作者：紀品志
林智美教授用台灣話翻譯in老母楊千鶴女士ê小說〈花咲く季節〉（花開ê季節），tann beh正式出版--ah，真恭喜！台文版講是翻譯，有一部份徛算也是回復伊ê「本來面目」，用楊女士ê母語來講tsit个故事，完成伊一个心願。小弟我也真歡喜，受著林教授邀請，tàu做台文ê khang-khuè，陪伴伊完成tsit項記念老母ê工程。
〈花開ê季節〉台譯原由
2021年，拄拄是楊千鶴（1921～2011）100歲kap別世十年，也是tsit个工程ê起頭。Hit年9--月，阮加拿大多倫多台灣語文中心tī網路頂辦台語文研習，林智美教授uì美國報名參加。本底我m̄知伊是楊千鶴ê查某囝，研習總籌備張秀滿女士kā我紹介tsiah知影。
秀滿姊kā我講了，tsua̋nn hōo我想起bat tī《台文通訊》早期資料讀著一篇文章。Hit-tsūn楊千鶴女士受婦女會邀請，來加拿大東部演講兼tshit-thô，sīn-suà接受《台文通訊》採訪，林智美教授也有做伙來。當時ê主編兼記錄就是秀滿姊，文章刊tī《台文通訊》107期（2003年1月號）。
Hit篇〈人生ê三稜鏡——訪問楊千鶴女士〉短短--à，m̄-koh內容不止豐富。有講著楊千鶴70幾歲出版回憶錄ê代誌、伊對1930、1940年代hiàng時ê作家（像賴和）ê印象、當時女性作家ê情形、對台灣ê民族認同、比較日本kap中國兩个殖民時代台灣文學ê發展、台灣人語文轉換ê艱苦……種種話題。Koh有一點真寶貴，訪談是用楊女士ê母語台灣話，koh用台灣話kā寫--出-來。內面楊千鶴有講起伊對台灣語文ê看法，以下摘一節：
［編輯組］問：「你bat講--過，你感覺真無彩，無辦法用你ê母語來寫文章。你對台文寫作有啥mih看法？」
［楊］答：「我感覺真好，就親像lán teh講話，真親切，是真正台灣人ê語文。我希望台文ê寫法ē-tàng早一日一致，hōo beh學ê人khah容易。（……）」 (1)
可惜tsit篇訪談tī目前所謂ê主流「台灣文學界」罕得有人注意。
我hit時kā林教授提起tsit篇beh 20冬前ê訪談。凡勢是án-ne，伊tsiânn感動，講tsiah-nī久--ah，iáu有人ē記--得。
研習期間，林教授tsiok認真koh tsiok用心，180幾个報名ê學員中間，伊是優等生，最後koh家己做影片、寫台文字幕來分享。研習有安排幾節課（台語文概論、羅馬字、輸入法工具等等）是我主講，伊課後來問我真濟台語文ê問題。
大概課程聽了對寫台文有信心--ah，無偌久林教授就開始試用台文創作，行動力一流。研習會結束，舊曆tih-beh 8月半，伊就用台文寫一首〈中秋〉ê詩hōo我看。Hit-tsūn伊mā起手進行囥tī伊心肝底ê計畫，beh將楊千鶴短篇小說〈花咲く季節〉譯做台文kap英文，來記念老母百年。
Koh過--一-站，林教授hām我聯絡，講tsit篇小說ê台文草稿伊已經寫好--ah！伊想beh拜託我kā伊tàu看，編輯內底所用ê漢字、羅馬字。我就kā答應，自án-ne協助伊做tsit个工程，一路陪伊討論、修改、查資料、聽錄音、揣出版社，不時加拿大、美國ah是台灣兩爿通話開講。透過林教授mā hōo我ke了解一寡íng過hit个時代ê代誌kap in母仔囝ê往事。
Tsit中間，我ê老母雄雄過身。我對老母最後ê記憶，其中一段是2022年年初tńg去台灣，2月28 hit日，阮母仔囝真罕得有閒做伙散步，行路去se̍h台灣文學基地。Hit搭是台北一塊真suí ê日本宿舍建築群，以早齊東詩社ê所在。Suah真拄好，阮tī hia看著一个「拾藏：臺灣文學物語」ê展覽，有一塊牌仔teh介紹楊千鶴，是少年作家楊双子寫--ê，幾年前伊也有出一本仝名ê小說《花開時節》，算是向楊千鶴致敬。我歡喜kā阮母--à講，我kap楊千鶴in查某囝有緣熟sāi，tng-teh幫助伊處理楊女士〈花開時節〉ê台文版，koh hip hit塊牌仔寄去hōo蹛tī美國ê林教授看。現場有一位做導覽ê女士聽阮母仔囝teh講台語，也真用心用台語kā阮講解。林教授收著相了後，kā我講齊東詩社hia是日本時代ê「幸町」，就是楊千鶴ê好朋友後--來ê徛家，〈花開時節〉小說內底ê朱映kap結尾拄出世hit个嬰仔大漢出國進前蹛ê所在。Hit日散步真好天，老母坐tī文學基地日本式ê文學厝，面仔笑笑、目睭有神，是我kā阮母--à hip ê最後一張相，我深深記tī心肝底。
