作者：賴朝和
古早人講：「民以食為天」，tī khah早經濟khah無發達ê農業社會，大部份民眾生活上上基本ê要求，就是ǹg望逐日lóng ē得三頓飽，只是現時代lán台灣經濟發達，除了一寡散食ê弱勢社會邊緣人士，以及一寡仔想beh減肥健身、宗教修行iah是破病ê人以外，基本上已經tsiânn少人ē拄著非自願iau餓ê狀況。
Lán國校仔lóng有讀過「病從口入，禍從口出」tsit句語詞，tī khah早ê時代公共衛生逐家khah無重視，大人參囡仔因為喙食無注意衛生，腹肚疼làu屎是民眾日常去hōo醫生看上主要ê症頭之一。Tse其中輕--者是普通ê胃腸炎，食兩三工仔胃腸藥就無啥mih代誌，m̄-koh若是致著親像khoo-lé-lah（霍亂）iah是腸仔熱（傷寒）hit類ê嚴重傳染病，症狀上主要是嚴重ê吐kap làu，一般lóng是無死mā賰半條命。Tsit-má ê民眾大部份lóng已經m̄ bat經歷khoo-lé-lah參腸仔熱大流行ê時代，只是逐年lóng ài接受khoo-lé-lah ê預防注射，可能猶原是年歲khah濟ê民眾ê共同記持。俗語講「鐵拍ê身體bē堪得三工ê làu屎」，「喙食，hōo kha-tshng坐siàu」是khah早社會相當sù常ê代誌。
Tuè公共衛生參醫藥科技ná發達，親像khoo-lé-lah參腸仔熱hit類細菌所引起ê傳染病，tsit-má tī khah先進ê國家lóng已經tsiânn少發生疫情；罕得發生ê病例，mā lóng ē得有良好ê藥劑thang好治療。M̄-koh，世界人口ê大量增加以及交通ê發達，現時代致著病毒性傳染病ê民眾suah ná來ná濟，因為病毒有逐不時發生突變ê特性，所以病毒感染也tsiânn做現代人類上主要ê致病原因之一，而且mā是現代醫學tsiânn歹應付hām應付bē了ê頭疼課題。
參「喙食，hōo kha-tshng坐siàu」相關ê病毒性症頭，上引起逐家注意--ê，應當就是tsit一、二十年來逐年lóng ē發生ê腸病毒。腸病毒ê種類tsiânn濟，腸病毒ê感染是現代人類感冒ê致病原因之一，受腸病毒感染ê患者，làu屎mā是時常有ê症頭之一。大部份腸病毒ê症頭tī現時代lóng bē有啥mih大代誌，只是近年有一寡仔惡性ê腸病毒流行性明顯增加，一寡仔小朋友致病了後發展做嚴重ê病症，甚至有過往ê情形。科學家發現，惡性ê腸病毒主要是用手接觸了後經由喙舌傳染，所以學校參家庭環境衛生ê維護，以及小朋友tsia̍p洗手ê衛生習慣，tsiânn做防止腸病毒湠染ê重要khang-khuè。畢竟對致著腸病毒ê小朋友來講，病毒經由「喙食，hōo kha-tshng坐siàu」iáu算是小事，用性命坐siàu he tsiah是大代誌。
M̄-koh tsit-má，逐家上kài驚惶ê病症，應當就是全世界tng-leh流行ê新冠肺炎。新冠病毒ê傳染能力tsiok驚--人，引起ê疫情非常兇惡——主要經由喙、鼻、iah是目睭傳入患者ê身軀，而且世界衛生組織mā有公佈講不明原因ê làu屎是新冠肺炎ê臨床條件之一，所以新冠肺炎mā ē-sái算是「喙食，hōo kha-tshng坐siàu」ê病。只是新冠肺炎ê症狀虛虛實實，夯--起-來若變做重症，m̄-nā ē引起肺部嚴重ê病症，mā tsiânn容易造成往生iah是tài病尾ê不幸結果。目前短短ê一年外內底，tī全世界已經造成數百萬人死亡，ē-sái算是tsit幾十年來上嚴重ê傳染病。
新冠病毒ê傳染性參變異性lóng tsiânn kuân，因為算是一款人類ê新型傳染病，所以包括預防射hām治療藥物ê發展lóng iáu無成熟參夠額。民眾若beh避免受著傳染，逐家暫時tio̍h-ài減少無必要ê鬥陣參接觸。除了照病毒kap疫情ê發展，主動配合政府ê安排去接受各階段預防注射，tī個人ê衛生方面mā ài養成掛喙am，而且適時洗tn̄g iah是消毒身軀參雙手ê習慣。徛家衛生方面除了加強清理參消毒，mā ài注意厝內空氣ê流通。
喙食包括主動ê飲食以及無意中經由喙舌ê感染，一下無拄好就ē引起各種ê病症。Làu屎是khah早喙食無細膩所引起ê病症中上sù常發生ê症頭，iau-sâi koh無重視衛生ê人mā上容易致著tsit類ê症頭。Tī lán台灣有「喙食，hōo kha-tshng坐siàu」tsit句俗語，除了強調注意飲食衛生ê重要，而且koh-khah tsia̍p hōo人用來king體一寡人kan-na ē-hiáu貪圖一時ê快樂，lóng無去想講是m̄是ē產生嚴重ê後果。
親像tsit-má政府為著beh控制新冠肺炎湠染所實施ê各種管制，難免ē造成逐家生活上ê無方便。有一寡人無tshap各種ê禁令，違法進行pua̍h-kiáu、烘肉、iah是其他各種無適當ê群體娛樂，tsit款ê行為m̄-nā家己容易受著病毒感染，而且mā有可能進一步湠染hōo koh-khah濟人。到時tsūn除了家己「喙食，hōo kha-tshng坐siàu」，而且也有可能造成家己hām別人受著重病甚至死亡ê威脅，所以逐家tio̍h-ài忍受暫時ê不便，千萬m̄-thang做出違背疫情管制ê行為。
「喙食，hōo kha-tshng坐siàu」雖然講有tang時仔並m̄是「惡有惡報」，只是m̄管是飲食hām環境衛生，iah是日常ê觀念hām行為，lán猶原ài儘量避免「喙食，hōo kha-tshng坐siàu」事件ê發生。
#Lán來講看māi 專欄，本文使用教育部推薦漢字kap臺灣閩南語羅馬字拼音方案。
台文通訊BONG報328期，2021年7月出刊。
--------------------------------------------
歡迎捐款贊助 李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
