主講／許君豪
記錄／吳宛霖
Lán ê一生中若是kā回想--一-下，kám有啥mih代誌是斯當時無想清楚就來做決定--ê？十幾年了後，我tsiah體會著tsit句話：「重要ê人生問題，當初做決定ê時，若無想清楚，無想出安心ê答案，tsit个問題一定ē koh走tńg來揣--你。」
我是台大醫科ê學生，讀冊hit-tsūn對做醫生並無特別ê熱情，問同學為啥mi̍h beh來讀，大部份ê回答lóng是：「因為成績bē-bái就來讀--ah！」Tī學校，雖然我「走台」1、生物學ê考試成績lóng滿分，抽血mā真熟手，hit時ê我iáu是無明確ê目標。
一般來講，若順利畢業，做醫生大部份lóng是走去做治療，無leh做預防，因為做治療錢khah好趁。另外，mā是因為台灣ê健保制度對「預防」無重視。台灣人mā khah無預防ê意識，譬如講，家族成員中若有高血壓病史，你kám ē專工去揣醫生，問生活、飲食ài怎樣調整來預防高血壓？
《小王子》tsit本冊內底有一句話「上kài重要ê mi̍h件，用目睭是看bē著--ê。」關係人生ê目標，落尾經過思考，我感覺「預防」實在真重要，尾--à選擇職業醫學科，去企業做醫生、宣導衛生教育，tsiah揣著行醫真正ê核心價值。
「職業醫學」是啥？職業醫學kap法律tsiok有關係，自2001年12月初4，衛生署公告成立職業醫學tsit門專科，到tann已經有20年--ah；台灣法定ê 23種西醫師專科2中，職業醫學科是上kài新--ê，提著tsit个專科醫師證書ê醫生，全台灣kan-na 401个3 niā-niā。
我是台大第一屆職業醫學科ê專科見習醫師。我ē-tàng做tsit項kang-khuè，真大部份是因為有法律規範，講公司員工有tshiànn到偌濟人，tio̍h-ài請醫師、護理師去服務。雖然講預防真重要，m̄-koh若m̄是法律有規定，公司mā無一定願意另外koh khai錢請醫師來kap員工開講。職醫（職業醫學科專科醫師）ê專業，大概來講是：擔任企業ê健康顧問，提供臨場服務（職場健康管理顧問服務，khah早號做「臨廠服務」）；預防、診斷、治療kap khang-khuè相關ê傷害、疾病。
人講「預防khah贏治療」（補胎khah贏做月內）。職業醫學就是beh顧健康，kā有風險ê代誌先揣--出-來。譬如講，替企業執行規劃、預防員工過勞；改善有身勞動者ê職場環境；協助職災勞工拍算tńg去職場ê適當時機kap工作內容，處理濟濟企業員工健康問題……。提供hōo勞資雙方lóng滿意ê解決方案，對勞資雙方來講是雙贏，tse就是職業醫學科醫生ê專業kap價值。
- 醫學生ê考試之一，現場排幾若塊桌仔，桌仔頂tshuân人體組織模型iah是ài動手做--ê，科目包括大體解剖、組織學、微生物等等，tī限定時間內ài寫答案，時間到就換桌。
- 23種專科是：家庭醫學科、內科、外科、兒科、婦產科、骨科、神經外科、泌尿科、耳鼻喉科、眼科、皮膚科、神經科、精神科、復健科、麻醉科、放射診斷科、放射腫瘤科、解剖病理科、臨床病理科、核子醫學科、急診醫學科、職業醫學科、整形外科。
- 2020年專科醫師核准發證累計人數：內科11,478人、外科7,583人、家庭醫學科6,635人、職業醫學科401人；衛生福利部2021年3--月編製。
臺灣話 ê 簿仔紙 https://ohtaigitw.firstory.io
線頂看影片
台語sa攏有 - YouTube 頻道
#台語sa攏有講座專欄，本文使用教育部推薦漢字kap臺灣閩南語羅馬字拼音方案。
台文通訊BONG報331期，2021年10月出刊。
--------------------------------------------
歡迎捐款贊助 #李江却台語文教基金會
（捐款可抵稅，匯款後請通知02-23112199）
郵政劃撥：19021486戶名：財團法人李江却台語文教基金會
電匯：123-20-050514-2華南銀行士林分行活儲戶名：財團法人李江却台語文教基金會
李江却台語文教基金會需要你ê定期捐款，逐個月捐助NT$200以上，lán做伙來推動復振台灣語文ê事工，歡迎利用劃撥、電匯、信用卡、郵局『存簿儲金自動轉帳』扣款iah是線頂捐款、現金贊助。
◎逐個月贊助本會（台文通訊BONG報發行單位）NT$200（iah是逐冬NT$2,400）以上，做伙支持基金會事工kap雜誌編印發行費用。歡迎利用郵局劃撥、信用卡（寫捐款單）、線頂捐款、現金贊助、銀行/ATM轉帳（轉帳了後請通知）、支票、郵局戶頭自動轉帳扣繳（寫授權書），捐款收據ē-tàng做『列舉扣除額』抵稅ê用途。