阮老母過身了後，我也有受著林教授ê安慰kap關心，真感謝--伊。雖然心內艱苦，日子也tio̍h過，台文〈花開ê季節〉tsit項khang-khuè對我ê心情也有幫助。我kā林教授講：Lán做伙做一項記念老母ê代誌。
Tann冊beh正式出版--ah，感覺完成一條重要ê代誌，也為林教授母仔囝歡喜。我感覺tsit个成果是向所有拍拚ê女性、用心付出ê台灣母親致敬。
用台灣話koh來講〈花開ê季節〉tsit个故事ê意義
濟濟「台灣人」有一个共同ê感慨——tī台灣出世、大漢、生活，suah有真濟台灣ê代誌lóng m̄ bat。Lán對在地ê歷史、文化無了解，有tsiok濟故事lán lóng無聽--過。
如今〈花咲く季節〉beh用台灣話出版，有幾若層ê意義，也照見一世紀以來台灣社會種種變化kap隔斷：智識菁英／世俗大眾、統治者／被統治者、外來／本土、男性／女性、日本文化／中國文化／台灣文化、台北／下港、都市／草地等等。Tsit篇1942年受高等教育ê台灣女性用日文所寫ê台北城故事，經過80冬伊ê查某囝林教授tī美國用台北腔ê台灣話講--出-來，為台灣文學發出一个無仝款ê聲、講出一个罕得聽--著ê故事，無論按族群、性別、語言、文學、歷史ê角度來看，lóng tsiok特別。
楊千鶴1921年tī台北出世，台北女子高等學院畢業，kap現此時大專ê程度相當。伊是hit-tang時極少數受高等教育ê台灣女性，運動也gâu、文武雙才，是台灣頭一位女記者。1942年，楊千鶴tī《台灣文學》發表小說〈花咲く季節〉，內底寫著日本時代ê台北城，講受高等教育ê女性拄beh卒業，面對婚姻、友情、幸福種種人生ê大海湧，in ê心思kap命運。因為故事大部份是伊親身ê經驗，寫了特別真。
戰後，政治、語言、家庭環境種種ê緣故，楊千鶴停beh半世紀無寫。漸漸台灣人也lóng m̄ bat--伊，像lán m̄ bat家己ê過去。
台灣經過日本帝國、中華民國政權轉換，文化發展不接一。幾若世代ê台灣人，hōo人教做日本人、中國人，又koh經過戒嚴、白色恐怖，變做無家己ê話語權kap主體性。Koh一方面，女性tī家庭、社會tiānn-tiānn是無聲無sueh、恬恬付出ê角色，in ê心聲mā khah無人聽--見。
Bat聽林教授講起，íng過伊kap兩个小弟對老母過去所寫--ê、伊ê文才、日本時代ê文壇種種，lóng無真了解。楊女士無想beh教in三个囡仔日文，伊也m̄愛學中國話、寫中文，厝內iáu是講台灣話。可見楊千鶴感覺台灣人受日本教育、用日文寫作是不得已；到日本人走了後，迎接--來--ê suah是新ê壓迫。Tse tī楊千鶴ê一寡訪談kap回憶錄內底也感受ē著。
楊千鶴到70歲左右tsiah因為一寡機緣koh出現tī文壇活動，寫出回憶錄《人生のプリズム》（人生ê三稜鏡），講起以早ê代誌。其間，林智美教授陪in媽媽參加講座，用心替伊整理、翻譯文稿，幾冬後出版華文譯本《人生的三稜鏡》kap作品集《花開時節》，hit-tsūn林教授tsiah對老母kap íng過ê代誌有khah了解。過去無講、bē-tàng講ê心聲，tī作品內底tsiah讀--著。
一代一勻中間難免有一个崁tī--leh、bē輸隔一个山溝，m̄-koh好ê故事ē代代相傳，tshuā人盤山過水，入去無仝ê時空kap世界，也hōo人sio理解、sio疼thàng。楊千鶴女士、林智美教授kap林教授ê查某囝，媽孫三代分別受日文、中文、英文ê教育。語言上，連接--in--ê是厝內代代口傳ê台灣話。也ē-sái講，台灣母語是台灣文化ê臍帶。台灣人應當有家己ê文學，也是siâng一樣ê意義。以我淺見，in三代協力ê〈花開ê季節〉日中英台四語文出版計畫，其中台文版應該上有關鍵性ê意義。
〈花開ê季節〉台譯本ê語言特色
台譯本tī語言方面有兩項特色：第一是tsit个台北城ê故事是用in厝內ê台北腔來講；第二是楊女士、林教授兩代成長kap受教育ê語文環境分別是日文kap華文，tse也反應tī台譯本。四種語文ê版本來講，大概台譯本上有法度表現。
1. 台北城ê故事用台北腔講
