◎李勤岸
台灣語文相關系所應該修教育學分，tse是當初設立台語文相關系所ê主要目的之一：Beh培養國民教育ê母語師資。後--來suah台語文系所成立ê時，顛倒kā限制bē-sái去修教育學分，講是「非師資培育系所」。Guán台師大台文系成立ê時，就是án-ne hō͘人限制修教育學分。若是台語文系所ê學生bē-tàng去修教育學分，án-ne國民教育ê專業師資beh tuì佗位來？若照tsit款對台語文系所無平等ê對待，限制in修教育學分ê對待看--起-來，分明就是無beh tī lán ê國民教育好好仔推行母語教育，無beh hō͘伊行向專業化、正常化，分明就是beh剝奪lán台灣子弟受母語教育ê權利！Tse是lán台灣人ê權利，lán一定ài kā討--轉（tńg）-來。
國民義務教育無應該排除構成國民人口主要族群ê母語教育，tse是納稅人ê權利。台灣講台語做母語、講客語做母語、講原住民語做母語ê人口加--起-來佔台灣人口ê 85%。結果in ê 母語教育tī國中課綱hō͘人排除，tse是oh得hō͘人理解ê代誌。
聯合國教科文組織（UNESCO）tī 1951年發函hō͘會員國，要求各國ê國民教育應該用母語來實施教育，án-ne tsiah有法度kā hit个族群ê文化保存--落-來，傳承--落-去。同時，mā tsiah有法度hō͘囡仔ê潛能完全發揮--出-來。2001年2月21 UNESCO tī世界母語日公告全世界瀕臨死亡ê語言，特別指出台灣原有二十四種語言，現今只賰十二種，其中除了華語，其他ê語言lóng有可能ē tī 21世紀尾消失。
多語言多文化是台灣ê特色，台灣ê國民教育應該呈現tsit个特色，tse是台灣真重要ê資產，mā是當今世界ê主流思潮，台灣無應該家己放棄多樣語言文化ê特色，自外tī tsit个世界潮流。
國民黨政權beh講伊m̄是殖民政權，就無應該保留殖民ê語言政策。全世界lóng認同殖民時代已經過--去，殖民ê語言政策是落伍、無文明、野蠻ê語言屠殺政策。台灣無應該繼續日本殖民時期留--落-來ê「國語」語言政策，只是kā「日語」國語，改做「華語」國語。殖民語言政策ê本質iáu m̄肯改變。一方面beh宣稱伊m̄是殖民政權，一方面koh beh繼續保留殖民語言政策，án-ne kám無矛盾？21世紀iáu有「國語」，應該是見笑代。以前tī lán將國小課綱內底ê「國語」改做「華語」，還tsit个語言伊本來ê正名，mā hō͘國民黨政府有洗清殖民政權罪名ê機會，結果國民黨一提著政權，馬上kā「華語」改轉來「國語」，恢復伊殖民政權ê真面目。
國中應該kā台灣人ê本土母語列做必修，若無，自2001年實施ê國小母語教育，bē-tàng延續--落-去，變成國家真大ê浪費。囡仔ê母語學習應該持續、有連貫性，無應該到國中階段就斷--去。台灣ê政府應該為人類保存人類tī台灣ê語言資產，tse是權利，mā是義務！
