詩三首
作者：Khu Phek-hôa
（台羅會會員）
●Tâi-oân Thng-thâu
Tâi-oân lâng, chia̍h-pá--bōe?
Âng-chhài-thâu, pe̍h-chhài-thâu,
Siah phôe, siah siah siah,
Chhiat kho͘, chhiat chhiat chhiat.
Kheh-lâng, sṳ̍t páu mò?
Tek-sún, kha-pe̍h-sún,
Peh ha̍h-á, peh peh peh,
Tok koe̍h, tok tok tok.
Ko-lê-chhài, tōa-pe̍h-chhài,
Liah chò phìⁿ, liah liah liah,
Hiuⁿ-ko͘ 5, 6 lúi, hê-pi chi̍t tōa me,
Kam-chià nn̄g chat, tōa-kut saⁿ ki,
To-goân cho̍k-kûn, to-goân gí-giân,
Tōa-hóe chú hō͘ kún, bûn-hóe bān-bān-á khòng,
Chú chi̍t tiáⁿ siōng kài êng-ióng ê Tâi-oân bī.
Tâi-gí lâng kóng Tâi-gí,
Kheh-lâng kóng Kheh-gí,
Goân-chū-bîn kóng Lâm-tó-gí,
To-goân cho̍k-kûn, to-goân gí-giân,
Chú chiâⁿ chi̍t tiáⁿ Tâi-oân bī.
●Kò͘-hiong ê Chhân-hn̂g
Tek-ûi lāi sī an-sim ê só͘-chāi,
Lāu-káu kò͘ tiū-tiâⁿ, chhù-chiáu-á m̄-káⁿ óa,
Niau-mi kut-la̍t cháu, niáu-chhí m̄-káⁿ lâi,
Phòa-chhù-tháng-á, soah sī ún-sim chū-chāi.
Chhì-tek cha̍h hong cha̍h gōa-lâng,
Tek-ûi gōa sī bô kâng sè-kài,
Chhân-hn̂g chheⁿ-chhùi, tiū-á lāng-hoe,
Chit pêng ah-thûn-á teh tho chhân-lê,
Hit pêng ke-thûn-á teh chhéng thô͘ péng thâng,
Hóe-ke pháiⁿ-chhèng-chhèng, sì-kè thî, sì-kè jio̍k,
Hi-hi hōa-hōa, lāu-jia̍t kún-kún.
Ba̍k-chi̍t-nih, sî-kan hóe-chhia í-keng kòe,
Lâu-á-chhù chi̍t-tòng chi̍t-tòng khí,
Tiám-á-ka lō͘ chi̍t-chōa lâi chi̍t-chōa khì,
Se̍k-sāi ê chhì-tek-ûi, sī cháu khì tó-ūi bih?
Ah-á, ke-á iā lóng phàng-kìⁿ,
Phīⁿ bô kò͘-hiong ê chhân-hn̂g bī,
Hoân-hôa lāu-jia̍t, lāu-jia̍t hoân-hôa,
Ah! Soah m̄ chai beh án-chóaⁿ sī?
Chhì-tek cha̍h hong cha̍h gōa-lâng,
Phòa-chhù-tháng-á, soah sī ún-sim chū-chāi.
Chhân-hn̂g chheⁿ-chhùi, tiū-á lāng-hoe,
Hi-hi hōa-hōa, lāu-jia̍t kún-kún,
Ba̍k-chi̍t-nih, sî-kan hóe-chhia í-keng kòe,
Phīⁿ bô kò͘-hiong ê chhân-hn̂g bī.
●Khó͘-loân Koa
Ī-hiong saⁿ-kìⁿ, soah sī kū-chêng tîⁿ-mî,
Chhit kang ê í-óa, chhit nî ê tán-thāi,
Tán ā tán, bāng ā bāng, ūi lí chhi ūi lí bê,
Ta̍k-ji̍t ê phe-sìn, siuⁿ-si chhiùⁿ bē lī,
Suiⁿ-suiⁿ ê lê-bóng, tiⁿ-tiⁿ ê phang-bi̍t,
Sī góa tùi lí ê chêng-ì.
Tang-bóe siu-soah, koah-chhài hong-siu,
Kha ta̍h kiâm-chhài-tháng, chi̍t-pō͘ nn̄g-pō͘ chhian-lí lō͘ .
Tō͘-chiáu lâm lâi, lí góa iáu sī chhian-lí hn̄g,
Bān-lí-hiong, thoân chhian-lí, kám thang kià chêng khì?
Sàng-phe--ê ta̍k-ji̍t lâi-khì, káu pūi hóe-chhia bô lō͘ ēng,
Tán ā tán, bāng ā bāng, kám sī chhé-chhé khah kui-khì?
Tek-nâ hong-siaⁿ siⁿ-siⁿ-soāiⁿ-soāiⁿ, ūi góa sò͘ siuⁿ-si,
Chhiū-oe ko͘-chiáu, hiⁿh-hiⁿh kiò kui mê, ūi góa sò͘ khó͘-būn,
Aih! Hong chhoe chêng sòaⁿ, chhin-chhiūⁿ lông-kun i.
Ah! Chù-tiāⁿ kai sī toān-tn̂g si.
#台羅會交流道 專欄，本文使用白話字。
台文通訊BONG報330期，2021年9月出刊。
台灣羅馬字協會
（簡稱「台羅會」）簡介：
2001年成立，宗旨：
(1)推行台灣羅馬字ê研究kap普遍化。
(2)追認台灣羅馬字kap台灣話ê法定地位。
(3)要求政府實施公平正義ê多語文政策。
(4)建設多元、開放、互相尊重ê台灣文化。
E-mail：tlhemail@gmail.com
網站http://www.tlh.org.tw
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
