主講／鄭勝吉
記錄／蔡天享
編按：本文是2021/3/27棲地復育台語行讀「大龍峒文化史蹟 -台北孔子廟kap保安宮」活動摘要記錄，講者鄭勝吉老師是台灣傳統建築ê講師。台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃有關生態環境議題ê台語講座，歡迎逐家tī逐個月第三禮拜四暗時7點到9點，同齊來「呷米共食廚房」（台北市中正區衡陽路9號3樓）擴展家己ê台語棲地（tshe-tē）！詳細資料ē-tàng看「台灣蠻野心足生態協會」FB專頁。
春分tú過，清明接suà beh來，tng當暗時秋凊，日--時燒熱ê好天時，lán鄭勝吉老師喙笑目笑歡迎20外个有志，beh tshuā逐家做伙來去大龍泵（Tuā-lông-pōng）行踏。孔子廟kap保安宮是tsit kái紹介ê兩跡古蹟，老師ǹg望逐家有心來到tsia，了解一寡歷史kap智識，看suí、hip相掠外，ē-tàng kap lán ê生活hōo有牽連。
清國時代，孔子廟是tī台北城內；日本人統治台灣了後，tī 1907年kā拆除，起造台北州立第一高女，也就是tsit-má ê北一女。了後，地方士紳發起重建，捐土地、寄付錢項，tī 1930年主殿大成殿hām主體建築起好，開始做孔子公生，m̄-koh欠經費，一直到1939年，tsiah有tsit-má ê規模。為著beh ha̍h孔子廟hōo官廳主持ê古例，鹿港辜--家hām大龍泵陳--家老師府（nóo-su-hú）做代表，tī 1972年kā孔子廟捐hōo政府。
有老輩ê學者批評kā孔子廟起kah ná媽祖廟iah是土地公廟--leh，花草siunn過頭濟，mā siunn tshiann-iānn，無夠莊嚴。論理來講，設計kap色水ài khah簡化嚴肅tsiah有ha̍h，翻頭來kā看，原來啊，起造孔子廟ê師傅原底是leh起王爺廟--ê。
講著孔子廟基本ê建築型式，頭前有一堵壁，號做「萬仞宮牆」，按牆圍邊--a ê黌門入--來，就看ē著一个半圓ê水池仔「泮池」。Koh再來是櫺星門，是beh入去正殿進前ê一个牌坊，中ng有一對龍柱，門堵有各式ê石雕hām木雕，厝尾頂有剪黏、交趾kap彩繪，展現歷史故事。櫺星門ê門扇hām一般ê寺廟無仝，無畫門神，換做是門釘，lóng總有108枝，代表三十六天罡kap七十二地煞，是顧門ê保護神。門釘自古就是釘門枋ê釘仔，後--來，he釘仔頭愈做愈大、愈suí，tsiânn做tsit-má細細圓圓ê通鼓形體。
一到門口埕，勝吉老師huah逐家tann頭看櫺星門ê門尾頂，有一組心適ê交趾瓷仔，是李白透暗lim酒醉，徛bē在，手mua tī書僮ê肩胛頭，ná行ná phiân，書僮一手攑鼓仔燈，一手kā鼻仔tēnn-tiâu--leh，想beh閃李白規身軀ê臭酒味，聽眾笑kah是làu ē-hâi。
Se̍h頭看tuì主殿大成殿ê厝尾頂，虎、豹、獅、象、馬、魚、蝦、龜，二三十款野生動物，bē輸動物園--leh，hiánn目ê貓頭鳥有72隻，代表孔子公ê 72个弟子。邊--a有兩隻三肢跤ê螿蜍（tsiunn-tsî） ，因為孔子公「不語怪力亂神」，所以kā做古錐ê形體，講是tài財；ài講文言詞「蟾蜍（siâm-sû）」khah文雅，m̄是口語詞tsiunn-tsî。另外有彩繪ê果子——石榴（sia̍h-liû），取伊厚子，代表「多子多孫」。
看tuì大成殿內面去，有一塊神主牌仔刻「大成至聖先師孔子神位」，tse是對孔子公本名「孔丘」ê尊稱。按頂下桌hia tann頭看天pông，有「蜘蛛結網（ti-tu kiat-bóng）」ê木雕，tse就是華語所講ê『藻井』——碗公倒lap ê雕刻手法，花草幼路，牽做蜘蛛網ê形體，展現tsia是神聖尊貴ê所在；四面邊--a有挖空通風，án-ne柴料khah bē溼，mā khah bē快歹。孔子公神位兩爿邊--a，是伊ê學生kap歷代以來出名ê讀冊人，有17个，譬論講亞聖孟子也在內。
