深水無聲

王淑珍 

    文藝復興時期，英國有一位真出名的政治家，仝時嘛是一位航海家，伊ê名叫做Walter Raleigh (1552─1618)。Walter Raleigh bat寫過一首詩《惦靜ê情人》，詩文內底，伊將激情比喻做流水，伊按呢描寫：「用流水來比喻激情上妥當，淺水ê聲不時lo̍k-lo̍k叫，深水顛倒惦靜無聲；好親像思念ê心情若唱明，內心定著無深情。情人若不時甜言蜜語，定著是虛情假
愛。」


    世間人ê誠心佮良善ná親像流水仝款，無需要刁故意去kā人品捧、kā人宣揚。人干單佇平靜佮安和ê時陣，才會當達到感情、思想lóng崇高ê境界。

    有一個故事按呢講：

    有一工早起，一個做老父--ê招伊ê後生同齊去樹林仔內散步。後生歡歡喜喜佮老父做陣去。

    父仔子兩人佇山路一个彎角ê所在停--落來，惦惦佇hia有一下仔久。
    
    老父開嘴問後生講：「除了鳥仔唱歌ê聲以外，你敢猶有聽著啥物聲？」

    後生斟酌聽一睏了後，應講：「我有聽著馬車ê聲。」

    老父講：「嗯，確實有馬車ê聲，而且是一台空ê馬車。」

    後生聽了，真好奇問老父講：「也無看著馬車，你哪會知影he是一台空ê馬車咧？」

    老父應講：「真簡單，聽聲著知。馬車愈空，噪耳ê lo̍k-kho̍h聲著愈大聲。」

    即個後生大漢了後，便若看著有人一支嘴講無停，像水道頭關袂密；常在胡白kā人插話，拍斷別人對話；叫是家己上bat、上gâu，目空一切、看人無目地；閣真愛批評人。老父講ê彼句話著會佇伊ê耳空邊出聲：「馬車愈空，噪耳ê lok8-khok8聲著愈大聲。」

    有潦水過溪經驗ê人，佇踏落水進前，攏會先抾一粒石頭，tàn落去水--裡，測看溪水有外深。水花仔若噴愈koân，溪水著愈淺。反倒轉，若是噴無啥物水花仔、水聲閣悶悶無偌大聲--ê，溪水定著真深。

    咱做人著愛像深水同款有深度，愛學會曉斟酌聽別人ê聲音，毋通一心一意干單想欲強調家己ê主張，攏無顧慮別ê想法。千萬愛會記得：

    靜水深流，深水無聲。

    馬車愈空，噪耳ê lo̍k-kho̍h聲著愈大聲。