編按：本文是6/21「棲地復育台語講座~咱對海龜ê「塑」縛」講座摘要記錄，主講者是海湧工作室執行長陳人平。台灣蠻野心足生態協會舉辦ê「蠻野講堂」tuì 2019年3月份起kap李江却台語文教基金會合辦規劃十場有關生態環境議題ê台語講座，歡迎逐家tī逐個月第三禮拜五暗時七點到九點，同齊來「呷米共食廚房」（台北市中正區衡陽路9號3樓）擴展家己ê台語棲地（tshe-tē）！詳細資料ē-tàng看「台灣蠻野心足生態協會」FB專頁。
Tsit回tī蠻野講堂台語棲地復育系列座談ê題目是：Lán對海龜ê「塑」縛。Uì題目看--起-來，lán叫是主角是海龜。實際上聽了tsiah知m̄是。而且，hōo人「塑」縛--ê，mā m̄-nā海龜niā-niā。
主講人是海湧工作室ê執行長陳人平先生。伊ê台語真自然，tī少年輩內面台語算講是真好。應該普通時仔就有teh講。Tse mā tuì in ê組織名看ē出--來。海湧本身就是一个台語詞。陳執行長koh kā海tsit个漢字tháu開來看，解說講海m̄-nā是水，mā是人類ê母親。Hōo人感覺tse是一个真心疼thàng海ê組織。因為關心海、愛海，結果suah變做塑膠pùn-sò ê專家。Tse講--起-來mā是真感慨。海湧工作室tsit-má上主要ê khang-khuè是舉辦清沙埔、講座等等來倡議lán ài tuì源頭開始減少pùn-sò量。
海龜一直lóng tsiok有人氣。真濟人為著beh親目睭看著伊，ē專工去海島藏水。但是lán對in確實無真了解。講座先kā逐家介紹一寡包括海龜ê種類、特性kap分佈等等ê智識。除了知影講lán ê小琉球tī短短ê 200公尺海岸就ē-tàng看著38隻海龜，是分佈密度世界第三名以外，lán mā了解著一个tsiok重要ê關鍵：華語號做『水母』ê thē，原來是海龜tsiok重要ê食si̍t。Tse，mā是海龜變做海pùn-sò tsiok大受害者ê原因。
原來，塑膠袋仔tī海--裡浮--leh浮--leh ê時，kap thē是teh-beh成。致使海龜tiānn-tiānn ē kā in吞落去腹肚底。而且因為海龜in kan-na ē-hiáu吞，bē-tàng phuì，所以就算講in發現去食著歹mi̍h件，mā是ài硬吞--落，無其他ê選擇。有ê人ē質疑講，塑膠袋仔kap thē也ē分bē清楚？陳執行長隨就kā gún試驗。囥一張相片叫逐家判斷看是塑膠袋仔iah是thē。Tsiah試一張相niâ，逐家就m̄敢koh笑海龜ê目色bái--ah。
Tsit-má己經有真濟組織，不時to發佈海龜食著塑膠pùn-sò死亡ê消息。腹肚kā剖--開，各種ê塑膠pùn-sò lóng有。Tsit站仔網路頂一段影片，看著一隻海龜竟然ē去hōo人uì鼻空khiú一條suh管出--來。海龜痛苦ê表情kap哀叫聲hōo逐家看kah tsiok m̄甘。逐家開始檢討講，原來lán人製造ê塑膠pùn-sò竟然ē去害其他ê動物食苦。
陳執行長koh hōo gún看tsiok濟世界各地ê影片kap相片。包括in組織去清沙埔ê「成果」。有ê所在，甚至一个海湧拍--過-來，竟然看bē著水面，lóng是pùn-sò。Tī澳洲mā有影片看著講拄出世ê細隻龜想beh爬入去海--裡竟然揣無路，因為沙埔全全是pùn-sò。Tsit寡影片lóng hōo人看kah真驚惶。甚至lán mā開始了解著講食塑膠pùn-sò--ê mā m̄-nā是海龜，連魚mā ē食。魚食塑膠，人食魚。人類創--出-來ê歹mih仔最後lóng tńg來人類家己ê腹肚內。根據上新ê報告，lán現代人一禮拜竟然塑膠ē食到五公克，等於是一張信用卡ê量。Tse真正是tsiok驚--人。
