作者：亞茱
2012年3月初3，台灣派藝術工作者王國柱老師，tī台南市立新營文化中心第三畫廊、雅藝館展出「二二八專題展」，熟sāi ê朋友來tī阮ê所在展出，阮歡歡喜喜去參加伊hit日下晡3點舉行ê開幕式。無料著tsit場盛會，m̄-nā是藝術ê交流，koh hōo我發現著一个母語ê世界。
我是1950年出世--ê，1964年就行入寫作ê路。Hit个時代，逐家lóng tī國民黨ê「國語教育政策」下學華文、講華語，像我tsit種愛讀冊ê囡仔，華語學kah liù-liù叫，寫華文mā是高手。14歲開始投稿就ná小作家，尤其是tī兒童文學方面。一路行--來，不時tio̍h獎，tsiânn做社會公認ê兒童文學作家，m̄管是童話、故事、童詩、兒歌、少年小說……出幾若本冊。
一直到40歲以後，有一擺tī『童詩和兒歌』ê研習會中，我主講「兒歌」，課中，我kā細漢ê時阿媽教--我ê台語囡仔歌，大量提出來做「舉例」——「 講台語--ooh！好大膽！」學員lóng是學校ê校長、教師，專門leh監督學生、檢舉別人--ê，其實大部份tī家己厝--裡mā iáu是有leh講台語，我上課「用舉例做借口」公然講台語，in會心一笑。
會後有學員問--我，lán tsit个研習了後必須寫一首囡仔歌交作業，kám ē-sái寫台語ê囡仔歌？已經出版幾若本華文囡仔歌ê我，一時之間，想起家己，哪ē lóng無想著用阿媽教--我ê母語創寫新ê囡仔歌neh？
Hit當時我ê回答是：可以，m̄-koh，用字是一个問題。
確實，大部份ê人台語ē-hiáu講，suah m̄知台文beh按怎寫，tse是tsiok困擾ê代誌。
我感覺我用華文寫ê mi̍h件已經也有夠濟--ah，決定此後用母語寫作。我開始注意有關台文ê參考資料，有相關ê辭典、字典，就買--起-來。Hit當時有幾若派台文專家，隨人堅持維護家己ê主張，吵吵鬧鬧；想beh用台文寫作ê我，親像一隻孤單ê小船，跳開hit隻華文ê大船，tī茫茫大海中漂流，m̄知beh倚佗一隻台文ê船khah好。我家己練習無仝派別所主張ê寫法，逐工用新文字寫日記，體驗無仝款台文寫法ê長短，有一段bē短ê時間，無法度順利寫作。愛寫ê人，無寫ē艱苦，落尾tsiah採用有漢字就用漢字，揣無適當漢字--ê就用羅馬字，án-ne雜lām，先寫--起-來，字ê問題，以後tsiah講，寫好ê作品就lóng儉tī電腦資料giap仔內。
2000年ê時，我寫ê台語囡仔歌得著文建會「台灣兒歌100」徵文比賽ê優選，也參與台南縣南瀛台語冊教材編寫——對台文寫作，kánn-ná有信心，suah是無把握，tshenn-mê牛，頭lê-lê，一直衝。
參加國柱老師ê畫展開幕式hit日，會後beh請伊食飯，因為新營是阮ê「地盤」，阮ài盡地主之誼。國柱老師有特別介紹幾个新見面ê朋友，陳明仁先生、陳豐惠小姐……等，一行四五个，做伙來阮陶藝工作室用餐、lim茶、開講。阮ê工作室有展示各種陶藝作品，其中有幾若件我kā台語囡仔歌刻畫tī瓷仔枋頂面燒製--ê，豐惠小姐看著tsiânn歡喜，問我一寡問題——啥人寫--ê？有偌濟作品？有發表--過--無？我一个一个kā說明。
豐惠小姐表示，in有編一个台文ê刊物，明仁先生是社長，伊是副總編輯，我ê作品若是iáu未發表--ê，希望ē-sái hōo伊刊。我去挖電腦內ê mi̍h件，有囡仔歌、囡仔詩、散文……我老實kā伊講，我ê台文用字可能亂操操，伊講無要緊，伊ē看、編輯部ē處理。
