作者：邱偉欣
Kám真正有廖添丁chit个人？
傳奇故事無一定是真--ê，m̄-koh，廖添丁chit號人物是確實存在：日本時代ê戶口名簿頂koân有記載台中廳大肚上堡秀水莊（taⁿ是台中市清水區秀水里）一戶姓廖ê人家，戶主正是廖添丁，kap伊蹛做伙--ê iáu有伊ê阿媽陳氏呂，kap伊ê叔伯小妹廖氏嫗（ò͘）。Chit時ê戶口名簿頂，有一欄是「種痘」，廖添丁kap伊ê阿媽tī chit欄ê標記lóng是「天」，小妹廖氏嫗ê標記是「一」；chit个意思就是講，廖添丁kap伊ê阿媽lóng bat tio̍h過天然痘，廖氏嫗無tio̍h--過，m̄-koh有注過天然痘ê預防射。
天然痘就是smallpox，華語叫做『天花』。根據荷蘭人ê記載，1645年台灣就bat發生過天然痘ê時疫，造成bē少人死亡。天然痘ê流行若發生，chhiâng-chāi ē死bē少人，好--去ê人lóng ē有khî tī身軀、跤、手、面，歹看koh驚--人。一直ài到1871年，長老教會ê醫療傳教師德馬太來到台灣以後，chiah開始有tī一寡所在kā民眾「種痘」——「種痘」就是注天然痘ê預防射——he是1796年英國醫生剪鑼（Edward Jennar）利用牛ê「痘」發明ê預防射。1906年日本總督府發佈「台灣種痘規則」，了後chiah有透過政府ê力頭tī台灣大規模kā民眾「種痘」；1796年英國醫生剪鑼tú開始beh kā逐家介紹天然痘預防射ê時，逐不時就hō͘人kā ge洗、反對。1906年以後，日本政府chhím beh叫台灣人去注天然痘預防射，真濟人mā是反對，甚至講hit號是日本人ê陰謀。不而過，1883年出世ê廖添丁，伊若慢25冬出世，凡勢有機會去注天然痘預防射，就bē去tio̍h病變做貓仔面--lah！
天然痘預防射百面是歷史上上kài成功ê疫苗，因為經過人類有計劃tī逐所在注預防射，184冬了後，世界衛生組織tī 1980年宣佈造成天然痘ê病毒hō͘ lán勦滅。
※ ※ ※
除了天然痘ê預防射，chit-má lán有真濟款預防射，in ê功能lóng仝款：注tī健康人身軀頂koân，後擺伊就bē tio̍h hit號病，萬不二若tio̍h hit號病，mā khah bē發生食力ê症頭。總--是，beh開發一劑安全koh有應效ê預防射通常ài幾若冬甚至chiâⁿ十冬chiah有法度。
自中國tī 2019年年兜爆發武漢肺炎以來，chit-má已經chiūⁿ億人遭受病疼，超過三百萬人死亡。除了直接tio̍h著病ê受害者，間接--ê：經濟ê損害、家庭ê失和、個人心情ê鬱卒，甚至án-ne來自殺死--ê，種種ê悽慘落魄，實在無法度計算。中國瘟神hiah-nī厲害，恐驚tio̍h-ài有預防射chiah舞伊ē直？
因為代誌實在緊急，世界各國tio̍h kā法令放lēng--淡-薄，hō͘開發武漢肺炎預防射--ê thang駛khah緊--leh；koh，近來ê分子生物學進步chiok濟，預防射開發ê技術mā tòe teh進步，lán總算tī 2020年ê年尾仔，開始tī醫護ê身上注射武漢肺炎疫苗。
※ ※ ※
早前ê預防射真濟就是「減毒疫苗」來chiâⁿ--ê。Chit个意思就是講，科學家kā病毒sa--來，想辦法kā伊ê毒性降低——減毒了後ê病毒就直接提來做chiâⁿ預防射。Kā減輕毒性ê病毒注入去好好人ê身軀，其實就是hō͘伊tio̍h小可病，好--去了後，伊就ē有抵抗力，對chit號病毒「免疫」。雖然機會無大，m̄-koh減毒若失效，注chit个預防射ê人顛倒ē tio̍h病。Chit擺中國開發ê武漢肺炎預防射就是chit款「減毒疫苗」，風險有khah koân。
