作者：張家榮
鐵牛無想著羅漢獅ē走來會社揣--伊，驚一下面仔白死殺，真緊張ê款，起大舌講：「無--lah！漢獅……你先tńg--去，翻頭我……tsiah kā你講。」
「龜跤趖--出-來--ah，竟然beh koh瞞--我！」羅漢獅面腔lua̍h--落-來，兩粒拳頭拇tēnn kah kiōng-beh出汁，氣phut-phut án-ne講。
「代誌m̄是你所想--ê án-ne，你mài tshóng-pōng，我是姑不終tsiah……」王鐵牛緊張kah la̍k-la̍k-tshuah。就tī tsit个時tsūn，三本太郎tsit个無人性ê鱸鰻差役，一看著羅漢獅隨pìnn面，跤手mé-lia̍h kah，武士刀pue̍h--出-來就按羅漢獅刣--過-去。「ばかやろう！你tsit个行m̄知路ê tshenn-mê獅，受死！」
佳哉，真正不止仔佳哉，羅漢獅目色好，危險跳走刣無著，若無，tsit聲tuì頷仔頸刣--落定著無命！Thuî--ê是，伊明知三本太郎beh kā刣koh m̄緊làng港，顛倒m̄知死活，頭殼削尖尖，sáng勢kah bē輸工夫偌厲害，拳頭拇tēnn--leh就向三本太郎ê ē-hâi tsing--去。結果m̄-nā tsing無著，suah去hōo對方掠--起-來。Suà--落，hainnh！真正是話若beh講透機，目屎就pué bē離。因為，羅漢獅m̄-nā去hông修理kah金sih-sih，koh去hōo三本太郎剁斷四肢手tsíng頭仔，倒手kan-na賰一肢大頭拇tiâu--leh niā-niā，血sai-sai有夠驚--人！
「Hngh！你tsit个豬狗精牲，好膽你就一刀hōo我死，若無，我絕對kap你拚輸贏。」羅漢獅呸一下喙瀾，面仔橫橫án-ne jiáng。
「ばかやろう！你tsit个惡徒，わたしbeh摃斷你ê喙齒。」三本太郎武士刀khuà leh肩胛頭，受氣kah心狂火to̍h，心肝掠坦橫，拍算beh kā凌遲到死為止。
就án-ne，可憐ê羅漢獅，hōo一二十个日本警察hē性命蹧躂了，規身軀全傷，死死昏昏--去……。
厭氣--ê是，tshāi tī現場ê王鐵牛，竟然目睭金金看伊tī hia hông凌遲，而且koh據在in將死體tìm tī iap-thiap ê所在。雖然，鐵牛後--來有替家己解sueh，講當時烏大海kap幾若个督工kā掠tiâu-tiâu，致使伊無才調施展跤手kā救。而且，烏大海kā威脅，叫伊恬恬bē-tàng倚--過-去，若無，liam-mi隨tshuā人去掠張金虎。所致，伊是一屑仔khuì力lóng無，m̄是無情義刁故意--ê。不而過，tsia--ê lóng是鐵牛家己ê講法，m̄管代誌ê實情是按怎，lóng已經siunn慢--ah，因為伊做「日本走狗」已經tsiânn做事實，解sueh mā無路用。
好佳哉，城隍爺有靈siànn保庇，若無，羅漢獅是穩死--ê。
「阿娘uê！Tsia kám是陰曹地府？」羅漢獅mā m̄知家己昏--去偌久，目睭一thí開隨緊kheh--落，驚一下險仔破膽，身軀勼--起-來kánn-ná蝦仔--leh。
趣味--ê是，伊目睭拄kheh--落-去無三秒，頭殼就隨食五筋kê，害伊驚一下面仔青sún-sún，大大下哀一聲，心內鬱卒kah，「參做鬼to bē快活，實在有夠衰！」
「大gōng獅，你真正是目睭皮無漿ám，hiâu kha-tshng去惹日本人創啥？」
