三十而立.台文通訊30週年徵稿啟事

photo by Taiffalo



早人講「三十而立」(sam-si̍p jî li̍p),意思lán人tio̍h-ài食kah 30歲,tsiah徛ē在、讀有冊,m̄知kám有影?《台文通訊BONG報》ê前身是1991年7--月創刊ê《台文通訊》kap 1996年10--月創刊ê《台文BONG報》,落尾tī 2012年2--月合刊,也就是講,到kah明年ê熱--人,就是guán 30歲ê坎站--looh!創刊hit當時,眾人對台灣母語ê發展有gua̋大ê ǹg望,tsit條台語路行過30冬,m̄知guán kám有ha̍h人意,hōo本土語言出頭天--ah?

翻頭tńg去看beh 30年前hit跤兜,台灣人知見著民主改革大變化ê流擺,規kuānn sio連suà ê運動,爭取母語人權ê議題也無欠席。30年來,tuè政治勢面起起落落,語言政策ê論戰無時停,路途就算講坎坎坷坷,語言運動ê成果suah也沓沓仔粒積——2018年尾,立法院三讀通過《國家語言發展法》,到tsia,所有本土語言ê發展tsiah平等得著法律上ê保障。

現此時,國校kap大學、研究所lóng已經有本土語言ê課程,koh,《國家語言發展法》明訂,自2022開始,國高中mā ài有本土語言課。國家級ê語言認證考試tsîng 2010辦到tann,愈來愈成熟。公視台語台tī舊年7--月開播,多元ê台語節目一个一个出--來;《小王子》台語版今年3--月一下出版,即時tī冊店ê排行榜tshìng-tsiūnn頭名,包括阿却賞囡仔故事繪本系列在內ê各種台語文創作ná來ná受注目。本土語言ê復振,tsiânn做規个社會共同思考ê議題。

30冬ê tsit條路--裡,逐家手頭ê tsit本雜誌m̄ bat斷站,uì美國到台灣,uì 1991年到tann,kā濟濟sia̋n-pái、前輩ê心血khioh做伙,kap tńg半沿甲子ê台語運動做伴、kap各位關心母語ê有志做伴。Guán 30歲--ah,雖然是通世界iáu leh發行ê台語文雜誌內底歷史上kài久長--ê,也不過是一个「文青」——台文ê青年——nā-tiānn。人講,少年--ê khah táng-hiánn,30冬ê青春台語路guán行了按怎,guán家己歹講話,就交hōo讀者來回答。

Uì tsit-tsūn開始,guán誠懇徵求「台文通訊30週年」稿件,歡迎逐家來鬥鬧熱,或者分享你kap《台文通訊BONG報》ê故事,或者提供對guán ê建議。一本台語文雜誌beh行過30冬無簡單,若無各位讀者sio-thīn kap oo-ián,guán無可能堅持到tann。Tī tsia,編輯部koh再一擺表示上大ê感謝,期待有志ê來稿。

歡迎投稿

◎文字編輯:
作者tio̍h同意作品hōo編輯部做文字編輯,羅馬字部份guán接受教育部臺灣閩南語羅馬字拼音方案、白話字兩種系統,原則上照作者ê意思採用。有beh特別表現家己腔口--ê,請註明羅馬字hōo編輯部thang參考。

◎著作權事宜:
錄取ê作品,作者ài保證無侵害別人著作權kap違背著作權法等等現行各項法規ê行為;若有tsia-ê狀況,作者tio̍h家己負擔法律責任並且賠償對《台文通訊BONG報》造成ê損害。本刊保留以電子期刊iah光碟等數位格式發行ê權利,有採用ê著作無koh另外付稿費。若是翻譯iah是改寫,ài提供原作者同意ê證明。

◎投稿寄來:
Email:bongpo1996@gmail.com
10843 台北市萬華區中華路一段106號9樓

◎投稿者註明真實姓名(發表ē-sái用筆名)kap職業、e-mail、身份證號碼、通訊hām戶籍地址、電話(手機)、匯款口座(請優先提供「郵局」iah是「華南銀行」口座)。即時起,若無beh領稿費,就免簽領據(mā無捐款收據)。(註:國外匯款手續繁複koh雙爿手續費真傷重,投稿者若無台灣國內銀行iah郵局口座,就無稿費,請包涵kap體諒。)

◎請m̄ -thang一稿兩投;來稿無退還,敬請家己留底;投稿了後,若無接著本刊「收--著」ê回覆,請koh寄批來確認。

◎若有beh提供圖片,請m̄-thang囥tī word檔案內底,文字kap圖片檔案ài分開,tsiah bē影響圖ê解析度,印刷效果khah好。