真緊，新ê一期刊物寄--來--ah，2012年4月份，第217期，封面是海洋風情——tse是我第一擺看著《台文通訊BONG報》，雖然m̄是厚厚ê冊，m̄-koh規本lóng是台文--ê，我kánn-ná iau鬼看著tshenn-tshau，精神lóng來--ah！
我ê作品是一首紀念懷念鄭南榕先生ê詩。豐惠小姐ē先選tsit首刊出，可見tsit个刊物m̄-nā是推廣台文，mā是推崇百分之百言論自由ê基本精神。
Tī hit期ê第2頁，我看著「李江却台語文教基金會」創會由來ê介紹，tsiah知影，tsit个刊物ê精神來自李樹全、李江却翁仔某，in教育子女ài關心社會公益，後生李根塗kap八个查某囝、囝婿，lóng有遵照教示，熱心參與社會公益服務。李江却女士1990年3--月過身了後，查某囝李秀卿kap囝婿林皙陽為著siàu念--伊，捐款創設tsit个基金會，推動台灣母語復振事工。
我非常感動，活到62歲--ah，tsiah知影有tsiah-nī偉大ê代誌。1991年7--月《台文通訊》誕生，1996年10--月《台文BONG報》創刊，hit時我就tī台文海沐沐泅，suah一直m̄知影伊ê存在，真正是「不知不覺」啊！
Tsit擺看著〈台文通訊30週年徵稿啟事〉，tsiah覺悟我熟sāi著伊hit个時tsūn，伊已經20歲--ah。我一方面歡喜我tsit隻漂浪ê小船，倚著完全ha̍h味ê大船--ah，一方面也感覺真安慰，好佳哉，有tsit个機會kap緣份，tuì國柱老師、豐惠小姐hia牽起。我有大船thang倚，koh有碼頭thang靠，編輯部hōo我ê作品不時刊出，是tsiok大ê鼓勵，也促成我愈認真寫台文，支持刊物ê用心。阮捐出稿費，也贊助淡薄仔經費，到tann將近十冬ê時間，除了台文ê發表，有時我ê油畫、攝影作品，koh有我ê翁婿陳武鎮ê人權油畫作品，只要豐惠小姐提起beh做封面用，阮一定如期『使命必達』，hōo編輯部無償使用，做一種對《台文通訊BONG報》完全支持ê表示。
為著推廣台文，我開放「典傳舍」做「佗位看ē著《台文通訊BONG報》」ê地點，hōo想beh學台文ê人來看冊。除了ē-tàng hōo愈濟人看著tsit本冊，而且阮ē kā過期ê冊，送hōo有心ê朋友提tńg去研究，若有問題，逐家隨時ē-tàng來互相討論。
《台文通訊BONG報》徵文ê內容，並無任何ê限制，tsit十冬來我所看--著--ê，人權--ê、宗教--ê、愛情--ê、鄉土--ê、教育--ê、醫學--ê、科技--ê、環保--ê、戲劇--ê……啥mih題材lóng有，真正是包山包海。M̄-nā作者ē-tàng開放心胸，用台文放手創作，讀者也有thang接收著種種用台文傳達ê智識，對學習台文有非常大ê幫助。
而且，文體ê表現方式，也是五花十色——有嚴肅--ê，hōo人靜靜思考；有輕鬆--ê，hōo人歡喜欣賞；有悲情--ê，hōo人看kah目屎擋bē tiâu；有笑詼--ê，hōo人笑kah攬腹肚……
30冬--ah！一个tng勇ê年紀őo！我kap伊有十冬ê交情，hōo我滿滿ê溫暖。Tī tsia，beh祝福《台文通訊BONG報》繼續向前行，第二个30冬、第三个30冬……愈來愈壯大，tsiânn做超過一百年ê台文大樹，致蔭台文子弟，hōo台文揚名國際！
#台文通訊30歲 專欄，本文使用教育部推薦漢字kap臺灣閩南語羅馬字拼音方案。
台文通訊BONG報332期，2021年11月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