「夭壽--ooh！大兄你thài ē tī tsia？是m̄是鐵牛hit箍pùn-sò出賣--你，害你kap我仝款死tī日本人ê手下？」羅漢獅聽一下tshuah一tiô，，認出he是大兄張金虎ê聲音，趕緊thí開目睭。
「呸呸呸！你kā我看khah清楚--leh，我是人m̄是鬼！」張金虎面仔pìnn-pìnn-pìnn，一副真受氣ê款。
羅漢獅露出giâu疑ê表情，kā張金虎ê手牽leh講：「大兄，現場kan-na你看--起-來khah成人niā-niā，其他--ê kám是人？」
「Ai-iō！」張金虎聽一下氣phut-phut，五筋kê隨大力kā khà--落-去，目睭gîn惡惡kā講：「你mài拖leh烏白練，tsia--ê lóng是番仔寮ê原住民朋友，m̄免大驚小怪。」
「若án-ne，我石獅m̄就無死？是講，tsit-má是幾點--ah，烏天暗地，sì-kè白茫茫koh起bông罩霧，害我叫是陰曹地府--leh；尤其是邊--a tsia-ê原住民朋友，逐家lóng生做烏趖趖，頭毛sàm-sàm-sàm，而且面仔lóng畫kah花pa-li-niau，有夠驚--人！」羅漢獅猶原sa無寮仔門，kā張金虎ê手giú--leh直直問。
「Tsit-má已經是半暝兩點外，深山林內罩bông是正常--ê。Tsia，是山猴in兜ê雞寮，你已經昏死兩工--looh，若m̄是tsia-ê好兄弟無暝無日kā你照顧，我看，你tsit隻tshenn-mê獅早就去蘇州賣鴨卵--ah！無禮無貌，liam-mi緊kā會失禮sueh多謝。」張金虎án-ne講。
「多謝各位ê救命之恩！」羅漢獅歹勢kah頭lê-lê。
「是講in ê面thài ē lóng畫kah花pa-li-niau？」羅漢獅細細聲問。
張金虎tuì後擴kā pa--落，罵講：「Hiah好玄創啥？人he是用針tshiah--ê，m̄是用畫--ê。」
羅漢獅頭tàm--leh tàm--leh，心內千萬ê疑問，sa無張金虎是按怎知影伊出代誌。
原來，hit日下晡兩點外，張金虎tī一欉樟樹跤leh睏ê時，忽然間夢見一个老大人，面仔烏lu-lu，喙鬚不止仔長，穿插mā tsiânn奇怪，雄雄tuì伊講：「獅有難，虎緊救！」當時，張金虎sa無是啥意思，心內iáu感覺老大人有淡薄仔面熟，tsiah想beh開喙kā問，無想著老大人phu̍t--一-下隨無--去。
張金虎驚一下精神--起-來，頭殼內清楚ê夢境，致使伊了解代誌無單純，而且伊知影hām伊講話ê人可能是siáng--looh。就án-ne，伊連tùn-tenn to無，隨招白猴kap萊巴兩兄弟，速速趕去王家庄救人。無想--著，in人未入庄，就tī大橋邊發現羅漢獅倒tī路--裡，規身軀血sai-sai，據在胡蠅蠓仔khè食伊ê肉、suh伊ê血，bē輸死人仝款。
「大兄，hit个老大人到底是siáng？」羅漢獅感覺代誌tsiânn khiau-khi，聽kah兩蕊目睭直直直。
「你臆看māi？」張金虎微微仔笑。
「大兄你趕緊講，我sa臆無--lah！」石獅án-ne講。
「哈哈哈！」張金虎大笑三聲，suà--落激一副嚴肅ê面講：「伊，日審人，夜審鬼，我若無臆m̄-tio̍h，hit位老大人就是城隍爺！」
石獅一聽著城隍爺三字，雙跤隨跪--落-去，大聲huah：「城隍爺！我tsit-tsūn賰六肢tsíng頭仔，hām廢人有啥mih差別，為啥mi̍h beh救--我？為啥mi̍h--leh？」
張金虎無想著石獅反應hiah大，心肝內感覺真m̄是滋味，目屎kâm--leh強忍--落-來，安慰石獅講：「人活--leh就是福氣，m̄管是鐵牛iah是你，lóng是受著我ê牽連，是大兄害你變án-ne--ê，我……」張金虎講到tsia，目屎忍bē tiâu輾--落-來。
