主講／蕭長展
記錄／顏郁珊
台語sa攏有 - YouTube 頻道
最近國際情勢實在無啥平靜，代先是露西亞kap烏克蘭sio戰，koh來是聯電ê董事長曹興誠宣佈beh捐30億強化國防，lóng hōo台灣民眾開始關心戰爭kap全民國防ê議題。M̄-koh tī tsit進前，逐家可能對「全民國防」ê概念khah生份，台灣為啥mi̍h需要全民國防？面對戰爭危機，lán ài有啥mih準備kap心態？
其實台灣自以前就一直活tī戰爭ê危機之下，中國直直用包圍、傳播假消息ê「混合戰」製造驚惶。經過統計，有六成ê台灣人認為tsit-má無可能發生戰爭，背後原因除了長時間ê威脅hōo民眾感覺kánn-ná無啥嚴重，iáu-koh有媒體hōo lán掠準lán無能力thang對抗。但是目前ê情勢無仝，tuì烏克蘭戰爭，lán ē-tàng看著啥？Kám beh重koh評估lán ê做法？
Kap台灣比--起-來，別个國家其實lóng tsiok早就開始做相關ê準備--ah。比論講瑞士、Latvia（『拉脫維亞』）、Lithuania（『立陶宛』）。Tsia-ê準備包括有強化國防、基礎建設。Suà--來就是心理方面ê準備，政府ē透過發行「民防手冊」kā in ê民眾宣傳相關ê觀念，內容有：「若是發生戰爭，beh做啥mih準備？民眾ài按怎tī戰爭當中生存？若是拄著困難，beh去佗位揣人tàu-sann-kang？」手冊內底kā各種狀況，iáu-koh有應變方式lóng寫--出-來。透過手冊ê內容kā民眾宣傳觀念，mā建立、加強國民ê信心、意識能力，hōo逐家團結--起-來。真濟國家面對戰爭危機ē有相關ê防備方式，m̄-koh台灣就khah欠缺tsit方面ê訓練。
蕭長展認為，面對危機，lán mài叫是家己ē輸，應該ài有準備，若真正發生戰爭tsiah有法度應變。Mā因為台灣民眾kap其他國家比--起-來意識khah低，所以沃草團隊就參考各國手冊hām台灣法律，編寫一本「公民行動指南」。Tsit本指南ê內容kā發生戰爭了後民眾ài面對ê情形寫--出-來，提供參考kap準備ê範本。
若有一工，台灣發生戰爭，lán ài先對現代ê戰爭方式有大概ê了解。Tsit-má ê戰爭手法已經kap khah早無仝，主要ē透過網路戰爭、傳播假消息，tuì重要地點發動空襲ê方式進行，iáu-koh有敵方tī政治上ê行動。面對有可能發生ê情勢，lán代先ài建設家己ê心理防衛機制，對消息來源斟酌思考，聽--著ê一寡消息真有可能是敵方放--出-來--ê。Koh來，mā ài了解各種災害ê應變方式，知影空襲避難、緊急避難ê所在。上尾是準備緊急避難ê揹仔，內底ài tshuân水、糧食、刀仔、收音機、證件、寄金簿仔kap緊急疏開地圖，幫助你度過等待救援ê時間。
Tuì烏克蘭、露西亞戰爭當中，lán看著真濟thang學習ê所在。面對外來危機，lán ē-tàng做--ê是比lán所想--ê koh-khah濟。Lán做台灣公民，先好好仔保護家己，了後若有能力，做一寡實際ê行動支持：捐助物資、hip相通報敵情，做伙發揮國民團結ê力量。M̄是軍人，mā是ē-tàng做tsiok濟代誌。
行動，ē-tàng tuì tsit-má就開始！去做兵，學習防衛急救技能，製作家己ê行動指南，加入各地ê民防團隊lóng是真好ê開始。根據統計，有超過六成ê民眾講in願意保衛台灣，台灣民眾普遍是非常有意願--ê。而且現代防衛ê重點是：夠額ê軍事力量kap thang應付災變ê民眾。其實有真濟台灣人tng-leh做保衛台灣ê準備，面對tsit个議題，lán ē-tàng kā想做是民眾之間ê互相幫助，lán面對ê敵人tsiok厲害，也因為án-ne，koh-khah需要團結、互相幫贊ê心。自tsit-má開始行動，培養意識，發揮民眾ê集體力量，開始關心全民防衛。
