Tī主內面同心合一
作者：So͘, Sēng Chong （台羅會會員 ）
Téng-goe̍h-ji̍t ê jī-saⁿ sī chi̍t ê tōa hó ê ji̍t-chí. Iām-san chip-sū mā tī hit-chi̍t-ji̍t chhōa sin-pū. Goán mā siū iau-chhiáⁿ khì kā in tàu-nāu-jia̍t. Kó͘-chá-lâng teh kóng, “Chúi-kóng-á ài tàu chi̍t ki pèⁿ, án-ni khah hó-gia̍h.” In ê kha-chhng mā ū tàu pèⁿ. In mā chiâⁿ hó-gia̍h. In-ūi in mā sǹg-sī tē-hng-siōng ū bêng-bōng ê hó-gia̍h-lâng.
Tī chái-khí-sî ê kiat-hun tián-lé téng-bīn, goán ū khòaⁿ-tio̍h sin-lông. I sī in sī-tōa-lâng ê thn̂g-sng-oân, seⁿ-chò chiâⁿ chiàng-châi. Só͘ chhēng ê se-chong mā chin phāⁿ neh! Sin-niû seⁿ-chò bí-lē koh tāi-hong. Iû-kî hit niá sin-niû-saⁿ bóe-liu thoa beh cha̍p gōa chhioh. Phēng khóng-chhiok ê bóe-liu khah tn̂g, koh-khah súi. Chin-chiàⁿ sī ū-kàu súi--ê--lah. Bo̍k-koài lâng lóng teh kóng “lông-châi-lú-māu”, m̄ sī bô goân-in--ê.
Sòa-chiap tiong-tàu tī Tâi-lâm Tióng-êng Chiú-tiàm chhiáⁿ lâng-kheh. Chē kap goán kāng toh ê lâng lóng sī kàu-hōe ê hōe-iú. Tāi-ke ū kóng ū chhiò. Chē tī góa keh-piah chi̍t ê bí-lē koh chiâⁿ ū khì-chit ê tiúⁿ-ló-niû tō khui-chhùi kóng i chiâⁿ ài chia̍h iû-pn̄g. Góa kā i kóng kin-á-ji̍t ê chhài-toaⁿ bô siá iû-pn̄g. Téng-bīn siá--ê sī âng-chîm bí-ko. Chóng--sī chit-má chin chē lâng bêng-bêng to chhut iû-pn̄g, kiat-kó chhài-toaⁿ lóng siá bí-ko. Ū khó-lêng siá bí-ko khòaⁿ--khí-lâi khah ko-siōng. Ōe-tê chi̍t khui, tāi-ke tō khai-sí thó-lūn iû-pn̄g kap bí-ko sī beh án-chóaⁿ hun-pia̍t. Ū lâng kóng iû-pn̄g sī kiâm--ê, bí-ko sī tiⁿ--ê. Mā ū lâng kóng iû-pn̄g sek-chúi khah chhim, bí-ko sek-chúi khah chhián. Nā-sī góa jīn-ûi bí-ko sī iōng tīm--ê, khah liâm. Iû-pn̄g sī iōng chhoe--ê, khah bô hiah liâm. Tāi-ke thó-lūn--chi̍t-khùn-á mā sī bô kiat-kó. Chòe-āu Sūn-an tiúⁿ-ló tō khui-chhùi kóng, “Hó--ah! Lín ta̍k lâng lóng mài koh sio-chèⁿ--ah. Thêng--ā nā-sī phâng--chhut-lâi, kā i khat lâi khǹg tī oáⁿ--lìn ê sî, he tō sī kiò-chò oáⁿ-ko. Só͘-í lín m̄-bián koh chèⁿ--ah.” Ta̍k ê lâng thiaⁿ liáu-āu lóng chhiò kah chiâⁿ tōa-siaⁿ. Ta̍k ê lâng lóng chiâⁿ jīn-tông i ê kóng-hoat. Góa teh siūⁿ, che mā sī chi̍t chióng lēng-lūi ê tâng-sim ha̍p-it.
Hit kang tiong-tàu só͘ chhut ê chhài-sek bē-bái, mā chiâⁿ hó-chia̍h. Góa teh khòaⁿ, chi̍t toh bô sio̍k--o͘h. Tān-sī tī hit kang tiong-tàu tàu-té goán sī teh chia̍h siáⁿ-mih oáⁿ-ko, ta̍k ê lâng mā m̄ sī chiâⁿ chheng-chhó. Iû-pn̄g kap bí-ko sī beh án-chóaⁿ hun-pia̍t tō iú-chhiáⁿ kok-ūi sia̋n-pái lâi soeh hun-bêng.
台灣羅馬字協會
#台羅會交流道 專欄，本文使用白話字。
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