分子生物學ê方法是取用病毒ē引起人體免疫反應ê部份來做預防射，che是現代安全ê預防射。現此時英、美、歐洲teh注ê武漢肺炎預防射就是chit款。主要有三種。第一種，kā ē產生病毒kek（棘）卵白（spike protein）ê RNA分子注入去lán人ê皮ē（下），hō͘細胞吸收chia-ê RNA koh製造出病毒kek卵白，引起身體ê免疫反應，hō͘ lán產生抵抗力；BNT kap Moderna ê預防射屬tī chit款。第二種，kā ē產生病毒kek卵白ê RNA分子包tī烏猩猩ê Á-tián-ló͘病毒（Adenovirus）ê空殼內底：lán kā chit號病毒ê腹內挖清氣，kā武漢肺炎病毒ê RNA當做餡，kauh tī Á-tián-ló͘病毒ê空殼--裡；射注tī皮ē以後，Á-tián-ló͘病毒ē去感染細胞，武漢肺炎病毒ê RNA就走去細胞內底，製造出病毒kek卵白，引起免疫反應，hō͘ lán產生抵抗力；AZ預防射屬tī chit款。第三種，iah就是lán台灣家己teh製造kap試驗，tih-beh chiūⁿ市--ê；lán kā武漢肺炎病毒ê RNA囥入去實驗室teh飼ê細胞內底，hō͘伊產生病毒kek卵白，chiah-koh利用chia-ê病毒kek卵白來製造預防射。
上要緊--ê，頂面講ê分子生物學ê方法去做chiâⁿ ê預防射，bē有防腐劑——formaldehyde（『福馬林』），mā kap「卵」無tī-tāi。Phēng早前ê方法安全濟--leh。
※ ※ ※
武漢肺炎預防射注了，ke減lóng ē發燒、頭疼--一-兩-工，少數人ē有khah大ê無爽快ê反應。進前，AZ預防射bat傳出講，注了血筋內底ē生出血角，甚至造成性命危險，歐洲國家因此暫時停止注射AZ疫苗；經過詳細調查了後，確定AZ預防射造成血角ê機率phēng十萬分之一khah低，ē-sái講是極微細，對民眾來講，注chit號預防射ê利益贏過生血角ê危險性濟濟濟。
台灣第一批ê預防射是AZ預防射，到5月底，注了ê人有46萬外人，到6月初2，chiah出現第一例確定ê血角病例。患者因為發現了早，接受治療以後mā已經無代誌--ah。所致，李秉穎醫生提醒逐家：注射AZ預防射了，28工內，ài觀察家己ê身體狀況——若一直teh頭疼、目睭bông霧、出現羊眩、腹肚疼，食力koh疼bē煞，超過24點鐘、胸坎疼kah chiok厲害koh喘khùi bē順、雙跤腫歪歪iah是ē疼、皮膚無代無誌出現烏青iah紅點——有頂koân講--著ê症頭，tio̍h-ài緊去hō͘醫生看，而且ài kā醫生講最近有注過預防射。
到今年（2021）5月中，英國有超過5,900萬人注AZ預防射，確診人數mā已經ùi逐日五萬人降落來到逐日兩千人左右。若美國，到taⁿ注射預防射ê人已經超過兩億人，逐日確診ê人數mā phēng éng過降低38%。Chia-ê事實顯明，chit-má ê預防射確實ē-sái對抗中國武漢來ê瘟神--lah。
台灣tī今年5--月ê時經過一擺社區感染ê緊張，taⁿ就知中國瘟神猶原tī四箍liàn-tńg teh ûn，lán若失覺察就ē tio̍h瘟。對付chit隻，上有效ê方法就是注預防射！未來，不管是AZ、Moderna、BNT iah是台灣製ê疫苗……，有，就khah緊去注！
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
