賴朝和
「節能減碳」ē-sái講是tsit-má上流行ê政令宣導口號之一，m̄-koh我認為應當是「節能保碳」khah適合。
讀過自然科學ê人lóng知影，碳（C）kap碳酸氣（『二氧化碳』，CO2）是完全無仝款ê物質，碳酸氣是碳kap sàng-sòo（『氧氣』，O2）經過充分化學作用以後所產生ê一款新物質，碳作用掉若愈濟，產生ê碳酸氣mā愈濟。
大自然ê碳，除了少數是以柴碳、suān石、iah是石墨ê型式存在，大部分ê碳是以塗碳ê型式存在地球上，塗碳自古以來就是人類上重要ê燃料之一，tsit-má ê發電廠mā iáu有tsiok濟是使用大量ê塗碳做燃料來發電，tī大量塗碳to̍h火ê過程中，塗碳ē愈來愈少，同時mā ē產生大量ê碳酸氣。
塗碳kap石油仝款，是一款無法度再生ê能源，無限制ê開採kap消蝕，有一工一定ē hō͘人挖了了。塗碳除了是重要ê燃料，mā是tsiok濟民生kap藥物化學品ê重要來源，咱若是kā伊用了了，以後咱ê囝孫就無塗碳thang好用，tse一定ē影響咱囝孫未來ê生活，對咱ê囝孫mā tsiok無公平。其實m̄免等到後一代，若繼續無站節來消蝕塗碳，tī咱一代，咱就ē遭受著能源不足ê苦楚。相信逐家最近對電費ê起價lóng真無爽快，其中塗碳採買ê高度支出就受著tsiok濟ê議論。
火碳除了塗碳kap gá-lah（『精煤』）、liân碳（『煤球』）等塗碳ê再製品，咱tiāⁿ-tiāⁿ leh使用ê火碳iáu-koh有柴碳，he是柴kho͘經過加熱以後碳化所形成，其實kap柴kho͘仝款，親像石油kap天然氣等等ê有機燃料，經過加熱iah是to̍h火，hia-ê燃料內底所包含ê碳元素，有tang時mā lóng ē先碳化做烏色ê碳質，然後就koh繼續產生化學作用變成碳酸氣，所以咱所講ê碳能源，除了烏色ê火碳，應當mā ài包括所有ē得碳化kap用火燒ê有機物質，碳酸氣內底雖然mā包含碳元素，m̄-koh化學特性kap有機物質是完全無仝款。
日本發生大地動以後，一寡仔先進ê國家開始檢討核能發電ê利害kap得失，而且mā以實際ê行動減少用核能來發電，tī代替能源無法度大量俗價使用ê情形之下，kan-taⁿ ē-tàng使用koh-khah濟塗碳、石油kap天然氣等碳能源來補充能源ê欠khueh，短期內一定ē koh-khah加速碳能源ê消蝕，tsit-má ê碳能源，價siàu iáu-koh有起有落，m̄-koh地球上ê碳能源若減少到一定ê程度，tī hit个時tsūn，碳能源ê價siàu m̄管按怎起落，一定ē hō͘逐家哀爸叫母。
為著避免能源價siàu tī短期內變做透天kuân，mā為著後擺咱ê囝孫iáu-koh有塗碳等ê碳能源thang好使用，咱逐家uì tsit-má開始，就ài養成儉用能源ê習慣，以實際ê行動減少油電ê使用，án-ne tsiah有法度保留koh-khah濟ê碳能源，hō͘咱家己kap囝孫tī未來bē因為碳能源ê嚴重不足來大大影響著生活ê品質kap幸福。
碳能源ê使用iáu-koh有一个koh-khah嚴重ê後果，因為碳能源ê大量使用，相對mā ē產生大量ê碳酸氣走uì空氣內底--去，空氣內底ê碳酸氣若siuⁿ濟，就ē引起地球空氣ê溫度漸漸變kuân，tse就是咱所聽著ê「地球暖化」ê現象。地球空氣溫度若變kuân，m̄-nā一寡仔冰山ē溶--去，造成一寡仔khah低水ê所在hō͘海水淹--去，而且mā ē逐不時tī世界各地引起無正常ê大水kap大khó-huāⁿ，tsit款ê現象ē tuè地球空氣溫度愈來愈kuân suà變kah愈來愈嚴重，規个人類生活ê安全kap幸福所受ê威脅mā一定ē愈來愈淒慘，uì tsit个角度來看，咱是m̄是koh-khah應該減少油電ê使用，kā koh-khah濟ê碳能源保留落--來-leh？
翻頭討論宣導口號ê用字，造成地球暖化ê物質是碳酸氣，m̄是碳，地球上ê碳能源若保留愈濟，án-ne空氣中ê碳酸氣就ē-tàng愈少，地球暖化ê現象就bē變kah hiah-nī嚴重，保碳kap節能其實是一體兩面ê講法，所以我認為使用「節能保碳」比「節能減碳」koh-khah適合；另外一方面uì科學物質不滅定律ê觀點來看，碳元素tī碳能源kap碳酸氣中變來變去，碳元素ê總數量是無所謂加減ê問題，若uì碳物質ê觀點來看，「碳kap碳能源」m̄管講是性質、形象iah是語意，比起「碳kap碳酸氣」，應當koh-khah容易hō͘人產生聯結，tse mā是我認為使用「節能保碳」比「節能減碳」khah適合而且mā khah ha̍h教育理論ê另外一个原因。
「節能‘保’碳救地球」，口號ê選用愈簡單愈明瞭愈好，只是我認為咱mā ài考慮著口號tī學理上ê合宜性，其實話講倒轉--來，按怎講是另外一回事，逐家ē得了解而且以行動實際來實行節能ê行為，tse tsiah是咱ài更加關心ê重點，但願咱逐家lóng ē得鬥陣來推行。
