作者：侯岱君
M̄知tuì tang時開始，「ma-lá-sóng（『馬拉松』）」tsit項運動變kah tsiânn時行。疫情爆發進前，逐場ma-lá-sóng ê宣傳一下貼--出-來，就有幾若千人，甚至tsiūnn萬人sio爭leh報名。報名費mā無俗。若是報名十公里--ê上無mā ài六、七百箍，koh-khah免講報名半馬iah是全馬，一張大張--ê iáu無夠。雖bóng報名費無俗，逐場參加--ê也是tshah-tshah-tshah。
M̄-koh反倒tńg來講，若無報名參加活動，「走」其實是一項m̄免成本ê運動。無親像去健身工廠iah是World Gym，「走」m̄免交會員費，mā無親像拍網球、羽毛球，ài交場地費，koh ài有球伴。「走」kan-na需要一雙鞋，無時間iah是年歲ê限制，隨時lóng ē-sái開始。除了tsia--ê，ma-lá-sóng hōo人tsiah-nī痴迷上主要ê原因，是因為「走」ê速度慢，無親像駛車iah是騎oo-tóo-bái，速度慢tsiah ē-sái kā一个城市、一粒山、一面潭看hōo詳細，斟酌體會伊ê suí。
Tī 2015年，一个好朋友招我鬥陣參加「高雄萬人城市ma-lá-sóng」ê活動。He是我ê第一場ma-lá-sóng，只有走短短五公里。M̄-koh tī活動進前，我罕得走，所以hit-tang-tsūn感覺五公里根本是無可能ê任務。Tī我走tńg來終點ê時tsūn，hit-lō內心ê樂暢，hit種激動，到tann我iáu-koh ē記--得。Tuì hit-tsūn開始，我mā kap人leh時行走ma-lá-sóng，tuì五公里、十公里開始，後尾，我lóng參加半馬21公里，上長bat走過日月潭一輾29公里。
Iáu ē記得hit擺走日月潭，hit工天iáu未光阮就tī「向山遊客中心」集合，天氣kài寒，熱身ê運動bē-sái凊彩。銃聲一下響，逐家就起行，照家己ê速度走。我沓沓仔走，khuann-khuann仔欣賞tsit个藏tī山群當中、國際出名ê日月潭。Hit擺，tuì天iáu未光到日頭炎，我tuì無仝款ê方向，kā日月潭看kah真斟酌。我上愛拍phú仔光ê日月潭，日頭hōo山tsa̍h--leh，四箍liàn-tńg ê山倒照影tī水面，看--起-來是紫藍色，有淡薄仔神秘，水面無痕hōo我感覺真恬靜，伊ê suí hōo我kā ma-lá-sóng ê疲勞lóng放bē記--得。
走ma-lá-sóng ê過程就親像人生。頭起先力草真飽，mā真好奇，看著心適ê mi̍h件iah是路邊ê suí花ē提手機仔出來hip相，聽著粟鳥仔聲感覺精神tsiânn好。愈走ē開始感覺忝，m̄-koh mā ē愈專注tī「走」tsit件代誌。
就親像人生ê路上lán ē拄著競爭者，尤其是細漢讀冊ê時，lóng ē hōo人提來kap厝邊兜hit个阿明iah是阿美比較，tī「走」ê一路上ē出現幾个家己設定ê『假想敵』，尤其看著身材tsiânn好ê阿妹仔，就想beh走比伊khah緊，gōng想家己ke走--寡身材就ē-sái kap伊仝款，『假想敵』mā是hōo lán進步ê來源。若我leh講，lán拄--著ê競爭者就親像『假想敵』，其實人根本無beh kap lán比phīng，是lán家己leh看bē開。M̄-koh，人到一个歲數就bē kap人比，koh愈看重--ê是家己本身。
走ma-lá-sóng mā是。走愈遠就ē kā khuì力囥tī家己身軀，愈專注tī家己，ē-tàng真清楚聽著家己ê喘khuì聲kap跤步聲。上辛苦--ê是走kah差不多17、8公里，體力消磨已經beh盡磅，tsit个時tsūn就是靠家己ê意志leh kīng，兩肢跤ná親像m̄是家己--ê，正跤、倒跤、正跤、倒跤kánn-ná機械leh行。
有tang時，忝kah想beh放棄ê時tsūn，路邊ē出現一陣人huah「加油、加油！」，有tang時拄好看著一句鼓勵ê kha̋ng-páng，就koh有khuì力繼續向前行。Lán lóng ài相信，m̄管拄著偌濟困難，性命總--是ē揣著出口。喙齒根咬--leh，繼續向前，走--leh、走--leh就ē到終點。啊！我走tńg--來--ah！M̄敢相信我竟然完成--ah！原來，我mā ē-sái tsiah-nī韌，tse是一種贏過家己ê勝利感，後一擺對家己ē有koh-khah大ê信心，接受挑戰。
2019年2--月我參加高雄國際ma-lá-sóng，he是我目前上尾一擺ê半馬。後--來因為破病，超過一冬ê治療，藥物消磨我ê體力，我就無法度koh tuè人參加ma-lá-sóng--ah。Hit-tang-tsūn我有一个做護士ê學生khà電話hōo--我。伊kā我講，面對癌症就ná親像走ma-lá-sóng，ài走tsiânn久，一定ài有意志。一聽著ma-lá-sóng，我ê鬥志就hōo激--起-來，因為我知影，我有超過20擺成功ê經驗，我有信心接受tsit个挑戰，面對tsit个敵人，我m̄驚，我mā絕對ē贏，因為我是一个ma-lá-sóng跑者，我mā是一个性命戰士。
