主講／林祥註
記錄／顏郁珊
本文是2022/4/13 ê講座摘要記錄，主講者林祥註是正隆股份有限公司管理處協理。
話頭
今仔日ê講座邀請--著--ê是正隆公司紙廠ê協理——林祥註先生，來kap lán分享造紙tsit个主題。伊tuì大學畢業了後就tī紙廠食頭路到tann，ē-tàng講是經驗tsiok豐富。Lán生活當中不管時lóng用ē著ê紙，到底koh有啥mi̍h是lán m̄知--ê？Tsit-má就來聽講師精彩ê分享。
Lán生活當中ê紙主要分做：工業用紙、文化用紙、家庭用紙、特殊用紙tsit四種，啊若紙是按怎做--出-來--ê neh？一般來講，造紙產業ê供應鍊分做兩部份，上游是製造業，下游是加工業。一般來講，造紙廠lóng有家己ê電廠，因為造紙ài用著真濟ê暖氣，tse電是tuì做漿設備產生--ê，做漿ē產生「沼氣（tsiáu-khì）」，沼氣就是發電上好ê原料。
除了做漿產生ê沼ē-tàng發電以外，koh有一个mi̍h件mā ē-tàng發電，he就是便當khok仔。便當khok仔一般是tsiok歹回收--ê，因為伊ê紙皮有一重塑膠膜，真oh拆--開，khah早lóng是當做pùn-sò。M̄-koh tsit幾年，政府開始鼓勵業者回收便當khok仔，希望講ē-tàng透過補貼來hōo koh-khah濟業者開始回收。便當khok仔ē-tàng拆做兩部份：紙漿kap塑膠膜，一个變做再生紙漿，另外一个變做燃料棒。講者講：「Tse ē-sái kā碳排放量降低，保護環境，是一件好事！」
紙是按怎做--出-來--ê--leh？先分做「備漿」kap「抄紙」兩部份。備漿ē-tàng koh拆做四个階段。頭一个是「投料」，kā廢紙、紙漿倒落去散漿機內底；koh來是「散漿」，tsit个過程是ài kā紙漿、廢紙拍hōo散，散漿就親像leh拍果汁仝款，mā是ài kā內底ê塑膠掠--出-來。Suà--落-去是「淨漿」，透過去汙機kap揀選機kā拍散、糊糊ê紙漿原料洗hōo清氣，mā kā雜質濾掉。Tsit个原理是利用比重原理，kā雜質拍掉。啊若篩選機，是用篩仔，kā比篩仔ê縫khah大ê雜質tuì漿料篩掉。講師笑講：「經過篩選了後ê原料是koh-khah suí--ah！」等備漿lóng做煞了後，就ē-tàng抄紙--ah！用抄紙機來完成過濾、teh、烘加塗澱粉（tôo-tiān-hún，工業用澱粉）、加光塗布、熨、捲……tsia-ê過程，最後得--著--ê就是lán看--著ê紙--ah！
若是講著「環保衛生紙」，台灣tī tsit方面ê概念猶原無普遍，有真濟人認為環保衛生紙ê原料是用--過ê衛生紙、便當khok仔，iah是油油ê字紙，感覺tsiok無清氣。M̄-koh環保衛生紙論真是用消費者m̄ bat用--過ê字紙做--ê，m̄是用--過--ê。講khah清楚--淡-薄-仔，環保衛生紙ê原料是回收字紙，kā雜質濾掉所得--著ê回收紙漿，kap普通時仔lán leh用--ê、用原生漿做ê衛生紙比--起-來，環保衛生紙對環境ê影響、衝擊是khah低。
Kap歐美國家sio比，lán台灣用環保衛生紙ê比例真低。到底台灣人是按怎無愛用khah環保ê再生衛生紙--leh？講師認為有三个原因。頭一个，是1971年「在室女紙漿」ê廣告，kā「衛生紙」ê印象kap「sù-sī、清氣」縛做伙，啊若環保衛生紙自然bē hōo民眾想著tse。第二个原因是一寡汙名化ê刻板印象，in認為環保衛生紙是用--過ê衛生紙做--ê，m̄-koh lán知影事實m̄是án-ne。第三个，是台灣人一直lóng有ê迷思：白tsiah是好、tsiah清氣。再生衛生紙ē hōo人感覺無夠清氣。總--是，lán ài了解--ê是再生衛生紙ê優點真濟，伊對環境tsiânn有幫贊。
上尾一个議題講著碳排放量。Tsit-má ē-tàng講是一个「碳焦慮」ê時代，自工業革命開始，lán人開始產生大量ê溫室氣體，造成地球暖化，溫度提kuân。若beh阻擋地球繼續升溫，減碳就是lán ài做伙拍拚ê議題。上好ê做法是做到「淨零排放」，án-ne tsiah是真正減輕溫室效應ê方法。
台語sa攏有 - YouTube 頻道
