主講／賴澤君、李添培
記錄／黃悅綺
樂生療養院是日本政府tī 1930年起--ê，本底號做「台灣總督府癩病療養所樂生院」，是beh強制收容「漢生病」（Hansen's disease）患者ê所在，有百外个患者hông關tī tsia，而且koh禁止in結婚生囝，後--來收容ê患者愈來愈濟。戰後，tsia繼續收容漢生病患者，中華民國政府kā改名做「台灣省立樂生療養院」，目前是綜合型地區教學病院，日本時代起ê舊院區民間俗稱樂生院。
「漢生病」tī華語koh號做『麻瘋』，tī台語koh號做「thái-ko病」——tsit款khah有偏見ê叫法。漢生病tsit个名是tuè醫生ê名Hansen（編按：發現漢生病病原體ê醫生）來號--ê，tse是一種『桿菌』引起ê慢性病。若是染著tsit種病菌，伊ē食lán身軀ê皮膚kap神經，受著感染ê部位ē麻痺、失去控制，hōo病人ê跤手、五官變形。到尾，跤手就ē「khah歹勢」1，若嚴重甚至ài動手術kā切掉。Hit當時醫療ê技術iáu無hiah發達，無法度治療，加上khah早大眾對tsit款病無了解，認為tsit款病tsiok gâu uè--人，感覺tsiok驚惶。現此時藥仔已經發明，漢生病ē-tàng得著控制，koh大部份ê人lóng有免疫力，tsit款病bē烏白uè--人，就算有受著感染，冗早治療mā bē有啥mih病尾。
日本時代，日本政府感覺tsit款病真見笑，tsiah起tsit間樂生院，kā所有感染漢生病ê病人全部送到tsia隔離。樂生院內底有徛一塊「日本皇后御歌碑」，到戰後hōo人kā內容改做「以院作家，大德曰生」，意思是ài患者in規世人lóng留tī tsia。漢生病友m̄-nā ài承受身軀ê病疼，koh ài忍受社會ê眼光kap排斥。Khah早是政府強迫in kā病院準厝，一直到1991年規劃beh起捷運新莊機廠ê時，病友已經蹛kah慣勢慣勢--ah，suah m̄准in koh踮tsia繼續生活。
政府、捷運單位kā大眾講，為著「公共利益」、「國家重大建設」，tio̍h-ài kā樂生院拆除，thang好起捷運機廠ê工程——bē輸「樂生院保存ê問題」kap「hōo濟濟人交通利便ê重要建設」ē起衝突仝款。2002年動工開始beh拆tsia-ê建築，老院民走tsông抗爭告官府，輿論一句「耽誤國家重大建設，你kám賠ē起？」反應出外界ê眼光，mā造成樂生院民ê傷害。
Khah早院民hōo人強制關tī樂生，尾--à koh beh強制趕in搬離開。落尾政府有起電梯大樓beh hōo in蹛，m̄-koh tsia-ê病友跤手「khah歹勢」，ài坐代步電動車tsiah有法度行動，新ê電梯大樓suah kap一般無特別替漢生患者設計ê病院仝款，無夠額ê空間hōo代步電動車活動。Tī電梯大樓內底，代步電動車ài se̍h幾若liàn tsiah有法度se̍h頭，出入真無方便，koh有ê病友無tsíng頭仔來tshi̍h電梯，若是beh逃生更加是困難。院民若是tī樂生院，ē得坐電動車來peh崎kap行動，tsit个因為外界誤解、無人要意ê所在，環境kap大自然真倚、有老樹做伴，日頭光掖--落-來，是一个適合養病ê所在。
2005年文建會按照《文化資產保存法》kā樂生院編入「暫定古蹟」， m̄-koh社會iáu是有無友善ê眼光kap對漢生病友ê歧視，可見lán iáu有濟濟需要拍拚ê所在。樂生保留運動ê參與者要求日本政府ài對進前錯誤ê隔離政策會失禮，koh tshui-sak立法《台灣漢生病友人權保障條例》，lán政府tio̍h承認對漢生病友人權ê傷害。2009年，樂生院hōo IDEA Taiwan（國際愛地芽協會台灣分會）推薦做世界遺產，落尾文建會mā tī仝tsit年宣佈樂生院是台灣第13个世界遺產潛力點。阮希望有koh-khah濟人來關心tsit層代誌。
「樂生療養院」雖然號做「病院」，suah是人權ê傷痕，mā是台灣漢生病治療史真重要ê見證。保留tsit个歷史空間，m̄-nā是留hōo院民一个適合生存ê所在，mā thang hōo台灣社會對「病患人權ê議題」重koh反省kap思考。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
