作者：石牧民
（作者是台灣師範大學、靜宜大學台文系兼任助理教授 ）
三級防疫警戒降做二級了後，文藝界頭一層大事，就是綠光劇團〈人間條件．七：我是一片雲〉beh tī國家戲劇院公演。〈人間條件〉tsit个系列，在來lóng吳念真編劇，是通人呵咾ê台灣齣。講「台灣齣」是無超過。綠光劇團家己leh宣傳lóng mā講in tse「國民戲劇」。In án-ne宣傳kap〈人間條件〉一向ê內容mā有對同，全然是1945年太平洋戰爭收煞了後，台灣在地ê經驗。
Tsit斗〈人間條件．七〉拄好leh講1945戰後出世tsit沿台灣女性ê故事。Hit个時代台灣人大面mā散，義務教育kan-na六冬；濟濟人國校出業就去踮工廠趁食，月給寄tńg去庄跤、下港厝--裡，tàu io飼小妹、小弟。〈人間條件．七〉ê女主角，細漢就pun人做新婦仔ê素蘭，家己講：「代做紡織，koh來電子工廠，la-jí-ooh、電視機lóng mā bat做。」Án-ne講hit-tsūn，素蘭19歲，出外作穡五、六冬--ah。〈人間條件．七〉就是素蘭自細漢到6、70歲仔ê故事。伊tī工廠ê姊妹、無緣ê愛人仔，kap伊仝款，lóng是未曾未大漢就leh討趁ê艱苦囡仔。
編劇吳念真按怎表現素蘭tsit陣人？伊用台語！〈人間條件．七：我是一片雲〉ē-sái講是一齣全台語ê戲劇作品。內底角色無一个m̄是台語人。「吳念真」ê大名，自1980年代「台灣新電影」就有出脫；lán雖bóng bē kā掠做台文創作者，總--是，伊tī戲劇內底撙節台語ê功力lán無話講。Tsit齣全台語ê〈人間條件．七〉m̄-nā真tuann-tiah表現1960、1970年代ê語言環境，而且kā素蘭tsit沿台灣人ê運命描寫了tsiânn suí-khuì。素蘭tī工廠ê查某伴講著領班拍死蝶仔，同齊時講：「飛ē入--來，就hōo你飛bē出--去」，bē輸leh kap工廠女工、艱苦囡仔ê境遇sio叫應。吳念真是tsiok頂真beh hōo tsit世代台灣囡仔ē理解in序大hit沿台灣人所吞忍ê苦楚。
總--是，吳念真tsit齣全台語作品，無疑悟mā leh kap現此時tsiânn傷重ê台語sio叫應。Tī〈人間條件．七〉內底，kan-na三搭位仔出現華語；tsit三搭位仔，lóng總khah無三分鐘，卻是bē輸leh讖講台語死失ê運命。三搭位仔其中兩搭位仔，講華語ê人是工廠主管kap公所職員；mā-koh in講話內容lóng是leh宣佈政策，iah是溝通公共性質ê事務。Tuì án-ne，拄好ē-tàng kap台語ê部份來比pìng。〈人間條件．七〉內底，講台語ê場所，是工廠寮仔、翁仔某ê房間內；若講都合，是情伴leh講心聲iah是查某伴kheh tī眠床頂leh開講。Tī tsit齣全台語戲劇內底，lán已經看ē著，台語leh失去空間，失去活力；見若講公共事務，講私人以外ê代誌，華語tsiah有對pān。
Iáu一搭位，就是「我是一片雲」。He是tsit齣戲ê名，mā是鳳飛飛ê歌曲。Tsit塊歌，tī〈人間條件．七〉內底，象徵素蘭ê運命kap心聲；pun人做新婦仔，tī各種hōo人輾目屎ê遭遇中間飄浪、連回。規齣戲，見擺「我是一片雲」響起，bē輸素蘭leh唱伊家己無依倚，浮雲一樣ê人生。總--是，he是一塊華語歌曲。Tse m̄-nā一首歌niā-niā，tio̍h-ài看做規齣戲感情ê核心。吳念真骨力創作一齣全台語ê戲劇，真幼路leh描寫台灣艱苦人ê一生；m̄-koh，bē輸規个作品「桶箍」ê tsit塊歌，suah是華語歌。Lán kan-na ē-tàng講，伊是「寫實」kah有賰。素蘭hit沿ê人，聽鳳飛飛ê歌，讀瓊瑤ê小說來tháu放感情。Hām tng當時描寫素蘭hit款艱苦人ê工人作家楊青矗，mā無thang親像現此時吳念真án-ne，用台語來寫實，tio̍h-ài用華文來寫素蘭tsit款人物。
〈人間條件．七〉用台語講素蘭tsit个歹命囝ê故事。同齊時hōo lán看--著，台語mā是hit个歹命囝。Lán tsia-ê看〈人間條件．七〉ē m̄甘ê台語人，thìng好比吳念真koh進一步，用台文來寫台語人ê故事。
#文學káng「台」 專欄，本文使用教育部推薦漢字kap臺灣閩南語羅馬字拼音方案。
#台文通訊BONG報 330期，2021年9月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
