「全民台語認證」是由國立成功大學台灣語文測驗中心kap李江却台語文教基金會合作辦理ê台語認證測驗。Uì 2009年正式辦理到taⁿ，已經有三冬--ah。Tsit幾冬來，辦理全民台語認證ê經費來源除了報名費ê收入之外，大多數lóng是靠支持者ê捐款tsiah有才調維持到tsit-má。Tsit站，咱ê米甕仔koh lāng-tin-tang--ah，不得不寫批請逐家繼續相thīn！為啥mi̍h咱ài hō͘全民台語認證繼續辦--落-去？有幾點理由：
第一：台語認證ē-sái鑑定台語老師ê台語能力kap學生ê台語學習成果。當今ê社會分工真幼mā真注重專業證照。無論金融、資訊、電機、土木、語言等等lóng有相關ê檢定考試。行ǹg專業證照ē-sái講是現此時各行各業ê趨勢，台語mā無例外。台語認證是確保台語教學優良成果ê重要工具之一。
第二：有成大全民台語認證，對教育部tsiah有壓力。咱全民台語認證ê前身是2006年成立ê全民台檢聯盟。Hit當時教育部iáu無想beh辦台語認證。Tī台檢聯盟kap本土社團ê壓力之下，tsiah促成教育部tī 2010年開辦閩南語認證。目前教育部版閩南語認證暫時由國語會負責辦理。若照現此時中央政府組織改造規劃，國語會未來ē降級併入社教司。未來國語會是m̄是ē繼續逐年辦理，hō͘人真hiau疑。
第三：成大全民台語認證tsiah ē-tàng顧台語ê主體性kap品質。咱成大辦理ê全民台語認證堅持用台灣ê腔口做標準。M̄-koh，教育部堅持用閩南語。咱成大台灣語文測驗中心是常態ê認證機構，ē-sái持續研發kap保障認證品質。M̄-koh，教育部逐年teh換承辦單位，kā考生當做白niáu鼠。
第四：成大台灣語文測驗中心mā是tshui-sak台文運動ê重要基地。成大台灣語文測驗中心目前有七位專職人員。Tsia-ê人員除了辦理台語認證，平時mā舉辦真濟台語ê研習、演講、座談、研討會、營隊kap出版期刊、專冊等等。Ē-sái講，成大台灣語文測驗中心ē-sái用學術ê Kha̋ng-páng做真濟民間社團無一定做ē到ê khang-khuè；若hō͘倒--去，實在真無彩！
目前華語、客語、原住民族語分別有「國家華語測驗推動工作委員會」（華測會）、「客家委員會」（年度經費大約30億）、「原住民族委員會」（年度經費大約80億）專責機構負責推動，而且開辦認證幾若冬--ah。可惜，佔人口多數ê台語族群suah變成「弱勢ê多數」。華測會一年有兩千外萬ê經費、大約三十人ê人力teh做華語認證。台語認證--leh？成大台灣語文測驗中心是設立tī國立成功大學研究總中心下面「自負盈虧」ê獨立中心。無--打-緊，koh ài納管理費hō͘學校。所擺，不時tio̍h為經費來操煩。
Tī tsia，koh一擺拜託咱ê支持者：有錢出錢，有力出力，hō͘咱成大台灣語文測驗中心kap全民台語認證ē-sái繼續行--落-去！請各位利用李江却台語文教基金會ê捐款方式（請註明「台檢專案」）來捐款。咱ē專款專用，捐款徵信mā ē定期刊tī《台文通訊BONG報》。若需要gún為各位做進一步ê募款說明，歡迎hām guán連絡。感謝！台灣出頭天！
成大台灣語文測驗中心 ê電話:06-238-7539；e-mail: uibuntw@gmail.com。
捐款方式: 郵局劃撥口座：1902-1486，華南銀行口座：123-20-050514-2，以上戶名kap支票title lóng是「財團法人李江却台語文教基金會」（請註明「台檢專案」捐款）。
（作者是成大台灣語文測驗中心主任、李江却台語文教基金會董事）
