Tuì口蹄疫到非洲豬tse

作者：陳睿穎

--------------------------------------------------------------------------------------------------------------------------

編按：本文是5/17「棲地復育台語講座~Tuì口蹄疫到非洲豬tse」講座摘要記錄，主講者是台灣大學獸醫系名譽教授賴秀穗。台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃十場有關生態環境議題ê台語講座，歡迎逐家tī逐個月第三禮拜五暗時七點到九點，同齊來「呷米共食廚房」（台北市中正區衡陽路9號3樓）擴展家己ê台語棲地（tshe-tē）！詳細資料ē-tàng看「台灣蠻野心足生態協會」FB專頁。

--------------------------------------------------------------------------------------------------------------------------

2019年，是關係著lán台灣畜產業kap全體民生問題上重要ê一年。口蹄疫、非洲豬tse，一个是已經kap lán交纏23年，希望今年6月底就ē-tàng順利kap伊相辭；另外一个是已經侵入中國kap越南，tsit-má hōo lán閘tī台灣門跤口。5月17暗時所舉辦ê蠻野講堂，請台灣大學獸醫系名譽教授賴秀穗老師，kā口蹄疫、非洲豬tse kap人類社會ê關係，慢慢仔講hōo逐家知。

人類社會快速文明化，致使自然環境ê開發，本底離lán真遠ê野生動物傳染病，也因為野生動物kap家畜ê接觸，真緊就進入lán ê生活。自古以來，動物身上ē uè--人ê病毒tsiânn濟，khah出名ê譬論講痟狗病、狂牛病、Ebola病毒等等，tse lóng是人類快速文明化留--落-來ê惡夢。所以講人類、家畜、野生動物其實lóng是一體共命，lán若對人畜共通ê傳染病有thang ke一寡了解，就ē-tàng提升規个社會對疫情ê正確認知kap共識。

1997年，台灣有豬仔去uè著口蹄疫，tsit種RNA病毒透過空氣teh傳染，因為對成豬ê致死率無kuân，所以beh即時發見染病也無簡單。Hit時對國家整體來講，上好ê做法是禁止運輸家畜一段時間（就是禁運禁刣），等待帶病ê豬仔發病，全場滅絕，án-ne做ē-tàng khah緊消滅病毒。但是tsit个做法對農民來講，代表短期內有真大ê財產損失，為著農民ê感受問題，hit-tsūn ê政府iáu是決定hōo豬仔注疫苗來kā疫情teh--落-來。但是lán付出ê時間代價就tsiânn大，數十年來m̄-nā豬肉無thang外銷，飼料、藥品、屠宰冷凍等等27種產業受著打擊，台灣損失2700億ê產值，逐年koh ài khai十億來採購疫苗、抽血監控豬仔ê健康狀況，lán是用長期抗戰ê方式來對抗口蹄疫。Tsit-má面對豬仔致死率100%、病毒iáu-koh khah韌命ê非洲豬tse，希望台灣人ài ē記leh 20年前口蹄疫ê經驗，知影防疫就是作戰，只要全民lóng對tsit件代誌提kuân警覺，lán m̄-nā ē-tàng繼續食健康ê豬肉，也ē-tàng恢復豬肉外銷ê好光景。

棲地復育台語講座專欄，本文使用教育部推薦漢字kap臺灣閩南語羅馬字拼音方案。

台文通訊BONG報303期，2019年6月出刊。

--------------------------------------------

歡迎捐款贊助　李江却台語文教基金會　（捐款thang抵稅，匯款了後請通知02-23112199）

線上捐款(定期定額) https://ppt.cc/fF5bhx

線上捐款(單筆) https://ppt.cc/fcycox

有固定的長期捐款， 讓更多的台語文相關計畫可以穩定的推行，感謝逐家。

郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會

李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。

◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。