自我存在kap存在條件，變成是早期台灣哲學ê時代精神。第二个特色是重視運動實踐。1920年開始，「台灣人」kap「台灣文化」ê概念慢慢仔流行--起-來，在地身份kap文化認同促成台灣ê文化民族主義運動。台灣哲學mā透過歐美哲學ê創造性轉化慢慢仔發展--出-來，變成對日本kap中國傳統思想ê反叛。
- 廖仁義，《台灣哲學的歷史構造》，1988年出版。
- 廖仁義，《啟蒙與反叛》，2019年出版。
線頂看影片
台語sa攏有 - YouTube 頻道
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
