作者：李淑貞
2015年10--月政府通過，tī台灣做滿12年ê外勞免出境，若符合60分資格，ke延長兩年，上長14年。舊年4--月Parti三年合約到期，重新簽約，伊來台灣滿六年--ah。
合約到期前六個月，探Parti意思，lóng sak hōo翁，驚翁m̄答應，tńg去kap翁慢慢仔參詳，生活六年--ah，淺想其實伊決定就好！連suà六年無陪厝--裡過年，tsit擺按算歇兩個月，條件是來回機票，tsiah拍合約，歹面腔、口氣硬，感覺頷仔頸hông lîng--leh。Lán人6--月印尼過年，mā是齋戒月，來台灣ê印尼勞工tī tsit段時間tńg--去，驚that車，慢一禮拜歇假，最後阮答應。
Tńg來今年2--月台灣新正時，Parti簽證到期換證件，資料已經寄hōo公司，四個月時間辦證件ē赴tsiah tio̍h！等到5--月，無收著新證件，一下查tsiah發現台北làu-kau，拄公司年度活動歇一禮拜，佳哉證件無耽誤，寄--ê、買--ê，lóng無問題，感受著伊歡喜ê心情，m̄知問題tsiah beh開始……。
Tńg--去前一禮拜，落雨天，我出錢款四秀仔。三年前特別做塗豆糖、王梨酥，今年無做，錢省--起-來。Tńg--去時間一工一工接近，阮tshuah leh等，tńg--去前三工公司iáu無聯絡……。Parti按算6月11離開台灣，機票買好--ah，照理人ài提早三～五工接手。M̄知啥原因？已經配合六年，公司無消息？只好家己想辦法，小妹診所患者，tī中人公司做翻譯，拄頭擺tuì菲律賓來台灣，等體檢報告。阮決定beh換人，公司無歡喜，阮老客戶，人早就tshuân好，無問題，怪阮siunn緊張。拄印尼過年，全台灣欠工，假使m̄決定，就讓--人，踏真硬，阮當然答應，辭掉菲律賓外勞。
Tī Parti離開前三工，總算調來20 thóng歲，人kuân粗勇suí-suí ê印尼外勞——阿蒂，是為阮特別留--ê，時到日到，無khuì力計較，只要肯學，兩個月真緊結束！臨時調--來--ê，上重要是giú阿母手勢ê mê角，驚láng bē起，鼓勵--伊，giú ê部份阮ē tàu-sann-kāng，表情無把握，到下晡無細膩閃著腰，伸bē直。公司明知伊有身三個月--ah，伊為著趁錢甘願冒險。替外勞悲哀，萬一làu胎，阮負全部責任，上bái是小妹先家己來，公司假m̄知kā阿蒂tshuā--去，tang時有人來接手無答案？
隔工，公司調印尼A-mi來，拄雇主過身等接手，kan-na ē-tàng做一禮拜。Tsiah歡喜有人來接手，Parti去機場，無通知接送時間，阮tuè leh緊張。拄拜六公司歇睏無人接電話，手機khà規下晡lóng無回，Parti緊張kiōng-beh哭，按算包計程車，5,000箍伊出。阮beh等公司回消息，tsiah決定，thài ē是外勞負責車資？Parti面仔扁扁，無心食飯，行出行入：『車錢早就付了，以前會事先通知，為什麼今年沒聯絡上車時間？』Ài阮想辦法聯絡業務員，簡單坐車問題thài ē tsiah複雜，萬不一……，阮心內有上bái ê拍算！一直到暗時6點，tī台北渡假ê業務員總算回消息，安搭Parti免緊張，地址電話已經交ùn-tsiàng，暗時7、8點聯絡上車時間，心tsiah tiānn--落-來。Beh交代新人印尼A-mi，mā無時間，行一步算一步，「時到時擔當，無米tsiah煮番薯湯」來安慰家己！
車無問題，Parti有笑容，手緊無閒，喙雜唸：『我很不高興！上一次公司會提前通知，為什麼這次沒聯絡？』私底下kā公司問，是in bē記--得，進前lóng是tī暗時7、8點通知。 司機通知上車時間，確定無問題，逐家tsiah吐一口khuì！
時間一分一秒接近，大概1點來接，坐車時間確定，伊歡喜，阮是tshuah leh等——目一nih，過三年--ah，人蹛久hōo顧，等三年合約到換人，koh驚阿母bē ha̍h，「人質」tī伊手內，只有忍耐！人鬥陣久總--是有感情，離開前不時面phak tī阿母喙phué邊雙手緊so：『阿嬤，我要回印尼了，很快就回來，你要等我。』阿母知影，嘴翹翹激面腔！阮tuè leh安慰：「阿母--à！Parti來台灣真辛苦照顧三年--ah，lán ài hōo伊tńg去過年，翁kap囝lóng leh想--伊，真緊就tńg--來。」阿母hainn-hainn叫，表示抗議。
沿路載仝班機ê人，提早準備，半暝1點行李tshuân好、囥nî-tsînn跤，烏色lè-sìr縛烏tòo紅頭鬃，雙爿喙phuè抹薄粉紅粉膏、大紅胭脂，穿紅色siat-tsuh、烏長褲、kuân踏鞋，行來我面頭前。『你好漂亮！老公跟baby不認得，會說是誰？』皮膚變白，穿插hiánn頭，真suí……。半暝街路，四箍liàn-tńg恬恬恬，我kap小妹等ùn-tsiàng，目睭金金看伊上車khah放心。2點半車來--ah，提300箍hōo--伊、mooh--leh：『辛苦你了！代替我問候老公、媽媽，感謝他願意讓你來台灣照顧阿嬤。不要擔心，好好陪家人，祝你一路平安，到家後記得打電話。』『謝謝！』伊suà手kuānn行李，tńg--去tsit tsuā路，等三年。稀微燈光，拖車影愈行愈遠，互相搖手，tńg-uat tsiah關大門。阿母應該是仝款心情，兩個月，久koh長。
（後期繼續）
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
