主講／周婉窈
記錄／張翠硯
「轉型正義kap不當黨產」台語講座是由不當黨產處理委員會主辦、李江却台語文教基金會承辦ê系列講座。
本文是2023/8/27講座ê摘要記錄，周婉窈是台大歷史系教授。
Tuì KMT/ROC黨國統治到民主化——台灣轉型正義kap歷史記憶
啥mi̍h是「轉型正義」？
主講周婉窈教授先uì「轉型正義」ê定義開始講起。「轉型正義」就是tī國家uì獨裁體制轉變做民主法治社會ê過程，針對以早用國家力量所造成ê人權迫害事件，tsit-tsūn政府beh重新調查、追究、補償kap還當事人公道，mā ài保領仝款ê代誌bē koh再發生。
「黨國」對台灣ê影響
Uì獨裁體制轉變做民主法治是一條tsiok長ê路，lán台灣有真濟代誌lóng iáu tī轉變ê路程，iáu未完成。台灣目前是用非武力ê方式leh行tsit條路，hōo人講是「和平轉型、寧靜革命」，m̄-koh，lán mā因為án-ne付出tsiânn大ê代價。
「黨國」ê特色是照黨ê意志leh領導國家、政府、軍隊等等各方面，進行全面ê社會控制。黨國ê「教育」對台灣人ê影響尤其深，hōo lán無thang了解tsit phiàn土地真正ê歷史。Mā無才調有自由thang講家己ê母語。一步一步削弱lán ê文化尊嚴。
白色恐怖kap轉型正義相關電影紹介
講著「白色恐怖」，周婉窈代先hōo逐家看幾若位受難者tī beh hông銃殺進前hip ê相。周婉窈講，伊實在想無，是按怎in tī性命beh結束進前，iáu ē-tàng án-ne笑？Iah是應該講，是按怎ê心態hōo當權者感覺伊tio̍h-ài tī受難者ê性命beh結束進前留相片kā記錄--leh？
接suà周婉窈紹介台灣kap韓國ê轉型正義相關電影。頭兩齣是逐家普遍khah知影、以二二八做主題ê《悲情城市》、《天馬茶房》。M̄-koh，伊mā進一步提醒逐家，其實二二八kap白色恐怖是無仝款--ê。台灣近年探討白色恐怖上有代表性ê電影是《流麻溝十五號》。
《流麻溝十五號》呈現ê風格是tsiânn溫柔，戲齣內底無kā「刑求」ê殘忍表現kah tsiok清楚，m̄-koh周婉窈認為tse是一種策略，hōo觀眾電影看了ē想beh進一步去了解歷史。電影kā hit个時代多元語言ê情景真完整呈現--出--來。Mā kā族群、性別ê平衡處理kah真好勢，有符合tsit-má ê觀眾ê期待，hōo逐家透過戲齣koh-khah了解白色恐怖。
相對來講，韓國leh探討轉型正義ê相關電影ke khah濟。周婉窈推薦逐家去看《華麗的假期》、《我只是一個計程車司機》。韓國ê作品tī刑求、加害者身份各方面，lóng有真詳細ê交代。是按怎韓國ē-tàng用戲齣來呈現重要ê社會議題？上主要ê原因可能是，韓國人有看戲ê習慣，劇場ê數量mā有影tsiok濟，ē-tàng製作長期ê演出。台灣ê劇場演出相對少場，劇場ê數量mā無夠。
台灣kap別个國家無仝ê所在
台灣ê白色恐怖受難者tī hit-tang-tsūn是受「軍事審判」，tse照受難者ê身份來講並無合理。另外一方面，kap台灣比--起-來，韓國轉型正義ê加害者是受著「司法審判」，周婉窈認為tse是台灣目前做bē到--ê。韓國針對個人ê人權迫害事件mā有設委員會調查。In tī事件發生ê十周年就行tsiūnn街仔路聲援，類似ê行動，lán台灣人等40年。
結尾
台灣人長期無法度透過教育體制來認bat家己ê歷史，致使真濟人感覺追求轉型正義是造成對立。「台灣歷史」tī 2006年tsiah出現tī高中ê課本內底，少年輩ê學生有機會thang了解tsit寡歷史，顛倒是tsit-tsūn掌握社會權力ê大人無一定理解。Tiānn-tiānn聽人講tsit-má ê少年輩是「天然獨」，其實周婉窈認為koh-khah準確ê講法可能是「天然台」。
周婉窈表示，台灣人自日本時代就hông教育kah有「鄉土愛」，m̄-koh，是m̄是ē-tàng發展到「國家愛」，其實逐个人無一定。Lán beh按怎保護lán ê土地、實行轉型正義，是lán ài思考ê主題。
 |
圖片來源：洪雅書房 |
 |
圖片來源：洪雅書房 |
 |
圖片來源：洪雅書房 |
#轉型正義kap不當黨產 專欄，本文使用教育部推薦漢字kap台羅。
#台文通訊BONG報 356期，2023年11月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