陳執行長特別紮一个in去清沙埔收--tńg-來ê mi̍h件。竟然是30年前tsiok tshìng ê『蝦味先』袋仔。Tse除了代表講塑膠袋仔確實是真oh分解以外，mā hōo lán了解著講tsia-ê流入去海ê塑膠pùn-sò到底是tuì佗位來。原來in有真大部份是tuì合法ê pùn-sò場流--出-去--ê。陳執行長kā gún透露一件代誌就是：Lán ê pùn-sò處理有真大ê部份是kā埋--起-來niâ。大部份ê pùn-sò場koh lóng起tī海邊仔。所以若pùn-sò場滿--ah，tsia-ê pùn-sò就ē慢慢仔hōo人sak入去海--裡。Tsit个『蝦味先』ê外口袋仔就是一个例。30年前一个囡仔食了，雖然是乖乖仔kā tàn tī pùn-sò桶，但是30年後伊iáu是出現tī沙埔hōo人khioh--著。
M̄-nā pùn-sò ê處理是有真濟問題ài解決，就算講是lán上hōo人呵咾ê回收，詳細想想--leh，mā只是hōo伊khah uànn變pùn-sò niâ。所以講--起-來，beh真正環保只有一項khang-khuè。就是ài tuì源頭減量。減少使用塑膠ê量，自然塑膠pùn-sò ê量就ē減少。若無，koh-khah大型ê pùn-sò場mā無夠lán té。
根據統計分析，tsia-ê塑膠pùn-sò前幾名lóng kap lán ê食si̍t文化有關係。所以lán ē-tàng tī lán ê日常生活內面就開始對環保做出貢獻。包括：出門家己紮矸仔thang lim水，m̄-thang買塑膠矸仔水；家己紮箸m̄-thang用免洗箸；m̄-thang用塑膠suh管，改用其他像玻璃iah是sir-tián-lè-sù--ê，甚至是規氣mài用、直接lim；買mi̍h件家己紮袋仔去té，mài koh ke khai一个塑膠袋仔；買菜儘量去菜市仔，mài去超級市場等等，lóng真有幫助。Tse tsit-má有一个新詞ē-tàng講。這就號做「減塑生活」。
最後，陳執行長koh分享in tsit-tsūn tng-teh推廣ê觀念。除了清沙埔以外，in mā開始去各大細公司推廣，若有公司內部ê活動，m̄-thang koh叫包做一粒一粒ê便當，án-ne用siunn濟一擺性ê mi̍h件。Ē-tàng改用自助餐，叫逐家紮家己ê碗箸來khat。已經有bē少公司配合。針對學校mā有新觀念tng-teh推sak。真濟學校lóng ē辦園遊會。Tse本底是一个ē-tàng hōo逐家歡喜ê活動。但是tse mā是ē產生tsiok濟一擺性pùn-sò。In mā有替逐家想一个辦法，就是ē-tàng hōo參加者現場「租」碗箸，看--起-來效果mā是bē-bái。
陳執行長最後hōo逐家一个觀念：伊m̄是叫逐家mài用塑膠，塑膠確實是一个現代人真好用ê mi̍h件，重點是：lán lóng siunn過討債。明明是ē-tàng用幾若遍ê mi̍h件，lán suah是貪省事一直kā製作--出-來。Tsit个歹習慣ài改，無，地球早慢ē tsih載bē tiâu。
#棲地復育台語講座 專欄，本文使用教育部推薦漢字kap臺灣閩南語羅馬字拼音方案。
台文通訊BONG報304期，2019年7月出刊。
#棲地復育台語講座 專欄，本文使用教育部推薦漢字kap臺灣閩南語羅馬字拼音方案。
台文通訊BONG報304期，2019年7月出刊。
歡迎捐款贊助 #李江却台語文教基金會 （捐款thang抵稅，匯款了後請通知02-23112199）
線上捐款(定期定額) https://ppt.cc/fF5bhx
線上捐款(單筆) https://ppt.cc/fcycox
有固定的長期捐款， 讓更多的台語文相關計畫可以穩定的推行，感謝逐家。
郵政劃撥：19021486
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
戶名：財團法人李江却台語文教基金會
電匯：123-20-050514-2
華南銀行士林分行活儲
戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
