主講／張永昌
記錄／吳玉祥
本文是2023/10/11「台語sa攏有」講座ê摘要記錄，張永昌是肯特動畫數位獨立製片公司創辦人、現任「湠臺灣電影公司」總經理。
台語sa攏有 - YouTube 頻道
今仔日ê主講者是tī台灣影視界經營28冬ê張永昌導演。若是講起影像視覺、原創故事，張永昌就熱情無限、khuì力飽tīnn。Tī台灣頭kái政黨輪替hit一年，也就是2000年，張永昌就用伊ê偏名「Kent」，創辦Kent ADIP（肯特動畫數位獨立製片股份有限公司），beh來打造一个歡樂、奇妙ê故事工廠。公司ê作品題材變化萬千，受著外界真大ê肯定。
另外，張永昌koh是「湠臺灣電影公司」ê總經理。「湠臺灣電影公司」ê「臺灣100」大河系列電影計畫，beh用影視作品來傳講台灣百年來原汁原味ê故事，hōo lán對土地ê認同ē-tàng生湠、累積，mā hōo全世界koh-khah了解、認bat台灣。2022年，張永昌擔任製片，iáu未公演，就引起濟濟ê關心、討論ê電影《流麻溝十五號》就是「臺灣100」ê頭一齣電影。
一開始張永昌就直接切入重點，講出台語現時ê處境。若是照聯合國教科文組織所定義ê瀕危語言六等級來看，第一級是滅絕級，就是講tsit種語言已經無人teh使用；第二級是夭壽危險級，就是kan-na賰阿公阿媽等老沿--ê三不--五-時-仔tsiah有teh講ê語言；iah若阿公阿媽雖然ē-hiáu講，suah真少teh kah in孫講ê語言，就是第三級重大危險級。Lán ê台語，tsit-má就是排tī第三級，若是無趕緊來急救，台語一消失，台灣文化mā ē tuè leh烏有--去。
是按怎祖先留--落-來，以早逐口灶lóng teh講ê台語，到kah lán tsit代ē變做是重大危險級？上主要當然是政治因素，黨國體制無所不至ê「國語政策」，m̄-nā踮學校用粗魯ê處罰手段禁止台灣囡仔講台語，kā in ê喙舌鉸掉；koh利用電視電影ê角色設定，hōo歹看、無智識、sông koh àu-lông、粗魯、歹人等等ê負面角色lóng講台語，啊若正派、緣投、飄撇、suí-khuì、古錐、大方ê角色當然是講華語。拍開電視、行入戲園，就開始kā lán洗腦，án-ne一洗就是幾若十冬，kā台語洗tn̄g kah清氣tang-tang，洗kah險斷khuì。
好佳哉政治ê民主化，hōo黨國體制無法度koh再完全控制演藝界，影響力mā沓沓仔變細，演藝界ê新人，開始用作品來表達、描寫真實ê台灣人、台灣社會。台語台開台了後，又koh再進一大步，lán ē-tàng用台語講新聞、講科學、講藝術、講世事……。
張永昌講著tsit幾冬ê台灣戲劇，台語是愈用愈濟、愈講愈好，親像電視劇《俗女養成記》、《若是一個人》、《做工的人》、《我的婆婆怎麼那麼可愛》，使用台語ê比例真kuân，結果社會風評好，收視率mā真kuân。Koh有台語電影《角頭》、《孤味》票房lóng tsiūnn億，iah 若台語舞台劇使用自然ê台語、表演精彩ê歌舞，親像《再會吧！北投》、《台灣有個好萊塢》、《勸世三姊妹》票房mā是lóng賣了真好。張導演有看著一个現象，台語舞台劇ê演員ē講koh ē唱，in ê話語比起電影、電視劇ê演員koh-khah好。
另外，張永昌mā提醒逐家，救台語ài tuì囡仔開始，lán ài有優質ê尪仔冊、bàng-gà hōo lán ê序細用台語來學習各種智識，親像Kent ADIP推出ê《熊星人》系列bàng-gà，就是用台語kah台文字幕來kā囡仔講科學、冒險ê故事。
落尾，張永昌講in查某囝原本是華語人，後--來因為韓國ê流行文化影響，家己自動去學習韓國話，真緊就講kah siah-siah叫；tsit幾年伊受著電視劇《俗女養成記》、《若是一個人》kah流行音樂《美秀集團》ê影響，tsiah開始teh學台語。張永昌用in查某囝做例來提醒逐家，流行文化無形ê力量，關係著文化、語言ê認同、存亡，無論是出版、劇場、廣播、音樂、舞蹈、bàng-gà、電影、電視，每一項lóng真重要，請逐家一定ài「湠台灣」，支持台灣ê文化產業。
#台語sa攏有講座 專欄，本文使用教育部推薦漢字kap台羅。
#台文通訊BONG報 356期，2023年11月出刊。
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
#李江却台語文教基金會 需要你ê定期捐款，逐年贊助本會（台文通訊BONG報發行單位）NT$2,400，lán做伙復振台灣語文ê事工kap雜誌編印發行費用，捐款thang抵稅。