其實平平台北人，無仝所在、無仝年歲ê人腔口uân-á有精差。林教授in爸母所講ê腔，照方言地理專家洪惟仁教授分類是kā號做「台北泉山腔」ah是「安溪腔」，範圍大約是in家族生活ê台北南門口、大安，一直到文山、台北盆地東南面，三峽、坪林、汐止ê所在。Hia ê腔有khah重ê泉州話味數，也kap市區北爿、倚淡水河ê「同安腔」ah是台北現此時ê偏泉通行腔小可無siâng。
Tsit款老泉腔本tsiânn tī台灣就khah弱勢、有寡音khah特殊（像央元音-ir、-er），koh台北有真濟外地人徙--入-來，致使台北腔ê特色自án-ne一代一代漸漸愈khah薄--去，tsit-tsūn khah罕得聽--著。M̄-koh 70幾歲ê林教授講話iáu保留bē少。
雖然人講「離鄉不離腔」，長久做一个通行語，逐種方言總--是lóng ē sio-lām，北美同鄉之間講台灣話大部份也khah偏通行腔。若是腔khah「重」ê人，uân-á ē看對象ke減調整家己ê口音，ah是tuè別人講。我有注意林教授teh開講、發言ê時有tang仔mā ē改換，kā家己ê腔am-khàm--起-來。
我kā林教授校正台文、拍羅馬字ê時tsūn，請伊照伊ê翻譯稿大聲唸看māi，也鼓勵伊家己錄音，盡量照原本in厝--裡講ê台北口音，mài換通行腔來唸。一--來án-ne khah好修訂伊所寫ê台文，二--來mā thang保留伊印象中厝內ê腔，我就按照錄音轉寫做台羅。校對ê中間，阮也有參考楊千鶴ê錄音做對照、確認。公視1999年《世紀女性，台灣第一》記錄片有一集訪問78歲ê楊千鶴，是真寶貴ê第一手資料。
故事內底ê台北腔，像：「lír-ha̍k-hāu（女學校）」、「berh（欲）」、「khìr（去）」、「kèr-sin（過身）」、「pīnn-ìnn（病院；尾字講陰去聲）」、「bô sâng（無siâng、無仝）」、「siah（煞；轉接詞）」，tsit寡詞tī楊千鶴訪談錄影mā ē-tàng聽--著。其中hit个「siah」，普通腔講「suah」，台北一寡老輩有講「siah」，比如北投ê作家黃元興醫師ê錄音mā有，但是大部份詞典、文獻lóng無記錄tsit款台北方音。
另外，林教授ê錄音koh有「ta-poo（查埔）」、「hī（耳）」、「phī（鼻）」、「bêr（糜）」、「sang-hí（雙喜）」、「sin-ku（身軀）」、「buē-iáng-kín」(2) 等等，也kap目前台灣通行腔ê講法khah無仝，凡勢有ê人m̄ bat聽--過。
2. 現代台語譯本ê日語、華語成分
楊女士、林教授兩代成長ê語文環境mā反應tī譯文內底。日語部份，原作有寡日語詞若符合台語常用借詞、時代文化背景、楊女士厝內習慣，林教授ê譯文有看款保留，採用日語借音ah是借日文漢字詞唸台語音來呈現。以下舉幾个做例：
●台語常用借音詞：「sia̋n-pái（先輩）」、「sàng（さん；尊稱ê用語）」、「li-á-khah（リアカー；拖車）」
●日文漢字詞借詞：「休憩所（hiu-khè-sóo）」、「履歷書（lí-li̍k-sir）」
●時代文化：「Kha-tá-kú-lah通（片倉通；日本時代台北西門町街區ê名）」、「én（円；日本錢）」、「tshia̋ng-bá-lah（チャンバラ；刀劍武鬥）」、「Lop-pah（古川ロッパ、古川緑波；1930年代日本代表性ê喜劇演員）」
●楊女士厝內慣用日語詞：「be-bí-hú-kuh」（ベビー服；嬰仔衫）
戰後台語也有變化，借真濟華語詞、受著華語影響。台譯本ê意義一方面當然是想beh用楊千鶴ê母語來講tsit个故事，但是另外一方面，現代譯本也m̄是beh完全「回復」作者1940年代講ê台灣話，事實大概tsiânn困難也無實際。
Tsit个現代譯本，除起保留一部份傳統台北腔kap日本時代用語，大體來講是照譯者林智美教授kap現代台灣讀者ê習慣，所以也有寡現代俗音、通行音（像「寂寞」講「siok-bo̍k」，無用古早音「tsi̍k-bo̍k」；「欽佩」講現代俗音「khim-phuè」）、近代華語借詞等等。校編ê時，大部份ê用詞、話句、發音以譯者本人慣用、唸ē順做原則。
結語
真榮幸因為台語文研習ê機緣，我有機會thang參與tsit項工程，為楊千鶴女士做tsit本百年記念譯本。
恭喜林教授三代協力完成〈花開ê季節〉四語文出版ê大工程。我想tse是全世界台灣文學讀者ê福氣，也是台灣文學真有時代意義ê代表作。
（Tsit篇是《花開時節（花咲く季節）四語文新版》ê序。）
