廖瑞銘
舊年底出版兩本有關台語文學史ê冊：方耀乾ê《台語文學史暨書目彙編》kap林央敏ê《台語小說史及作品總評》。看完，感慨無量，心內一直leh問家己兩个問題：Lán ê台語文運動到底做到sím-mih坎站--ah？Ia̍h台語文運動kap台語文學ê發展是sím-mih關係？
方耀乾tī冊--裡講，過去台語文界khai siuⁿ濟氣力leh爭論文字符號kap拼音系統，致使影響台語文ê發展。《台文戰線》ê創刊是台語文學運動史上一个新階段ê開始。因為in beh極力避免陷入chit个捲螺仔中，無愛koh參與台語文字之爭、書寫系統爭論、台語文基礎教育、台語語言學研究、台語文運動、街頭運動等等。另外，koh引用林央敏tī《台文戰線》ê發刊辭中ê「擔憂」，講chia-ê台文界『羅馬字拼音方式的爭執』，『已無形中傷害了台語運動及台語文學的發展』。伊舉每一期《台文戰線》ê稿約，講tī台語文字iáu未有真好ê規範、教育體系iáu未建構好勢ê情形下，in尊重所有作者ê台語文書寫系統。其實Chit寡講法kan-na去爽著運動kho͘仔外ê人，順suà hō͘ in提去當做刣咱台文界有力ê藉詞niâ，對台語文運動無幫助，而且對lán chia-ê參與二十thóng年ê運動者實在mā無公平。
今仔日，台灣事實上是台語語言學研究iáu無夠，台語文基礎教育mā無啥leh做，lán iáu為著母語教育ê代誌，三不五時ài去教育部陳情、抗議，台語系一个仔一个leh停掉，……。Án-ni-siⁿ，lán kám ē-sái講，台語文運動免koh做--ah？當然beh做ia̍h m̄做是各人ê選擇，lán lóng尊重，無人ē-tàng勉強。M̄-koh kā運動過程中ê爭論lóng當做運動者ê罪過（chōe-kòa），是lán承受bē起--ê。
Koh再看林央敏tī伊ê新冊--裡，講『基於筆者讀了自古至今所有台語小說後，所得的印象是－漢字作品的文學性高於羅馬字作品』，而且提出七點理由講『自古至今，多用羅馬字寫作者大多不是文學作家』，看--著，心chiok疼--ê。Chit款講法kap黃春明leh批判lán台語文學書寫『不倫不類』，有sím-mih無仝？文學作品好bái，文評家各人看法無仝，是chhiâng-chāi有--ê，lán mā lóng ē同意講，書寫系統應該m̄是評斷作品好bái唯一ê標準。像央敏兄án-ne，一面beh講別人爭論書寫系統、文字符號無好，另外一面koh用重話批評無仝書寫系統ê作品低路，hō͘台文kho͘仔外ê人看笑話，對台語文ia̍h是台語文學運動kám就有幫助？
Lán若越頭kā看，台語文學是ùi台語文運動發展--來-ê，上早期台語文寫作者是運動ê理由khah koân過文學ê理由，今仔日，台語文運動ê理由iáu未消失，運動ê路iáu真長--leh，lán無權利hoah歇睏，講無beh運動救台語，kan-na beh去做「高貴ê文學夢」；更加m̄-thang看輕hia-ê iáu-koh leh lím墘戰鬥ê運動者。
論戰無了時，總講--一-句，是beh提醒lán家己台文界ê朋友，台語文運動kap台語文學ê發展是kap做伙--ê，台語若救無活，台語文學按怎寫、寫koh-khah濟mā無市場、無存在ê意義；Koh再講，若kā有用羅馬字ê作品lóng否定掉，漢字koh iáu寫bē好勢，beh按怎繼續發展台語文學？Lán逐家講tio̍h--無？
（Chit篇用傳統白話字。作者是中山醫學大學台語系教授，台羅會理事。）
