Tī文化強權壓迫下面，逐日，世界安靜ê逐角落，lóng有母語漸漸失去活命，枯焦--去。母語無--去，族群消失--去，地球繼續teh轉se̍h，看起來無變，總--是，色彩漸漸失落。
威權體制所愛用ê語言，是統一ê語言，是宰制ê語言，通過教育體系，hō͘伊變做強勢，變做求生存一定tio̍h ē-hiáu ê語言。威權體制所愛聽ê聲，是順民一致回應政令ê聲，是虛假ê讚美。威權體制用統一ê語言，起造浮tī半空中ê碉堡，in用膨風ê優美言詞所起ê門窗，無一扇通向人民徛起ê土地。
總--是tī威權體制ê陰影所遮崁ê大phiàn土地頂面，永遠lóng有另外ê語言，teh傳揚威權體制無容允ê故事，將另一款ê記憶一代一代傳--去。Tsit款語言，咱將伊稱做「母語」。因為，有濟濟時tsūn，tse是老母傳hō͘查某囝，ta-ke傳hō新婦ê語言。Tse是受壓迫ê人民出怨氣、講心酸、衝破禁忌ê悲情語言，mā是tī生活中傳講盼望ê故事、分享對抗威權ê智慧ê時，所用ê活潑語言。
一齣用南美洲印加民族ê語言Quechua kap殖民者ê西班牙話做伙表演ê電影《驚惶傷心ê母乳》（La Teta Asustada）內面，女主角ê老母tī臨終ê時tsūn，用Quechua ê語言，將伊按怎受著獨裁者ê軍隊殘害、強暴ê經驗，用唸詩ê方式唱--出-來。女主角mā用Quechua語，唱出伊kap老母ê約定，伊將老母ê身體，帶轉去in ê故鄉。Tsit幕ê畫面tsiok簡單，總--是用母語唱--出-來ê故事，hō͘人全身軀lóng雞母皮giâ--起-來，感動到起ka-lún-sún。
Tsit齣電影得著柏林影展2009年ê金熊獎，演出女主角ê女演員Magaly Solier tī領獎ê時，用西班牙語講一兩句話，就開始轉做伊ê母語Quechua講話，語氣充滿熱情，然後，伊koh用吟唱詩句ê方式，將伊ê感受唱--出-來。就是無法度了解伊ê意思ê人，mā ē感受著tsit个語言ê音韻kap氣力，感受著伊teh使用tsit个語言ê時，伊ê身體kap心靈lóng充滿活氣。用母語，伊ē-tàng唱出抗議ê詩歌，ē-tàng將家己融tī暴力內ê身體，重新揣倒轉--來，tsiâⁿ做整體。
母語是詩ê語言。女性用詩ê想像，用母語ê韻律，互相吟唱受傷ê土地ê記憶，hō͘活命倒轉來hō͘威權硩tio̍h傷ê土地。uì受傷ê母體流出ê母語之乳，好親像是將傷心ê記憶kap悲情灌入下一輩女性ê體內。總--是，當伊發酵（huat-kàⁿ），化做詩，化做歌，伊ē將苦痛化做養份，灌沃盼望ê種子。 母語是無力者ê氣力。
1947，二二八事件掃過台灣，掃過tī時代ê風暴中，teh追揣尊嚴kap自由ê人。爸、囝、兄弟受刣ê記憶，經由存留性命ê女性，tī角落teh傳講。「有一日，咱一定ē koh出頭天。」一位二二八ê母親，吞落所有ê心酸苦汁，一擺koh一擺講hō͘伊ê囝兒來聽。老母將盼望之聲pûn入囡仔ê心，án-ni，無beh屈服ê聲，tī威權所控制ê陰暗空間湠--開，進入無力者心內，tsiâⁿ做in ê氣力。Tse是威權無法度消滅--ê。母語是詩ê語言。母語是無力者ê氣力。母語是女性ê聲。是威權無法度奪--去ê記憶，無法度消滅--ê，充滿尊嚴kap氣力ê聲音。
（文章有一部份內容bat tī台南《首都詩報》發表）