大成殿倚nî-tsînn下--ā ê壁面是水車堵，也有人講是「suí斜堵」ê走音詞，因為是tuì壁面斜--出-來、suí-suí ê壁堵。水車堵是交趾藝術，展現四个君王聘請gâu人ê典故，khah出名--ê是「劉備三請孔明」，描寫三國時代劉備為著beh聘請孔明下山，做軍師來tàu拍天下，親身走三tsuā遠路，tsiah感動孔明。另外一个典故是周文王聘請姜子牙出馬，beh來去征討商紂王，伊聽講姜子牙釣魚離水三寸，ǹg望「願--者上鉤，不願--者回頭」，只等有緣人，周文王認定伊是賢人，就派後生去邀請姜子牙。無疑悟，姜子牙講ài文王本人來tsiah有誠意，周文王m̄-nā親身到位，koh hōo伊坐轎，文王kā khiú轎車。
孔子廟看煞，隨後趕去街仔路口ê保安宮，保安宮服sāi ê主神是保生大帝，也就是大道公。伊是leh做醫生，得道升天了後，tsiânn做醫神，hōo信眾求藥籤。清國ê時，泉州同安人來大龍泵趁食，起廟kā服sāi，取「保」佑同「安」人ê意思。1805年，清國嘉慶年間，就有tsit-má ê廟宇規模，tī日本大正時期kap 20冬前lóng有koh翻--過，tī 2003年tio̍h聯合國教科文組織（UNESCO）亞太文化資產保存獎。
大正時期hit kái ê翻修，有請兩組師傅「做對場」，也有人講是「拚場」；廟身分做兩爿，一組做一半穡頭，工事ê寸尺sio-siâng，m̄-koh設計、形式kap手路無仝。分兩組，人濟，khah緊做好bē拖沙，也thìng好比較siáng做了khah suí、khah幼路。俗語講：「輸人m̄輸陣，輸陣歹看面」，趁濟趁少是額外，面子問題ài論代先。
厝脊頂有剪黏，龍爿有八仙其中ê四仙，大肚--ā漢鍾離是上好認--ê，欠hit四仙是因為beh做對場，留一半hōo另外一組發揮創作。虎爿ê師傅剪ê是四大天王，有看見「雨」hām「順」兩尊，雨神手攑雨傘特別hiánn目，「風」神kap「調」神兩尊徙tuì後壁面去，mā是做一半niâ。兩組師傅m̄-nā拚手工，也tio̍h拚設計。比論講，當時大龍泵時行pua̍h-kiáu，有師傅用kiáu間所用ê十八骰仔、天九牌hām麻雀jí仔做雕刻ê題材，反映地方特色。
Suà--落-來，就木雕來比phīng。龍爿做一扇一扇，每一扇ê外框是統一性ê冊捲型式，有整體感，加上框頂--à ê花草各有差別，同中有異，有變化，加上框內面題材雕刻《三國演義》曹操kap劉備煮酒論英雄ê故事，人物層次kap設計性khah贏。翻頭來看虎爿，每扇木框大細無仝，khah成是各人做各人--ê，無一个統一感hām團隊性。
正殿服sāi吳真人，門前有兩對石造ê龍柱。倚外爿tsit對是清國嘉慶年代雕--ê，倚中門hit對是日本時代創作--ê。愈近代工具愈進步，日本時代已經有電動ê tsām仔--ah，雕工自然ē khah幼路，一枝柱仔thìng好雕兩尾龍；m̄比早前清國--ê，tsha̍k仔ài用手落去用摃--ê，工khah粗，平平一枝柱仔kan-na有才調刻一尾龍niā-niā。
為著保存文化資產，彩繪ê修護也是大學問。正殿壁堵有一幅台南名師潘麗水所畫ê圖，tī 1999年tshiànn澳洲師傅來整修，一个lán台灣師傅tuè leh學伊ê技術。修好勢了後，遠遠看修kah tsiânn suí，倚近看tsiah知有補漆。
Se̍h tuì正殿後壁堵ê外口面，隨看著「八仙大鬧東海」ê彩繪——八仙kā王母娘娘祝壽，酒食煞，各展神通beh過東海，回tńg各人ê仙居；眾仙神通廣大，引起海湧滾絞，驚動東海龍王，雙方suah起冤家sio拍，尾--à只好iang請菩薩出來排解——tse是廟畫tsia̍p看ê心適題材。後殿服sāi--ê是神農大帝，伊tam百草，也是醫神，輩份比大道公khah kuân，輩份kuân--ê tsiah ē-sái入祀後殿。就親像孔子廟正殿ê後面殿服sāi孔子ê老爸kap祖先，是仝款ê道理。Lán徛家正身護龍mā有sio-siâng ê原則，序細蹛頭前落，序大人押後徛後壁落。
煞尾--à，勝吉老師勉勵逐家，後擺若來廟--裡拜拜，金紙燒了以後，免趕緊走beh tńg--去，留淡薄仔時間行行看看--leh，感受lán ê祖公仔產。就親像tsit kái行踏ê過程，莊嚴ê廟宇內，隨時聽ē著pua̍h-pue落地ê清音，mā看ē著善男信女虔誠ê面容，tse是上kài安搭人心ê景緻。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