「大兄，你mài án-ne，tse一切lóng是我siunn tshóng-pōng造成--ê，kap你無tī代。Beh怪，ài怪二兄，因為伊背骨做走狗！」石獅氣kah咬牙切齒。
張金虎目屎拭拭--leh，向石獅講：「是m̄是走狗我心內有數，我相信鐵牛有伊ê苦衷，伊bē害--lán。」
不而過，tsia-ê話石獅根本聽bē落--去，tī伊ê心內，伊對鐵牛只有怨恨！
後--來，張金虎hām石獅tsit兩个兄弟，為著beh閃避日本人ê追捕，就tī番仔寮蹛--落-來，而且一蹛就是十年。
山頂ê生活不止仔自在，in兩个mā學人褪theh無穿衫，身軀曝kah烏lu-lu，bē輸原住民。值得歡喜--ê是，石獅tī番仔寮結著好姻緣，娶著suí某。伊是白猴ê小妹，名叫做白萊妹，人生做油水仔油水，m̄-nā乖巧無性地，koh gâu煮食，兩人結婚無偌久，萊妹就替石獅生一个查某囝。心適--ê是，石獅講查某囝suí kah親像一蕊花，就kā號名「花蕊」，逐家lóng講伊是『老王賣瓜，自賣自誇』。話講倒tńg--來，花蕊確實有影suí koh古錐，面模仔烏甜仔烏甜，好笑神koh gâu sai-nai，逐家lóng真kah意--伊。
Hōo人喉tīnn目屎流--ê是，花蕊tsit个囡仔短命，三歲就來破病過身--ah。Suà--落-來，囡仔ê老母萊妹，因為查某囝ê死痛苦想bē開，選擇吊tau來死。當時，石獅不止仔凝心鬱卒，每日tsiú tī悲傷ê墓埔，哭kah目屎pué bē離。一直到1945年二戰煞，石獅tsiah hām張金虎tńg去王家庄。Tsit-tsūn ê張金虎改名張水來，石獅人稱六tsáinn--ê。
第十一章：Am-poo-tsê
故事講到tsia，忽然間雷公sih-nah，透風落雨，天地phih-pheh叫，六tsáinn--ê驚一下面仔白死殺，tiô起來大huah「阿娘uê！」
Tsit个時tsūn，自底坐tī椅liâu聽古ê火柱--ā suah雄雄無--去，m̄-koh，有聽著伊講話ê聲，「叔--à，你m̄免驚，恬恬聽我講一个故事hōo你聽。」
Hiàng時，城隍廟ê樹林內有一隻am-poo-tsê，tsit隻am-poo-tsê ê khang-khuè就是替城隍爺顧門。無想--著，有一日伊tī樹頂睏--去，無細膩uì kuân-lòng-sòng ê樹頂跋--落-來，摔kah規身軀傷，tī草埔趖--leh趖--leh。伊心內leh想，tsit聲若hōo giâ-kang tsit寡歹mih仔蟲食--去就死--ah！佳哉，伊tn̄g著一位菩薩心ê人，kā伊khioh起來囥tī城隍廟內，tsit个人就是信徒張火旺。所致，為著beh報恩ê am-poo-tsê向城隍爺稟報，求城隍爺將伊化做人身，hōo伊來報答張火旺ê救命恩情。
「火柱--ā你tī佗？你講tsit个故事siunn hàm古，kám是真--ê？」六tsáinn--ê聽kah跤手la̍k-la̍k-tshuah。
「我就是hit隻am-poo-tsê，時間到--ah，我beh tńg去城隍爺ê身邊--looh。」
火柱話一講煞，六tsáinn--ê規个人gāng--去，喙仔開開hām一句話to講bē出--來。因為伊ê面前有一隻拳頭拇大ê am-poo-tsê，兩粒目睭掠伊金金siòng--一-睏，suà--落-來飛向空中，ná飛ná kuân，「六tsáinn叔--à，再會！」
（煞）
